《江嵐客家文學專欄》

| | | 轉寄

台灣客人過五月節(1)

  五月節he客人三大節之一,同春節、八月半三隻節日,he客人盡重要ke三大節日。

  五月節盡早起源,做得追溯到夏朝,當時有五月初五浴蘭湯ke風俗,因爭人地ke接觸來發生傳播作用,經過歷代ke傳承,這種風俗越傳越大,續變做民間ke大節日。後來又因為紀念愛國詩人屈原,用佢投江ke日仔稱為詩人節,故所,五月節又安到「詩人節」。

  頭擺民間講五月份he「百毒之月」,因為天時轉熱,各種ke蚊蠅蟲蛇類百足開始活動,傳染病也kha容易流行,故所,各寺廟會在五月初印寫「修善文」或者he「勸世文」發pûn鄉親民眾,因爭天時熱,大家火氣kha大,脾氣也跈等上來,kha容易發譴,希望大家看著解勸善文以後,做得收心養性,降兜仔火氣,以免惹出禍端。古早ke風俗還認為講,將這兜善文焚香禮拜了後當日放火燒忒,使得消災解厄。還有一ke風俗he用硃砂筆畫符貼在門楣頂項,恁樣也做得避邪。

  五月節he大節日,故所風俗盡多,除忒拜阿公婆、thak粽仔以外,這日家家戶戶就oi在門口掛菖蒲、艾仔同榕樹葉,這ke部份he黃巢之亂留下來ke典故。一般,客人會在午時之前,拜阿公婆。正午(11點到1點),承「午時水」,傳說在五月節當晝,舀井水用缶(fì)罐封起來,放到陰涼ke所在,這罐水放kha久就m̀會壞忒,假使在熱天熱到發痧,飲這罐午時水就做得退燒退熱消暑治病,午時水有解毒、消暑熱、除時疫等功效,除忒做得拿來泡茶、治病、淨宅、畫符等等,甚至還做得醫皮膚病哦!客人有一句俗話講:「午時水飲一口,kha好補藥食三年」。Holo人也有講:「午時水洗目睭,金到若烏鶖」。飲雄黃酒,做得驅瘟解毒;用筷仔也he用手指搵雄黃酒在細人仔ke額頭項畫一ke「王」字,做得消毒除災,歸ke熱天就m̀會發痧、發病;同賸ke雄黃酒hia到眠床下同屋前屋角,做得預防蛇哥、五公蟲、蟾蜍、壁蛇、毒蠍子(以上稱為五毒)該兜毒蟲趖入屋肚項。

  為著這擺ke報告,ngài有訪問台灣各地ke客家人,在地過五月節ke情形。