《油桐花ke思念》

 | | | 轉寄

范文芳教授 序

作者 Fan-vùn-fông...范文芳 2008.06.01

2004年ke台灣春天，桂竹筍就oi當出了，油桐花就oi隨時鬧台台綻放山排，阿帆牯又oi出詩集了。

2004年ke開春，阿帆牯佢m̀知頭天ke熱情，在南庄ke鄉下，就mò頭神樣仔，歸日透夜同阿扁助選，正經ke工作——寫吳濁流研究論文，停拖忒半年。

2004年3月20日，選舉ke結果，超出台北市大部份選民ke判斷，也超出桃、竹、苗客家庄下部份選民ke預期，阿扁竟然贏連宋。Mò辦法接受這種結果ke人，pûn m̀知溲鼻ke媒體唆弄，pûn相爭權位ke政客挑撥，鬧到全台灣莫名其妙ke不安。

Ngài lâu阿帆牯，本來當想暢快飲酒慶祝ke心情，硬硬隱忍下來。換一種心情，阿帆牯將最近零零星星寫好ke客語詩篇，整理出來，準備出版。

花費ngài半個月ke時間，詳細唸讀七篇五十五首客語現代詩，我用下背幾段文字，來批評這兜詩作：

一、自從1994開始，阿帆牯一直當煞猛用客語寫現代詩。

二、1999，詩集《有影》出版，2000，詩集《田螺》出版，這擺打算出版《油桐花个思念》。

三、十年來，阿帆牯ke詩作，頭尾都十分堅持用客語發言，題材he佢現實生活中看到、感到、想到ke景觀、人心。

四、年少輕狂ke詩人，本來就有天生ke壞脾同反骨，看著周圍ke同事、親戚，有感動也有反感。

五、對近年來，客家庄，就北埔、南庄ke假日人潮、時行擂茶、咖啡ke客家文化，也有當多愁慮。

六、十年來，阿帆牯堅持ke詩風，我非常肯定，佢个詩作量多，客語ke使用熟絡。

七、有關客語詞彙、句型ke鍛煉，還做得加強，趣味性oi像陳永淘，溫柔性不妨參考顏志文。

八、有關現代感ke幽默、反諷，以及意象ke使用，也he往後努力ke方向。

在這本詩集《油桐花个思念》出版前幾日，ngài寫下這短短一篇有兜私心ke話語，希望同阿帆牯來共同勉勵。

2004年4月 Ti國立新竹師範學院