《油桐花ke思念》

 | | | 轉寄

自序 寫詩仔

作者 Hiû-yit-fàn...邱一帆 2008.06.15

寫詩仔，he因為先生ke鼓勵，厥ke精神、思辯、觀念，深深遐到ngài這隻山肚ke細猴仔。

寫詩，he一種思考，思想自家，思考身邊ke人，四圍ke事物、風景、測探地泥ke深度，思想ke深度。

寫詩仔，he為到客語ke生命，精鍊，總有一款m̀認輸ke堅持，帶等一項mò人看起ke理想，勇敢向前行。

寫詩仔，he為到某種感動，深刻到吾ke腦殼底背，一行一行簡單ke詩句，一句一句複雜ke心情、故事。

寫詩仔，永久，mò像日月星光，山河大地ke長久，m̀過，he個人短短ke生命，永恆ke吟唱，敢m̀-he？

寫詩仔，he個人不斷經驗，不斷思考，一直感動，一直吟唱ke過程，只有起點，mò終點；只有階段，追尋目標。

每一首詩仔，假使he一ke生命，生命，有短暫永恆，生命，mò一ke共樣相同，詩仔，自有佢特殊ke存在，不管幾長、幾久。

寫詩仔，寫出自家最親切ke聲音，最真心ke感受，最自然ke感動，假使，還做得得到一息半息ke迴響，一位兩位知音ke交流，人生還有麼个遺憾？

寫詩仔，pûn ngài感覺自家，還有ti該透氣。希望，自然ke生態，m̀好因為ngài，產生不平衡ke情況，無成，ngài會試到自家責惡，出一本客語詩集。

2004年4月22日ti南庄