《李喬小說─荒村》

 | | | 轉寄

三、無限江山 (6)

作者 李喬 漢羅翻寫：劉敏貞 2010.08.01

他總算心平氣和ke做起「給仕」來。

在liá段時間，他工作chhin賣力；他努力工作，認真讀書，他也養成認真思考lâu用心觀察ke習慣。

他自家體會到，自家ke見識眼光係漸漸成熟lè. 但係成熟sa帶來更多ke迷惑lâu不安；liá-teû不安lâu迷惑又逼他還較勤在吸收學識，沉思種種問題。

在警察課底背，意外ke, 幾個日籍巡查都chhin友善。特別係官階警部ke警察課長片山一郎最關心他。有一日，片山lâu他喊到專用辦公室底背：

「劉君：lâu你講一則故事：我在大湖郡屯兵營服務時ke故事。」
　　
「大人……」他無想到liá-ke人還駐在過蕃仔林附近。
　　
片山lâu他講，樣仔由負責「監視」一ke人，到恰意liá-ke人，並then手liá-ke人求上進；最尾liá「一ke人」竟成了有名ke「反日份子」。 　　

「Ke就係劉阿漢，你阿爸！哈哈！」片山乾笑定定。
　　
「大人……」他感到頭皮麻麻。
　　
「Liá係我，一生遺憾ke事ta.」片山ke眼神係溫和ke：「你，希望，m̀好pûn我失望chang好。」
　　
「Hai i……」
　　
「樣仔？你，為難ka ?」片山面色一整。好一隻老狐！
　　
「無。大人，請多多教訓……」
　　
「劉君：嘛！台灣人wa,一生懸命效忠皇國ka,唯一前途ta !」
　　
「Hai i！」
　　
「M̀好學你父，頭那，鐵筋鋼骨泥，單單滅亡一途ta.」
　　
「Hai i……」
　　
「嘛，你表現宜na-ra,我保舉得，升職係路，或者，專檢喔受得，報考上級學校。」
　　
「Hai i！」
　　
原來片山liá-ke老傢伙，還係阿爸死對頭nò. Ke, liá-ke人對待自家係真心，還係偽裝ke ? 看來，liá-ke人因為màng能「降伏」阿爸sa耿耿於懷吧？M̀使向自家示意，也m̀使親自監視他ke,liá-ke人好像oi證明mak-ke吧？
　　
M̀管樣仔，在日常底背，片山確實chhin愛護他；包括常常送他食物、用品，還有專檢用書等。特別係後者，他不應該懷疑其誠意。
　　
在警察課底背，唯一pûn他咬牙深恨ke 係鍾益紅liá-ke三角仔。譴人ke 係，他就pûn人指定在鍾所屬「特高系」底背當差。
　　
「特高系」係專司監視、偵察、審問台人思想問題ke部門。
　　
「特高系」原從一位日籍警部當主任，liá-ke人在明鼎來後無幾久就調離本課了；liá下就由鍾益紅暫時代理。聽講鍾因成績好，近來oi榮升巡查部長；巡查部長係有可能任特高系主任。台籍巡查，做上甲種巡查ke已經寥寥可數；「巡查部長」，怕係全島唯一ke吧？
　　
關於鍾益紅liá-ke人，凡係舊苗栗支廳轄內ke人，差m̀多無人不知無人不曉；ke「巡查部長」ke榮銜，係台籍同胞血淚所堆砌起來ke啊！
　　
明鼎報到，鍾無特別ke表示。直到會滿一隻月lè,有一日liá-ke高大紅面傢伙chang尋他談話。
　　
「Oi你在liá片做『給仕』，mak-ke原因，你知吧？」
　　
「知。」他坦然應。
　　
「Ke, 你就細心一sit.」鍾忽然間伸手輕輕撫摸佩劍：「無好pûn我抓到mak-ke 把柄！知無？劉阿漢之子！」
　　
「知。」
　　
「哈哈！感謝你阿爸，知吧？」
　　
「？……」
　　
「係他，還有ke-teû亂民、憨仔、蠢貨，pûn 我立功ke機會；不然nai有今日？哈哈！」
　　
「我知……」他咬tén牙關。他想起阿爸常常嘆息：台灣人最多漢奸……
　　
「知mak-ke !」
　　
「知……會謹慎細心……」
　　
鍾哼一聲，然後示意他下去。他一步一步定定仔行開。他感到太陽穴突然跳動，肩窩、頸筋、腰肢麻麻ke. Liá時節除thet意識ke中心部位以外，其他部分都暫時保持微微恍惚lâu混亂ke狀態。他，瞬間可能飛奔過去，也可能轉過身，用雙手扭斷鍾ke頸筋，或者就當面咬一口；他還驚會忽然間瘋狂起來。
　　
好加在，liá-teû都無發生。因為ke一絲十分清醒ke意志提醒他。他，畢竟m̀ 係一個衝動ke後生人。他想起阿爸ke沉著lâu冷靜……。 　　

我一ke人拼命無用，弒死一ke鍾益紅無用。他清楚liá點。
　　
我 oi忍耐。Liá係忍辱負重！他想起郭先生講ke話。
　　
但係，他畢竟還係二十零歲ke後生人，當有一日，在一群帶有手銬腳鐐ke「犯人」中見到老阿爸時，他到底還係忍m̀住……
　　
係八月半前一日。
　　
明鼎因為oi值班，下晝提早一點鐘下班。正在炊事室洗米下鑊時，忽然間聽到拘留室ke片人聲嘈雜；除腳步聲，巡查大人在罵人ke聲外，竟然還有用本地話ke咒罵聲。

情況奇特，明鼎放下飯鑊，溜過去一探究竟：原來係一群犯人，差m̀多有二十名以上，chang pûn人推進拘留室。拘留室外，五六個巡查隻隻持chhung戒備，像面臨大敵。

拘留室關滿嫌犯係常事，m̀-ku像今晡日án-ngiòng公然咒罵ke情形，明鼎還係第一pái見到。

「弒掉我teû吧！哼！Mak-ke世界！」

「M̀公平！偏心！偏心ke狗腿仔！」

「屌你姆！狗養ke !」

Liá-teû人必然m̀ 係盜竊，定著係 mak-ke糾紛案ke關係人吧？拘留室底背一片昏暗，明鼎看m̀出mak-ke. 他chang oi轉身行開，忽然間拘留室底背有人喊他：

「明鼎！喂！明鼎！」

「Má人？」他全身一震。

「係我啊！詹庭求啦！」

詹庭求？Ke m̀ 係阿嫂ke老弟嗎？

「啊！大阿哥！」他最先認出來ke sa 係明青大阿哥。

「M̀！你走開！」大阿哥壓低聲音喝。

Liá時節他看清楚lè. 除大阿哥以外，還有庭求、淋求兩兄弟，另外都係大湖庄社寮角、橫坑一帶ke熟識人……

「到底mak-ke事？」

「還m̀ 係為到佃租糾紛，黃添財lâu葉秀森oi比照蔗園提高水田佃租；oi換約，我teû反對，他teû就要求『立入禁止處分』……」

「他teû oi搞『立毛差押』，他teû聯合起來對付我teû，我teû也就相抗lè.」淋求補充解說。

「大阿哥，你nò ?」他，胸膛底背篤篤狂跳。

「我喊你走行開，聽到無！」

大阿哥，他向來懼畏三分。Liá幾年來，在屋家，真實就係「長兄如父」，事事都係大阿哥在ke片照應ke ;在他心中，大阿哥ke形象係嚴肅謹慎又友愛ke;在歸個蕃仔林，liá位年紀m̀大ke大阿哥，sa受到相當ke尊敬。大阿哥，ngióng會牽涉入來nò ?

「唉！係我teû兄弟連累他。」淋求講。

「阿鼎叔；係姊丈來支援我teû,無想到……」

明鼎愣在ke片了。他知應該行開lè, m̀-ku雙腳不能定動。

「喂！姓劉ke, 劉明鼎，pûn 我一碗水來飲好無？」

「好。」他講，他轉身行開。

「禁止！」係；係鍾益紅ke聲音：「禁止！劉明鼎，你oi違反禁令嗎？」

「狗腿仔！三腳仔！走狗！」拘留室底背有人罵開啦！

「哼！等我食飽睡足後，會一sà sà修理你teû !」鍾笑吟吟：

「Liá下莫浪費精神，留在暗晡頭使用，嗯？呵呵！」

「大人，pûn他，他teû飲sit-pá水，好無？」明鼎低聲下氣要求。

「M̀准！你閃開！」鍾逼前來：「你大阿哥也有份，對m̀對？嘿！我做得lâu你也關進去！」

「……」關吧！你就關吧！明鼎在內心嚷tén. M̀-ku，他還係退回炊事室。

他chhin恨！恨自家軟弱。應該lâu內心ke憤恨lâu決心表達出來chang係。自家sa膽細a像老鼠溜開！

他又退轉到宿舍。宿舍lâu拘留室毗鄰，拘留室ke聲響，liá片聽a清清楚楚。他行轉警察課辦公廳，想在值夜室底背「躲」起來。

M̀知樣仔，值夜室特別悶。他一不做二不休，就行到街hong來。去nai nò?第一ke念頭就係郭家，其次係「讀報社」，還有ke lâu同志約好ke祕密會唔地。M̀-ku,單淨思考一下，他都放棄lè.

今晡日係中秋節前一日。果餅店底背擺tén大細月餅。他身hong帶tén錢。他買下十個細月餅，他想無定著做得送進去……

時間還早，oi到na去nò ?他來到南苗「天雲廟」邊ke攤仔。M̀, chhin肚饑。他決心飽食一餐。

「來一碟細菜，還有一罐米酒！」他話出口chang發覺自家竟然點米酒。他無飲過一滴酒。

「一罐嗎？」

「嗯，一罐。」他講。頭家lâu 我看成細人仔嗎？他決定就飲一罐。

M̀-ku灌下一杯後，他就感到茫茫lè. 他kín食sit-pá菜。真m̀甘願，他再飲下一杯……

月光，án圓，án靚ke月光。月光nai久升上來ke nò ?明鼎m̀記得，m̀過他知該轉警察課lè. 嗯，自家還oi值夜nò ?

「啊！值夜！」

他用踉蹌ke步伐行轉警察課時，門口幾張模糊ke大面擋在ke片。他伸手進去，自家ke手sa pûn人抓tén lè ;另一隻手上ke月餅也pûn人奪下。

「做m̀得啊！我 oi pûn大阿哥……」

－－拍！拍！一下劈拍聲過後，麻麻ke感覺tui面頰頭頂散開。他清醒sit-pá lè.他ke胸口一緊，圓身忽然間騰空而起，然後vang倒在地泥hong.……

「M̀……M̀……」一陣陣呻吟聲。

「哎唷！哎……唷！」奇怪？樣仔還有慘叫聲？

明鼎抬起頭來。啊！額頭碰到－個床角。他發現自家眠在地泥hong, 半個圓身還潛進眠牀底nò !

「明鼎！你liá-ke傢伙害我值夜！……」

「你？喔，阿火……」他看清楚lè, 係同伴林阿火。

「得人驚，我 láu到你pûn人打死lè nò !」

「唷！」他呻吟一聲：「咦？M̀對？係 má人在慘叫？」

「鍾益紅又在……」阿火用指頭向拘留室方向一指。

他想起來lè.他掙扎爬起來。M̀-ku四肢百骸酸酸ke,就像oi拆開來 án-ngiòng；腰眼上沈沈作痛。他又眠下去，眠在值夜床上。 他全部想起來。Ke悽厲ke慘叫，一陣陣傳進耳公底背，鑽進心坎，沁入靈台。他，趴伏在牀上，不覺幽幽哭起來。

他知大湖郡一帶，lâu全台其他地區共樣，近來主佃之間，為到提高佃租問題，形成劍拔弩張ke局面。Ke 係因為苗栗糖廠ke「原料區域」擴大到大湖地區ke緣故。用水田種植甘蔗，對農主係有利ke ;田主做得比照製糖會社直營蔗園ke收益比例提升「細作料」(佃租)。Liá時節佃農反對，田主就要求「細作地引揚」(撤佃)。