《李喬小說─荒村》

 | | | 轉寄

三、無限江山 (5)

作者 李喬 漢羅翻寫：劉敏貞 2010.07.25

他萬分m̀甘心，m̀過也單淨好tak日躲在布行底背做學習量布、剪布ke勾當。M̀-ku, ke對目珠sa無tui周圍消失。因為「民豐」「民裕」兩家布行，三兩日必然有一ke或者兩個巡察來張望一下。他係報「流動戶口」住入來ke, 南苗警察派出所還係 lâu他喊去查問。

「你係大湖郡蕃仔林人？」巡查問。

「係。」

「你生父係劉阿漢？」
　　
「我阿爸係喊劉阿漢。」
　　
「一ke反日份子！」
　　
「……m̀知。」 　　

「你nò ?」巡查大聲亂喊。
　　
「我……我在學賣布。」
　　
「我問你係 m̀係也係反日份子？」
　　
「M̀……」
　　
「你知郭秋揚係má人嗎？」
　　
「商人。」
　　
「係文化協會ke首腦！你ngióng lâu他teû混在khiung-ha ?」
　　
「我在做布店伙計呀！」
　　
「做叛國賊ke伙計嗎？」
　　
「他m̀ 係叛國賊。」他講。
　　
「我講係，就係！你遽遽離開郭家布店！」
　　
「我 oi食飯。大人：Pûn我尋到頭路，我會離開。」

「？……」對方講m̀出話lè.
　　
「我，單淨係尋一碗飯食。」他內心得意ke kín笑：「做m̀得無職業啊。」
　　
「哼！製糖會社ke職位，樣仔丟ke, láu到ên m̀知？」
　　
「……」他感到一團火猛地騰上胸膛。
　　
Liá-ke三腳仔巡查還講chhin多。接tén一ke日籍ke甲種巡查也過來訓斥他一番。他chang深深警覺到：警方ke偵查係 án細密，他居然一舉一動全在鷹犬監視之中。原來自家ke身份，警方竟列為「重要份子」之一吧？
　　
情況嚴重，完全出乎意料。對一ke人世經驗淺薄ke二十歲青年來講，liá-ke壓力、震撼，差m̀多oi將他嚇昏啦。他提醒自家oi冷靜應付，m̀-ku雙腳雙股，無由ke大幅度顫抖起來。
　　
「Lâu你講！連你lâu細妹仔來往，我teû都有記錄。」
　　
「啊……」他脫口輕啊一聲。
　　
「樣仔？你還倔強？你必須隨時離開！」
　　
「……我，我 oi工作。」對方提到倔強，他想應該oi強硬起來lè.
　　
「堂堂高等科畢業，會尋m̀到頭路嗎？」
　　
「製糖會社辭退我，別ke機關也會吧？」恨火，已熊熊上騰。
　　
「哈！覺悟得好！」日籍巡查講：「覺悟na-ra，希望wa，有！」
　　
「大人！」他逐漸能夠坦然相對lè：「在民豐布行，學賣布，係犯法ke嗎？」 　　

「M̀……」對方猛地目光閃閃地：「M̀！m̀犯法！」
　　
「既然m̀犯法……」
　　
「好，你，頑固na-ra，住下去！你係無犯法。M̀過。你會犯法ke !」

無想到將話講僵lè. Liá下他內心已充滿昂揚鬥志。他就án-ngiòng離開派出所。他能明確感到一對對炯炯閃亮ke目珠，他真想轉回頭瞪一眼nò.

他無。他逐漸冷靜下來。冷靜下來，重頭檢視先前ke一幕，心頭沈重lè;對於自家ke事，他第一pái發覺，自家無能力做合適判斷或者處置。

「樣仔？阿鼎？」轉到布行，郭夫人緊問。

「無mak-ke. 單淨係東問西問定定。」

「我看，m̀簡單nò. 你定著oi lâu秋揚叔講。」

郭夫人長長透口氣，轉灶下lè. 郭夫人樣án-ngiòng想nò ?他猜 m̀出來。他決定lâu今晡日ke事故，報告郭先生，m̀過，他想保留警方命令他隨時離開ke話。

Liá日深夜，郭先生正tui三叉河(三義)轉來。原來ke片也發生土地「下拂」ke糾紛。

「阿鼎你講，樣仔？」聽他ke解說後，郭問。

「無樣仔，我想，小心一sit就對。」他故意講a chhin輕鬆。

「我想，避一避也好……」

「係講，我轉蕃仔林嗎？」他頭磬磬仔。

「Ke也無定著。」郭kín眨目珠，顯然在思考mak-ke：「像，設法pûn你另尋頭路。」

「我看，他teû準封死我 ke所有出路！」他係chhin煩勞。

「Nai有án簡單？到底liá片係台灣島啊！他teû能嗎？」 最尾郭先生表示：定著替他安排頭路，m̀過，可能到新竹，或者台中一帶，甚至可能更遠。

M̀-ku,他ke頭路，m̀使郭先生操心lè. 第四日朝晨頭，派出所ke乙種巡查又來尋他， lâu他帶到派出所。Ke日籍甲種巡查竟然先介紹自家：

「我喊池田吉也。」

「池田大人！」他單淨深深一鞠躬。

「你，今晡日起，做得離開郭秋揚ke布行lè.」

「哦？Liá ?……」

「Ên已替你尋好頭路：天光日，來liá派出所報到。」

「Mak-ke ?」他m̀知oi樣般chang好。

接tén池田lâu他講：郡警察課決定pûn他一ke「給仕」ke頭路；就在liá南苗派出所，或郡警察課底背任職。

「給仕嗎？大人，高等科畢業chang係給仕？」他尋到話題。

「巴卡！Liá係暫且ta表現良好na-ra，三隻月定著升為『臨時傭』，然後係『傭員』，甚至『僱員』……」

「還有『準社員』，『社員』？」他笑起來。

「M̀，你，野心chhin大」池田皺起眉頭。

Ke係會社ke編制，警察課，派出所，有嗎？」

「我講有，就有！」謊言拆穿，池田脹紅面講：「你，感謝？」

「感謝。M̀過，我 m̀想……」

「Na-ni ? Liá係命令！」池田勃然大怒：「Lâu你講，ko-re-wa,一種監視ta！覺悟！」

「不能拒絕嗎？」

「不能！除非你進拘留所！天光日八點整，拿tén寢食用具來報到！」

他垂頭喪氣行出分所。做夢也無想到，他teû會來án卑鄙又毒辣ke招式。

M̀-ku,也pûn他清楚看出：警方lâu他當做一ke人物對待。

「當然，你係ên ke新血！哈哈！」郭先生聽thet顛倒哈哈大笑：

「狗仔sa m̀了解：台灣還有無數反抗他teû ke新血nò ! 有ke像謝武烈、廖喜郎án-ngiòng內渡祖國，有ke像你共樣，留下來lâu他teû對抗！」

「秋揚叔……」他心頭亂糟糟。

「呵呵！阿明鼎：chhin fái-se啦，liá下……」

「Mak-ke意思？」

「係秋揚叔拖累你，你係洗也洗m̀掉啦！」

「秋揚叔你，樣án-ngiòng講nò ?」他有想要掉目汁ke衝動。 郭先生講liá-teû話ke時節，面頰、嘴唇泛起輕微ke抖顫；眼神複雜又深邃，好像係歉疚、憐惜，又像係憂愁、擔掛……

「我真m̀願意你án後生……」郭在自言自語。

「哈！講liá-teû做mak-ke ?」他搖搖頭：「又m̀係狗仔liá下能lâu 我拖去剁頭？」

「Ke m̀會，無án容易pûn牠稱心如意！」

「樣敢sat ?我看我溜走，好無？」

郭先生噗嗤一聲笑起來。Án-ngiòng一笑，他難為情起來啦。照郭ke看法係：能夠進入警察機關做「給仕」，係難得ke良機；幾多做得得到警方行動ke情報。Liá 值得去「臥底」lè. 郭講liá就係「臥底」。

「M̀-ku, 朋友啊！同志定著oi誤會我，我樣仔甘心替他teû……」

「Liá就係忍辱負重啊。你m̀肯忍辱負重嗎？」

他默然接tén郭先生交代他「訣竅」；盡量m̀ lâu文化協會ke人接觸，m̀-ku雙方有定期lâu特殊情況ke隱秘聯絡辦法。 Án-ngiòng,明鼎進入苗栗郡役所警察課擔任「給仕」；工役ke職務。

他pûn人指定住進警察局ke房舍。有三個共樣身分ke人住khiung-ha ;都係年紀相仿ke人。一下時間，他就tui他teû口中探出，他teû都承擔監視他言行ke秘密任務。

他teû ke房間，一邊毗連炊事間，一邊lâu像長廊ke大拘留室接在khiung-ha.拘留室，màng空過，常常人滿為患，他，日夜會看到他teû。

拘留室底背，有時還會見到認識ke大湖庄人，甚至鄉親。Liá, 成為他一ke痛苦ke擔仔，又更刺激他ke後生心靈……。 Liá下，唯一快樂 ke事係，兩禮拜有一pái無值日ke星期六。Liá時節他做得「自由行動」，還有機會lâu芳枝見面，甚至偷偷到人跡少ke郊區「約會」。他m̀敢想像，他做得享有約會ke甜蜜時光。但係，芳枝竟會答應，還熱情又大膽ke lâu他相聚。

有時節，他會有teû煩勞：芳枝，實在太大膽？一位高貴ke女學生，上流家庭ke千金，竟然án大方大膽？不論tui nai-ke角度看，芳枝lâu他所見所知ke本地細妹仔係無共樣lè.

在九月ke第二個星期日，兩人到龜山上見面時，芳枝竟然講： 「我無在乎別人ke眼光！我係敢恨敢愛ke細妹仔！」芳枝竟然講「敢恨敢愛」！

「M̀-ku……」他chhin想講teû婉轉提醒ke話，就係尋m̀到適當ke話。

「樣仔？你還猶豫嗎？」芳枝kín接tén常常提醒他ke句話：「當然不許你拿mak-ke配m̀上啦，自感形穢啦，liá-teû話來擺脫我！」 芳枝係正經ke. Ke細細圓面。顯得凜然不可侵犯ke樣仔。他kín笑。

Liá一笑，鬥a芳枝笑a滿面通紅，直躲入他ke胸懷底背。他輕輕擁tén芳枝ke嬌軀，雙手sa不由ke微微抖起來。芳枝啊芳枝，你係樣仔ke細妹仔呀？他沉思起來。

「芳枝……」

「M̀……」

「我在做狗仔ke『給仕』，真窩囊……」

「我知，阿叔全lâu我講lè.」

「假使長久下去nò ?」

「……liá都無所謂。我 m̀在意。」

「將來……你……」

「我就嫁pûn liá-ke『給仕』！」

「無oi！」他lâu芳枝輕輕推開：「樣仔能pûn你做給仕ke pû娘？」

「Ke, 你就轉去耕山園吧，我lâu你畜豬。」

「我做土匪nò ?」他逗芳枝。

「我就去做土匪婆仔！」芳枝圓圓ke大目珠án光。

「正經？」他腦海掠過一絲異樣ke感覺。

「當然。上山，下海，我跈你lè……」

芳枝：你對我 án好，你樣仔án好！我，我án心疼！我 oi樣仔做chang好nò ?芳枝，Oh，芳枝……他，chhin想oi哭。芳枝ke形象在他眼前不斷升高擴大。他，忽然間試tén自家chang面對一幅生份ke巨像；liá係chhin奇異ke感覺。

Liá係永生難忘ke一幕；liá一幕，也好像為他詭譎奇異、艱危多難ke短暫人生披上一襲多彩ke外衣……。

芳枝轉身行lè. 他企在ke片目送芳枝消失在南苗街口。芳枝離開時，丟下一句話，使他內心chhin難過。芳枝講：從六月十七日請假；堵好係「始政紀念日」演講會，校方尋她談過兩次話，就常常搜查她ke內務箱(她住學校宿舍)，看情形，校方在注意她lè.

當然，從更高更大ke角度看，liá也無mak-ke. M̀過，一ke大姑娘牽涉到liá類事務，總係chhin難向一般人解講ke吧。

「我無在乎別人ke眼光……」liá係芳枝ke豪語。郭秋揚ke姪女，畢竟係不凡ke.