《李喬小說─荒村》

 | | | 轉寄

三、無限江山 (4)

作者 李喬 漢羅翻寫：劉敏貞 2010.07.18

實際上，自去年八月間，參加文化協會開辦ke「夏季學校」(文化協會在大正十三年(1924)起連續三年，在霧峰林家「萊園」舉辦「夏季學校」，參加者合計三百零人。)以來，自家ke種種，老阿爸都心裏有數；單淨係擔掛lai仔 ke安危定定。

「Liá下，個人ke安危，算得了mak-ke ?」他內心時常án-ngiòng想。 　　

M̀過，想到阿姆，內心就隱隱作痛。
　　
係啦，一生辛勞ke阿姆，恬恬承受「好搭閒事」ke阿爸pûn她ke傷害；kín為子女榨盡ke阿姆，想到萬一自家也去坐牢，pûn她痛苦ke一幕，他實在m̀敢想下去…… 　　

他企起來。暮色已經悄然來臨。座落在綠竹叢中ke下蕃仔林庄，家家炊煙冉冉，sa接近茄苳樹下ke高崗上，還掛一片像夢ke夕陽。
　　
Án靚，án得人惜ke細山村。
　　
M̀-ku,liá-teû人活ke án艱辛，án黯淡無望！
　　
單淨係因為他teû 係台灣人！
　　
M̀,世界上ke勞苦大眾。都係 án-ngiòng！
　　
M̀,應該講，台灣ke勞苦大眾chang án-ngiòng！
　　
Má人能拯救liá海天一角無告ke子民？
　　
Má人能替liá一批默默認命ke荒村百姓申冤？
　　
他teû 係歷代pûn壓榨ke族類，他teû世代都係強權掠奪ke對象！mak-ke時節chang能過自tui自在ke日仔？……
　　
可憐ke 係，他teû án容易認命！他teû總在萌生反抗ke意念同時án-ngiòng認定自家係失敗ke一方；反抗，單淨係悲哀又可笑ke過程定定。一段絕無結果ke過程。


阿爸，劉家，就係其中一份子！

係嗎？係 án-ngiòng嗎？我劉明鼎nò ?失敗，也係我劉明鼎必然ke宿命嗎？M̀ m̀ m̀！絕對m̀！絕對m̀ 係！

Liá下係一個新ke時代，一ke má人都有成功有失敗ke時代，係我劉明鼎必然成功ke一面；問題就係時間遽慢定定。M̀過，時間，做得因人ke努力來改變ke,我劉明鼎ke作為；特別係今後ke作為，就係 oi促使勢態改變，成功早日來臨。我無個人ke野心，也無私人ke打算，我決心為解救台灣人獻身lè……

Ke，阿爸，你，同意我吧……

阿姆，我可憐 ke阿姆，你，容許我吧……

阿哥，姊弟，請你teû替我承擔我為人子ke責任吧……

明鼎他，m̀知mak-ke時節已經滿面清淚；坡道下ke西南風貼地往上捲，他ke目汁紛紛打溼。

他霍地一驚。模糊ke眼前好像有人影晃動。他kín用袖管拭面。

「阿鼎，你做mak-ke ?」係大阿哥ke聲音。

「無。大阿哥，大阿嫂。」他sit-pá fái-se.

「三叔，你án烏呦。你m̀係坐橫桌ke嗎？」阿嫂講。Ke嗓音，chhin悅耳。

「近來你常轉來？」大阿kín接tén問。

「嗯。近來較有閒。」

大阿哥朝他看一眼，又看看後背ke阿嫂。阿嫂肚屎凸起，看起來oi kiung lè,還日夜跈男人上山下田，唉！

大阿哥企在伯公廟前m̀動。阿嫂隨時瞭解意思，遽步搶前，上kia行lè. Liá時節大阿哥chang講話：

「逐pái見到你，都感覺你心事重重。」

「無。有mak-ke心事？」他面頰一熱。

「聽講你認識一ke喊芳mak-ke ke細妹仔？」

「Má人講ke！」他，張嘴瞪眼。

「阿爸講過。當然，你m̀會為到mak-ke芳ke在煩惱吧？」大阿哥笑a chhin好看。

「係喔。大阿哥看我，係嗎？」

「其實，我知。」大阿哥面色一沈：「你lâu阿爸行同一路線，對吧？」

「大阿哥你？－」

「其實……其實，我心裏何嘗m̀贊成阿爸ke理想，單淨係……」

「單淨係；大阿哥，你也莫胡猜亂講！」

「……」大阿哥ke眼色掠過一絲黯然，恬一下chang講：「其實我……唉！」

「大阿哥，我單淨係好搞，有時間去看看，聽聽……」他ke話停住，內心有個聲音叱責他：你無講實話！

「阿鼎，樣仔做，我 m̀想講你，管你……」

「大阿哥你樣仔án-ngiòng講！」

「我係講：樣仔都好，你單淨oi記住：無好pûn阿姆太傷心就好。」

「歐……」他遽遽往上kia行去，當做無聽清楚。

大阿哥！大阿哥ke話竟然在他心口上狠狠戳上了一刀！好像大阿哥已經聽到自家先前心裏ke話定定，大阿哥，你樣仔liá-ke時節會講án-ngiòng ke話？

「阿鼎，你樣仔m̀講話？」大阿哥kiuk上來。

「我……唉！無mak-ke啦！」他有teû譴。

「我知你m̀願意談。我單淨係提醒你。」

「大阿哥，你liá-teû話，莫lâu阿姆提起。」

「M̀會。單淨lâu你講，提醒你；你既然驚阿姆知，ke就好。」 大阿哥án厲害lè. 他在心裏講。他lâu話頭扯開。大阿哥也無提ke方面ke事。M̀過，講tén講tén,又講到土地「拂下」ke問題。Pûn他驚奇ke 係，大阿哥居然對文化協會ke事務sṳt當多；甚至在南部

「蔗農組合」ke事也知。

「阿爸lâu你講liá-teû ?」他係嚇一下。

「阿爸chang無oi講liá-teû nò.」

「Ke,nai聽來ke ?」

「記得，我 lâu二哥也聽過幾pái文化演講啊。」

「喔……」 　　

「你二哥chang想oi試看na. 還有，彭家兄弟、許家後生都去聽過。」
　　
「Liá……」
　　
「明成他，還想將城隍廟ke一本書，弄轉來lè !」
　　
「你講係『讀報社』？你teû去過ke片？」
　　
大阿哥ke話， pûn他驚到lè.大阿哥還繼續談。Liá下除thet驚到以外，他還十分憂心。大阿哥二哥年紀比他大，也lâu阿梅伯讀sit-pá漢書，m̀-ku總還係山村篤農定定；萬一也lâu阿爸，或者自家共樣m̀顧一切地「投身」nò ?Ke時阿姆、大妹，還有màng出世ke… 　　

「阿鼎，你嚇到啦？」
　　
「嗯。我嚇到lè.」他坦白講。
　　
「放心，我 lâu明成，m̀會跈tén去串，去鬧。」
　　
「M̀ 係鬧。」他隨時糾正大阿哥。
　　
「我，緊緊抓住土地定定，我 m̀管其他。」
　　
土地！土地，你大阿哥抓得住，把握得住嗎？就係因為敵人oi來搶ên ke土地，故所ên chang起來反抗啊。他無將內心ke吶喊講出來。他有teû放心lè;大、二哥，最多單淨係將來ke「抗暴」定定，m̀會有大ke罪狀。他想。大阿哥ke一句話sa又pûn他嚇一下： 　　

「Liá下蕃仔林ke後生人，都知你也行阿爸ke路仔。」
　　
「有liá種事？」

「當多人看到你常lâu ke位姓郭ke行khiung-ha.」

「……」他搖頭。他開嘴m̀得。

「單淨有阿姆pûn人蒙在底背定定。阿明鼎……」

他阻止大阿哥再講嚇去。他心頭亂糟糟，他係 oi好好檢點反省一下lè.

「注意你ke頭路，總有一日，你會丟掉頭路！」大阿哥又講。

他無再搭腔。轉到山底背ke屋家，他盡量裝成無mak-ke事情，還尋teû話lâu阿姆閒聊。阿姆最恰意lâu他liá-kepun5大家認為「最有知識」ke lai仔閒聊。M̀-ku,談話中，他一pái又一pái因思緒遠颺sa接m̀上腔。好加在阿姆講a興高采烈，無發覺他ke異樣。他不覺痴痴ke凝盯阿姆漾滿笑意ke慈顏……

我 oi清楚確切記下阿姆ke音容，pûn阿姆ke音容刻印在心田腦海，有一日我必須遠離阿姆ke時節……他想。

他失眠一夜。第二日起來後，他忽然間有一份奇異ke感覺，好像自家oi遠離家鄉lè ; liá係 mak-ke心緒nò ?當他企在籬笆門ke時節，伸出去推門ke右手，竟然微微抖顫tén.

「一切細心。」阿爸ke聲音tui後背傳來。

「我會。阿爸你m̀ 係也oi上街嗎？」他問。

「你先行；記住我昨晡日下晝ke話。」

「會。」他跨出籬笆門，向陡坡行去。

「後日，我會去看你。」

好。父親。他在內心喊一聲。奇怪，他總係稱呼「阿爸」ke, 樣仔今晡日忽然間喊出「父親」nò ?喔！阿爸，我敬愛ke阿爸，我受盡苦難ke阿爸啊！他，內心狂喊狂吼起來。

他走lè. 第四日臨暗，阿爸chang到達苗栗郭家。阿爸ke面頰上，「又」有烏青紫紅ke傷痕。他liá chang知阿爸所謂「例行報到」，原來又係一下毒打。

阿爸還lâu他講：大南勢豎起標語，表示抗議ke群人，都pûn請到大湖警察課lè ;當初本旦單淨命阿爸一人去報到定定。

「李勝丁ke畜生下手，對m̀對？」

「Liá-pái苗栗ke鍾益紅也來大湖lè.」

「夭壽畜生！看我有一日！」他囓牙講。

「Liá種事，莫放在心上。」

阿爸lâu郭先生談話時，他也在場。Liá-pái除thet商量他ke工作以外，又談論農民運動問題。

「Ên ke工作重點轉向農村lè, 文化協會也有改變。」郭先生講。

「我單淨關心佃農、蔗農liá-teû.」阿爸講。

「南部農運，特別係蔗民組合成立後，效果chhin好。」

「你講過，ên……」

「嗯，ên也無落後。還有蔗民組合將擴大，將容納所有農人。」

「農民組合？」阿爸講。

「對。應該遽遽改為農民組合。唉！Ên oi學ke 太多lè.」
　　
「……」阿爸匆匆瞥他一眼。
　　
「我有一ke構想：將來大湖地區，假使成立農民組合……」
　　
明鼎chhin專心聽，注意力sa無法集中。他有teû thiong, 又更驚奇。他實在màng意料到阿爸liá位窮山老農，在郭先生眼珠底背竟有一定份量。
　　
一方面，他也替阿爸煩勞，阿爸係完全投入lè. Ke係義無反顧，也做m̀得回頭ke投入啊。他凝視阿爸ke側面，不覺失神。
　　
阿爸，監獄出來時，頭那毛大量脫落lè.五十五歲，到達全禿ke年齡lè嗎？他m̀知。Ke光禿ke頭蓋上，竟出奇ke白底透紅，看來好像細ô-ǹg仔 ke肉色。他見過別ke禿頭，m̀係 liá種顏色。阿姆講阿爸從細係「臭頭」；自五年監獄出來後變成禿頭ke. 自家幼年時阿爸ke頭那毛像ô-ǹg仔，記憶已經無清楚；印象底背，阿爸係一個禿頭，sa對他ke ô-ǹg仔肉色ke禿頭，總係萌生一絲驚驚ke感覺。
　　
有時節，他係極冷靜ke人。冷靜中，發覺阿爸深深陷入，好像係不知不覺，或者係欲罷m̀能ke. 阿爸係不知不覺ke嗎？
　　
Liá下，他強烈想oi促使阿爸，或者逼阿爸再冷靜一下。他有teû不滿郭先生lè,做mak-ke將阿爸……
　　
「我來代替阿爸吧！」另外一ke意念升上來。
　　
係阿，我係第三ke ;大、二哥已經長大成人，還有兩個老弟，萬一有一日……也無所謂。他常常án-ngiòng想。
　　
郭先生強留阿爸食過當晝飯chang行。在飯桌hong談到謝武烈、廖喜郎兩位返轉祖國原鄉大陸升學ke事。阿爸頻頻回頭看他。他知阿爸ke意思。阿爸ke羨慕又痛苦ke神情，使他差m̀多oi衝過去，兩子爺抱頭痛哭一場。
　　
「Liá係後生人，最好ke一條路lè.」阿爸講。
　　
「嗯。」郭先生看他一眼：「M̀過，目前，在島內，更需要青年後生。」
　　
「郭兄，我有一句話，m̀知樣仔講好m̀好？」阿爸講。
　　
「你講！Ên同志，還有mak-ke 做m̀得講ke?」
　　
「就係，就係我liá-ke細人仔……」阿爸總算明講lè.
　　
「明鼎他？」郭先生有teû茫然。
　　
「我係講，liá細人仔chhin衝動，年紀又細，實在……」
　　
「我知老哥ke意思。Ên, 特別係我個人，定著會盡力保護他。」
　　
「我 ke意思係，無好，暫時無好pûn他進入太深。」
　　
「喔。」
　　
「特別係，直接民運工作，無好pûn他……」
　　
「老哥，liá-ke，m̀過請放心，我單淨pûn他接底背ke雜務定定。」郭先生直直ke瞪住他：「有teû事情，我再三提醒他，oi他冷靜思考，無好草率接受，或者決定。」
　　
「他；阿鼎，你？」
　　
「我無樣仔啦。」他緊緊否認。
　　
「我 m̀ 係講他已經……我係舉例講。」
　　
「老實講，ke……我 m̀贊成。我也……」阿爸斟酌一下chang強硬地講：「也，也m̀好pûn阿鼎惹上。」
　　
「我知……」
　　
「郭兄：文化協會，還係單單純純；用社會，文化方面，加上指導農民；無其他ke吧？」阿爸話鋒一轉。
　　
「基本上，係 án-ngiòng. M̀過，形勢在變，文化協會也在變，má人也阻止m̀得。」
　　
「我也感覺到，我chhin煩勞，故所我問你……」
　　
「Liá-ke，老阿哥，你m̀使管；反正你又m̀ 係文化協會ke正式會員。你就做你理想內ke事，管他文化協會變左變右，ên做ên ke.」
　　
「係啊，係啊。」阿爸講。顯然ke內心並m̀滿意。
　　
「無定著，我自家就有一日會拋下協會ke事務nò.」郭自言自語。
　　
他感覺出來，阿爸內心chhin沈重。係 ke, 阿爸老早就有所警覺lè.可憐他老人家，在根本理解上，已然受到限制lè ;老人家係 m̀會清楚文化協會實質上發生變化ke根源。
　　
事實上，插手農運以後，文化協會就m̀係本來面目lè.阿爸sa熱心在農運。
　　
他想，有一日，他oi向阿爸解說liá-ke道理。Liá下，兩子爺都oi勸阻對方m̀好「陷入太深」，實際上都在不斷陷入。他單淨苦笑。為到安慰阿爸，在阿爸離開時，他主動講：
　　
「我知阿爸ke意思，我會小心。」 　　

「正經知？」
　　
「知。阿爸你也……」他竟án-ngiòng講。
　　
「我係山村老農，我 m̀會管太多……」阿爸目光炯炯，ke講出來ke意思全在ke片。
　　
阿爸轉去lè. 郭先生喊他到樓棚上，好像oi講mak-ke,m̀-ku沉吟不語。最尾竟講：
　　
「你在布行底背見習見習吧。賣布，係大學問nò.」
　　
「好。M̀-ku……」他還有話oi講。
　　
「別ke事，目前莫講。多讀teû書，知無？」
　　
他有teû譴。Chhin明顯，郭先生對自家ke態度有變化；係對自家ke期望改變lè嗎？抑係 lâu阿爸ke一場話，他埋怨起來。
　　
當然，阿爸係愛自家，關注自家ke安危，故所……
　　
M̀過，liá一來，自家就係單淨乖乖做一ke布店ke學徒。一ke堂堂高等科畢業，二十歲ke青年，單淨做一ke賣布ke學徒？
　　
他chhin想oi立刻翻身離開「民豐布行」。
　　
Liá片係一個細廳下。一ke木板底ke「半樓」，係儲藏雜物ke空間，郭家sa lâu它整理成細廳下。在東片牆邊五斗櫃底背，他知破布團底背秘藏十幾本書：日文版ke,有關社會運動lâu社會主義方面ke著作。
　　
他單淨匆匆看過幾本。他早想好好研讀一番。郭先生oi自家多讀書，係m̀係有意ke安排nò ? Liá-teû書ke隱藏處，都係先前郭先生lâu他講ke.
　　
Án-ngiòng，就住一段時間吧。他想。
　　
「Liá-ke決定，單純嗎？」內心，好像有一ke揶揄ke聲音。
　　
當然。他應自家。係當然嗎？又再問。他應m̀出來。
　
Nai有án單純？你ke心事又何必連自家都oi隱瞞nò ?你係假作無事，或者假作連自家都m̀清楚án-ngiòng,lâu ke chhin「見笑」ke情愫隱起來啦。
　　
你一開始係chhin樂意住在郭秋揚先生屋家ke. 因為郭秋榕先生屋家在隔壁。Án-ngiòng夠清楚lè吧？
　　
「無m̀對，我係想藉機接近芳枝……」最尾他單淨俯首認「罪」。
　　
事實上，liá段日仔底背，lâu芳枝坦誠，自然地；oi樣仔講好nò ?她，芳枝係明確表示兩人之間ke關係lè. Liá夠lè. M̀ 係嗎？
　　
「戀人」！呵呵！liá係不得了ke呀！

「故所，劉明鼎啊，你決心做布店學徒，大部分理由，只係為到lâu芳枝見面」Liá係chhin pûn人眼紅ke結論。
　　
M̀-ku,芳枝會樣仔想nò ?她ke戀人，堂堂男子漢劉明鼎，只係一個布店學徒？莫m̀記得，自家已經失業，一ke失業ke鄉下人，樣仔去lâu高貴ke芳枝論交nò ?喔，失業ke人……
　　
Án-ngiòng想，他又決定離開lè.
　　
又係土曜日(禮拜六)。又係芳枝轉屋ke時節。他想口頭上ke解說，怕無機會，他隨時寫好一封信，準備一見面就交pûn芳枝。
　　
Liá-ke土曜日芳枝無轉屋。他顛倒冷靜下來。他決定等到見到芳枝，看她ke神色態度chang做去留ke決定。Liá下，他已經決定ke係：自家絕不能單淨係一個布店學徒定定。為到lái點，他煩勞到食m̀落睡m̀得，他試tén在苗栗街胡亂ke尋頭路。
　　
他也利用有閒ke時間，溜到城隍廟「讀報社」看a ;在ke片會見到認識ke朋友，án-ngiòng,心情會開朗teû.
　　
M̀-ku,一眨目，他發現有兩隻目珠在後背發光，或者在左右閃亮。他悚然。他知ke係 má人ke目珠。