《江嵐客家文學專欄》

 | | | 轉寄

Yi̍t-cham...驛站

作者 Kông-làm...江嵐 2008.04.27

listen



Yá-chhòng yí lo̍k-lòi hàn-thai
這場雨落來還大
Hò-pa-sùn ke kûng-kie màu-liàu ti̍t-ti̍t-ta̍p-ta̍p
河壩唇ke公廨茅寮滴滴溚溚
Chet-làn chhiong liù-súi yong-é ke ki-yit
澤蘭像流水樣仔ke記憶
Sâm-chheù-ngièn-ló me mò-fap-thu phài-kié ke siuk-thì
三朝元老乜無法度排解ke宿題
Oi yung má-kaithu-liòng yá sṳ̀-yí-sṳ̀-chhiâng ke thiên-sṳ̀
愛用麼个度量這時雨時青ke天時
Hò-pa-súi nùng- nùng-nung-nung ngiam m̀-voi-su̍t
河灞水噥噥噥噥唸m̀會悚
Chhôi Si-la-yà ke thú-thi-song
在西拉雅ke土地上
Khon-tó siên-mìn thai-mà-lia̍p-kú ke hon
看到先民大嫲粒牯ke汗
He sîm-sôn ya-he kiâng-sîm
He心酸　也he驚心
Ngiap-lang chhôi chṳ́-sṳ̀ ke thiên-táng
聶爧在子時ke天頂
Chhiong yit-chak ok-khià-khià sài-lòng lie̍t-chhṳ́ ke koai-chhu
像一隻惡擎擎豺狼裂齒ke怪獸
Lùi-kûng piang-piang-kún nau-mò-thìn
雷公拚拚滾鬧mò停　
Thàn-thiau chhôi thiên-piên hói-sùn
彈跳在天邊海唇
Â-li̍p-chú fa-cho súi-thí kong-lìm
阿立祖化做水體降臨
Hiong-phò yung chû-yòng mí-chiú hiet-chi thiên-thi
向婆用豬羊米酒血祭天地
Si-la-yà ke chṳ́-mìn fùn-yù si-hói
西拉雅ke子民魂遊四海
Kô-sâng kín-lòi kín-yén kín-se-sâng
歌聲緊來緊遠緊細聲
Sṳ̂n-song liù-tén phiàng-phû-chhu̍k ke hiet-thúng
身上流等平埔族ke血統
Chhìm-m̀-tò chú-lìn ke vi-só
尋m̀到祖靈ke位所
Ká-sṳ́ yá he yit-ke yi̍t-cham
假使這he一個驛站
Ngài kâm-ngien chhôi yá tén ngì
我甘願在這等你
Tén ngì tai ngài chón-hi ke-vi
等你帶我轉去該位
Yû Â-mê-fa ke só-chhai
有阿姆話ke所在