《江嵐客家文學專欄》

| | | 轉寄

《阿婆个菜園》到底種了恁多麼个?

《阿婆个菜園》liá本客語散文集,he客華河洛三聲道作家江秀鳳先生ke第二本散文,前一本河洛華語對照ke散文集《薰衣草姑娘》,帶等溫馨ke筆法,熟絡優美ke河洛語文,低言細語描寫佢ke所見所聞,既經pûn人當驚艷。Ko看這本客華散文集,除忒江先生一旦ke溫馨路線,更加上醹醹感情ke標準客家阿姆話,知性感性將為人子女、為人爺哀ke柔軟心腸,lâu為台灣族群語言、為土地文化發聲ke責任心,一一表現到這本《阿婆个菜園》書中。細細品讀,正知自家祖傳ke客家語言文字,竟然he恁靚、恁有內涵、恁感動人ke文化之寶,一息都m̀會輸華語文世界ke作品,pûn人收獲無窮,讀到會尋尾(意猶未盡)。

江先生又he一位詩人,佢ke華語詩集《逗點》,lâu客語詩集《詩畫家鄉》,表現出詩人多愁善感ke心思。跈等(跟著)詩人ke詩路,分人醉在故鄉ke歷史土地項,讚嘆心靈饗宴之美。 在台灣多元文化ke花園中,做得正經客華河洛三語聽、說、讀、寫皆精通,又做得ko為文出書筆耕不斷者,鳳毛鱗角少之又少,江先生就he難得ke其中一位。正經he行在台灣多元文化ke花園中,為台灣文學添色ke一位耕耘者,樹立各語族互相欣賞、互相學習ke好榜樣。 盡多人認為,文學家一定he有錢子弟,食飽閒綽綽日日過家料,正有恁多閒情講天缺。其實mò定著,閒情lâu錢無關,應該講,文學家有一個像細人仔ke天真、像阿姆ke溫柔,加上細心細意ke觀察、熱愛生命ke感情,還oi有一支正直ke筆、抽間(積極)ke行動力,正能寫出一篇篇觸動人心善良面ke文章。

江先生「自家mò飯食,愁人mò菜嗙(póng)(配飯)」,m̀單只愁寒天ke揚擛仔(蝴蝶)無屋邸(住),還愁客家語文mò將來,故所佢用客家母語寫詩、寫心情、寫故事,oi傳揚客家語文傳pûn台灣各族群。一篇篇ke故事,就án-ngiòng呈現到ên ke面頭前pûn ên欣賞。

你he講:「ngài正頭一擺看客語文,樣會知得這本書,正經有你講ke寫到恁好?」該ngài再lâu你講,佢在幾下間大學,教語文研究生學客語文,既經教出當多優秀ke客語文文學家種子。還有,舊年(2007)佢在台南縣文化局辦ke〈南瀛文學獎〉拿客家新詩同華文詩、河洛詩共下比賽,得著新詩首獎。其他還當多,像阿却文學獎連兩年得大獎。Án-ngiòng ên就知,江先生ke客家語文,正經看得,拿到外背去lâu大家比,絕對m̀會lâu客家人澇潰(漏氣)。當然江先生本人,總he當謙讓ke緊講:「無影啦!無影啦!學寫ke定定,還愛大家多批評、多指教、多相惜,ngài正會進步,也望大家共下來,耕耘客家文學創作。」

用華文寫ke客家文學盡多,像《魯冰花》、《原鄉人》、《笠山農場》、《亞細亞孤兒》、《臺灣三部曲》、……,儘採(隨口)唸唸就三大籮,唸到明年割冬禾還有一大拖囉。客家籍文學家還卡多,多過鯽魚過河。M̀過,用純客家語思考、純客家文字做文學創作ke文學作家,老實講,同客家籍華文作家比較,正經有忒少,值得ên客家人深深ke思考檢討,正經還愛大大ke加油。

今江先生,既經跈等客家前輩ke腳跡,行出一息仔成績,希望看過這本客語散文ke朋友你會發現,想愛寫一篇客家文其實m̀會難,就單淨上家下屋打ke嘴古,或者叔婆伯姆理家教大細講ke話語,lâu佢拈拈揪改用阿姆話寫出來,就he一篇篇當有智慧當有內涵ke客家文,桌頂一放,就會像頭擺阿太,用手指的( diak 指甲彈物)龍銀共樣,嗡~嗡~嗡~響無停,值啊!

盡尾,還有一個鼓勵大家共下來寫客家文ke好消息,聽講在客委會ke帶動下,連河洛人都來寫客家文矣。江先生教ke當多河洛學生仔,乜當熟絡用客語文寫客家文學,大家都恁樂力、大家都恁相惜,ngài當感動也當承蒙恁多mò共語族ke後生人,對多元文化ke相惜lâu支持,ên he客家人,聽、說、讀ke基礎mò問題,只愛肯寫,乜一定做得到。

倒轉來看一開頭提出ke問題,〈阿婆ke菜園到底種了恁多麼个?〉ngài lâu你講,阿婆ke菜園種ke he——客家ke智慧、客家ke堅耐、客家ke好心腸,還有客家文學ke希望。

2008年11月14日在油桐花童話森林學校