《油桐花ke思念》

 | | | 轉寄

理想ke熱度...Lî-sióng ke ngie̍t-thu

作者 Hiû Yit-fàm....邱一帆 2010.10.10

Yit-ya ko yit-ya

一夜過一夜

chhai thien-sṳ-kî ke theù-chhièn

在電視機ke頭前

m̀-phan-tet soi-muk ke ló-ngìn-kâ

m̀盼得睡目ke老人家

chún-tèn thien-sṳ-tú ke sṳ̂n-yáng

準等電視肚ke身影

khì-mong lòi-yit-pái chîn-sṳ̀n ke ôn-vi

期望來一擺精神ke安慰

Yi-ngit ko yit-ngit

一日過一日

chhai thien-nó ke yáng-mu-chhièn

在電腦ke影幕前

mò-sióng oi thu̍k-sû ke chhiâng-seu-ngièn

mò想愛讀書ke青少年

khim-tén sú-chṳ́ ke khien-phàn

撳等手指下ke鍵盤

phan-mong lòi yit-chhòng sîm-lìn ke keû-thûng

盼望來一場心靈ke溝通

Yit-ngien ko yit-ngien

一年過一年

chhai chiu-chok ke mien-táng-kô
在酒桌ke面頂高

thai-mà-kú-sâng lî-sióng ke heu-sâng

大嬤牯聲理想ke後生

tân-chhiang kí-pî-é mí-chiú-theù

單淨幾杯仔米酒頭

ngiàm-piên tiet-lo̍k hien-sṳ̍t ke fan-chen hâ

黏邊跌落現實ke飯甑下


Ngài ha̍p-hí mò-nai-ngìn-sên ke sû-pún

Ngài合起無奈人生ke書本

thèn-thén âm-pû-ya ke ngiet-kông

跈等暗晡夜ke月光

kiak-kiak hàng-chón sû-chok-yí mien-chhièn

遽遽行轉書桌椅面前

mong-sióng siá-chhut yit-tiám lióng-tiám ke hî-mong

望想寫出一點兩點ke希望

——liù-pûn sṳ-kiên——

——留pûn世間——

chhai liá-ke khon-m̀-tò vi-lòi ke sa-fi

在這個看m̀著未來ke社會

ki-chhie̍t yung pên-pên hien-sṳ̍t ke chhak-thu

拒絕用冰冰現實ke尺度

loi chhong-liòng seû-seû lî-sióng ke ngie̍t-thu

來丈量燒燒理想ke熱度

Mak-kai

麼个

sên-sùn he hien-sṳ̍ ke thiàu-kien

生存he現實ke條件

Chún mò thâng-ko

準mò聽過

Mak-kai

麼个

hien-sṳ̍t ha sên-sùn ke muk-tit

現實he生存ke目的

Chú mò khon-ko

準mò看過

Tân-chhiang tai-tén mò ngìn khon-hí ke lî-sióng

單淨帶等mò人看起ke理想

yúng-kám hiong-chhièn-hàng

勇敢向前行