《油桐花ke思念》

 | | | 轉寄

Ên lòi hi hò-pa...Ên來去河壩

作者 Hiû yit-fàn...邱一帆 2009.03.29

Ên lòi hi hò-pa
Ên來去河壩
Lòi hi hò-pa
來去河壩
Khon ke sâng-nun ke ngiòng-fâ
看該生嫩ke娘花
Sun-tén chhûn-fûng
順等春風
Pheû-lòi-yeù-hi
飄來搖去
Yeù-chón kú-ló ke theù-pài
搖轉古老ke頭擺
Ke khoi-chun chok-pî ke ku-sṳ
該開圳作埤ke故事
Kiok-theù pun-kî
钁頭糞箕
Tiám-tiám hon-súi
點點汗水
Yit-mien kói yit-mien phà
一面改一面耙
Sat-mâng lòi cho yit-sên-ngìn
煞猛來做一生人

Ên lòi hi hò-pa
Ên來去河壩
Lòi hi hò-pa
來去河壩
Khon ke thiau-phì ke miòng-fâ
看該跳皮ke芒花
Thèn-tén ngie̍t-fûng
跈等熱風
Yeù-lòi-chhôi-hi
搖來吹去
Chhôi-chón ló-theù-pài
吹轉老頭擺
Ke chóng-ngiù káu-súi ke thùng-ngièn
該掌牛搞水ke童年
Yit-ha káu yit-ha liau
一下搞一下料
Chhóng-khuai lòi ko yit-chu-piên
暢快來過一晝邊

Ên lòi hi hò-pa
Ên來去河壩
Lòi hi hò-pa
來去河壩
Khon ke mòng-mòng ke ngiòng-phò
看該茫茫ke娘婆
Sun-tén chhiû-fûng
順等秋風
Chhôi-lòi-pheû-hi
吹來飄去
Pheû-chón theù-pái
飄轉頭擺
Ke kiú-ngie̍t fûng-chhâi ke cheû-sṳ̀n
該九月風颱ke朝晨 Súi tá hò-pa-thièn
水打河壩田
Thièn-hong thai-súi-chheù
田項大水樵
Yit-phién kieu yit-phién seù
一片噭一片愁
Pûn ngìn sṳ̍t-soi ya m̀-tet
Pûn人食睡也m̀得

Ên lòi hi hò-pa
Ên來去河壩
Lòi hi hò-pa
來去河壩
Khon ke kiên-nai ke ngiòng-fâ
看該艱耐ke娘花
Thèn-tén hòn-fûng
跈等寒風
Pheû-lòi-yeù-hi
飄來搖去
Yeù-chón yî-chhièn
搖轉以前
Ke hàm-chhoi lò-phe̍t ke sên-fa̍t
該鹹菜蘿蔔ke生活
Sa̍k-theù-mien yû â-phò sai ke hàm-chhoi-kôn
石頭面有阿婆曬ke鹹菜乾
Sa̍k-theù-mien yû â-mê sai ke lò-phe̍t-chhièn
石頭面有阿姆曬ke蘿蔔錢
Yit-ha fûng yit-ha yí
一下風一下雨
Hoi ngìn cheú chhiu m̀-tet-chhat
害人走就m̀得掣

Ên lòi hi hò-pa
Ên來去河壩
Lòi hi hò-pa
來去河壩
Hàng to ho-pa-sùn
行到河壩唇
Ngiâm yit-ke pién-pién ke sa̍k-kú
拈一個扁扁ke石牯
Tá-hí chiâng-chiâng ke súi-phiu-fâ
打起靚靚ke水漂花
Ngiàng-chhiáng hò-sṳ̀n tiâm-tiâm-é lòi kóng
迎請河神恬恬仔來講
Ngìn lâu chhṳ-yèn ke ku-sṳ
人lâu自然ke故事