《客家消息》 |
![]() ![]() ![]() |
由客家委員會lâu鏡文學合辦「當代客語創作計畫」ti五月十六號舉辦記者會,邀請小說家李旺台、甘耀明、高翊峰,散文家吳鳴、張郅忻,詩人羅思容、張芳慈,分享創作歷程,kì teû未來會以一年ke時間創作客語文學,創作成果ti 115年發表。客委會主任委員楊長鎮表示,語言形塑人對世界ke認知,ên做得用阿姆話創作文學,正做得lâu ên自家ke語言、文化流傳下去。
楊主委講,「當代客語創作計畫」特別邀請七儕老中青世代出名作家,用全客語創作詩詞、小說,liá發想來自十四to十六世紀ke西方文藝復興,lâu母語創作tui拉丁文解放出來,同ti中國ke五四運動下,華語tui文言文ke捆索2得著解放。感謝所有創作者參加liá項計畫,vi tó pûn客話m̀ he古老ke想像,oi還啊多人響應用客話創作,激發新文學生命力,阿姆話正yû辦法延續下去。
本計畫he客委會頭一擺推動ke全客話創作計畫,由利玉芳擔任計畫主持人,聘請陳萬益、彭瑞金、范文芳三儕先生擔任計畫顧問,第一波邀請名單經文壇資深文學創作者討論後選出,未來將會持續擴大辦理,感謝先前既經用客話創作ke作家,除忒本計畫邀請ke創作者,未來假使yû好ke客語創作作品,me會評估納入出版計畫。