《江嵐客家文學專欄》

| | | 轉寄

阿榮ke心事

  在一個艱苦ke山窩肚,有一間細細ke工寮,pûn漫天ke相思樹掩揪揪,全看m̀著屋跡,工寮肚核一對孤兒。

  阿榮同菊妹,讀小學ke時節爺哀就mò在身邊矣,兩姐妹mò親mò故,mò奈好去,就在阿爸留下來ke工寮核,阿榮今年十二歲,熱天時節就oi小學畢業哩,讀國中對佢來講he一ke當大ke變化,學校報到、註冊、新制服、食當晝,做盡he阿榮盡大ke考驗,屋家又有一個一年生ke老妹菊妹oi照顧。阿榮心肝肚想:he m̀升學,下二擺難尋頭路,he oi升學又m̀知oi去奈生錢。阿榮想來想去愐mò計,心情煩燥,就同菊妹講:「阿哥oi去山頂項,你oi乖乖在屋家,m̀好亂走知mò?」菊妹臥起頭看等阿哥ke面矯(khièu)講:「Ngài me oi去!」阿榮跍下來安慰老妹:「菊妹,麼儕he盡乖ke細人仔呢(nó)?」菊妹遽遽天真回答:「當然he ngài呀!」阿榮就講:「He呀,菊妹he盡乖ke細人仔,故所oi聽阿哥ke話,你講著m̀著啊!」阿榮挲等菊妹ke頭那,笑笑仔講pûn菊妹聽:「雨正落仔過,山頂當崎路又滑,山項又有蛇哥,這擺你m̀好跈,下二擺正帶你去,好mò?」菊妹為著oi做一個盡乖ke細人仔,只好答應阿哥,這擺mò跈。

  阿榮帶一隻布袋、一隻笱(hò)仔,還有一支禾鐮仔就oi出門,斡頭同老妹講:「菊妹,等下肚饑ke時節,屋側角有烳好ke番薯先拿去食。」菊妹聽著,遽遽走入去擇兩條較大條ke番薯拿pûn阿哥:「哥,你m̀記得帶番薯哩,這兩條較大條,你帶等路項好食。」阿榮看老妹恁曉得,就笑笑仔lâu番薯放落袋仔肚,行等出去,行mò兩步腳就聽著菊妹講:「哥,你去山頂高,he有看著靚靚ke花,oi記得摘轉來pûn ngài唷!」阿榮大大聲應好,腳步煞煞向前行等去。

  阿榮來到峎頂ke大石牯項坐等,看等遠遠ke山腳下,闊洋洋ke平洋地,一槓一槓ke屋仔起到拶拶。佢想,逐間屋肚就有爺有哀,有親人好相惜,寒天來ke時節,me有燒暖ke溫情做得偎靠,這下自家一儕人mò爺mò哀坐到這,身邊mò半儕人使得參詳,緊煩惱oi讀國中ke事情,心肝肚mò安mò樂,愐著這件事情「膝頭就會出目汁」,看等山阿鵲對頭那頂飛過去,me mò心mò性。落雨過後ke山景,pûn雨水洗到當靚,天頂浸青,雲特別白,鳥仔飛來飛去出竇尋食,滿奈就聽著吱吱喳喳ke鳥仔聲,阿榮今晡日總下mò心情看風景、聽鳥仔唱山歌。日頭箭一路過來,lâu阿榮曬到熱茯茯仔,阿榮蹓下峎背ke山溪肚,衫褲跣仔忒,就跳落細河灞肚洗身仔搞水,阿榮用佢熟絡ke自由式,來來去去煞力牯泅水,一窟細細窟ke山溪水pûn阿榮摝到汶汶。

  m̀知過忒幾久仔,阿榮對水肚躍(chhiok)上來,歸身仔光光坐佇石頭項,用一雙手lâu面項ke水擂擂仔,續開始噭起啊來,過緊噭緊大聲。歸隻山肚mò半儕人,單淨唇項ke相絲樹,同飛來飛去ke鳥仔,聽著佢ke噭聲。阿榮噭有一下仔,目汁捽捽仔,lâu放佇石頭頂ke衫褲著起來,正慢慢仔行入山溪唇結石頭躉水,想oi捉幾條魚仔轉去食,水吂淰,阿榮先拿起布袋同禾鐮仔蹶上山排,定定仔尋兜烏鈕仔草lâu昭和菜,摘啊摘仔,還摘有一息仔好食哦!摘好又行倒轉來山溪唇,lâu結石頭躉ke水戽燥,這擺單淨捉著幾尾細細尾仔ke鮊哥仔定定,看等蝦公鑽入石頭縫項,佢me mò去攔。

  阿榮逐擺出來尋食,總he隨緣隨性,頭擺阿爸識教佢,天oi撿幾多pûn人食既經定著矣,有幾多算幾多,恩就歡喜領食,m̀使貪,阿榮盡上教,有將阿爸个話聽入耳,故所逐擺來到山溪捉魚仔,一擺就躉一窟水定定,窟肚項圍著幾多條魚仔就算幾多,me m̀會圍第二擺。摘山菜me共樣,罅食就好,m̀識摘加放到老忒來耗爽食物,賸ke下二擺來,顛倒有較大頭ke菜或者較大尾ke魚仔好捉。阿榮順手將摘來ke菜,用山溪水洗洗淨來,轉到屋省事擇菜、洗菜,me m̀使泥棍棍仔拿轉屋家去,打搣屋肚ke伶俐。

  臨暗oi轉ke時節,佢定定仔尋看有較靚ke叭哈花mò,結局mò尋著,me mò看著山芙蓉,故所就在路唇摘幾蕊仔草花拿轉去pûn老妹。老妹看著阿哥轉來盡歡喜,一路迎等出來,先接起阿哥手項ke花講:「恁靚ke花,ngài鼻看有香mò!哥,恁仔細吓。」阿榮開嘴講:「唉哦,就單淨曉得拿花定定哇!阿哥摘ke菜續m̀曉得順續拿去!」菊妹就像mò聽著樣仔,拿等一杷草花歡喜到捩捩轉,嘴項緊唱「Ngài教你唱山歌,對半夜到天光,ngài教你打採茶,唱過一山又一山……」。捩到裙飛起來像海浪樣仔,一摺一摺捲起來蓬蓬,阿榮看著老妹恁歡喜,頭那拂拂(fin)仔,笑笑仔行入屋肚,lâu今晡日捉著ke魚仔同摘轉來ke菜放下來,煞煞起火煮飯準備食夜,老妹還在屋面前唱山歌唱m̀會煞。

  拜一,去學校讀書,oi放學ke時節,先生喊幾下個學生仔去辦公室,喊大家暗晡夜過來先生屋家食夜,因爭昨晡日先生ke阿姆做生日,請幾下張桌ke親戚,留下來當多菜頭菜腳,希望大家做得來pûn先生請,先生還吩咐講,大家做得帶老弟老妹共下來, 又特別交代阿榮oi記得帶菊妹過來,阿榮聽著盡歡喜,歸路仔mò停砣,轉到屋煞煞煖水洗身,兩姐妹換過淨利ke衫褲,正去先生屋家食夜。

  阿榮在路唇摘幾粒仔野生ke時計果帶過去,先生娘緊訶腦阿榮恁細義。先生屋家今晡暗晡辦三張桌,一張桌he先生屋家人,一張桌he遠位轉來ke姐妹,另張桌做盡he阿榮學校ke同學lâu老弟老妹。大家都核附近定定,故所都當熟識,來先生屋家食飯me m̀ he頭一擺,故所大家講講笑笑食到盡歡喜。

  食飽夜oi轉ke時節,先生喊阿榮去灶下,講he先生娘尋佢,阿榮來到灶下,先生娘看著阿榮入來,就問阿榮:「阿榮,當承蒙你來同ngài兜幐(then)食菜尾仔唷,你看還賸恁多仰葛煞,阿榮來,你看你較合意食麼該,同ngài幐消兜仔。」阿榮聽著敗勢敗勢講:「這仰會好意思呢(nó),暗晡夜就食當飽哩,m̀使哪!」先生娘包兜燥料oi pûn阿榮擐轉去,佢知阿榮mò冰箱,手緊擖(khat)菜,嘴me mò停同阿榮講:「阿榮,你跈等就oi畢業矣,若先生準備oi lâu你辦升學,故所想oi lâu若戶籍割來吾屋家,一來較方便申請學校,二來he有麼該文件me有一ke住所好收信仔,吾屋側角有一間頭擺ke牛欄,這下mò畜牛仔矣,畧畧仔圍圍仔,還做得擋風擋雨,你he mò嫌核佇牛欄肚,就搬過來好mò,若該間工寮現時爛爛擐擐,落雨會漏水,風搓又驚風,若先生講,he oi整好來又mò恁多時間,故所請你he mò棄嫌就先搬過來核,兩姐妹he有麼該燒冷,ngài兜me較照顧得到,正m̀會pûn若先生愁慮,你試著仰般?」

先生娘話講到長楠楠仔,講到像河灞恁長,等到講完,一斡頭看著阿榮歸面仔目汁濫泔,續嚇一下,遽遽lâu手項ke菜放佇桌頂,圍身裙拈起一角來,就lâu阿榮捽目汁,先生娘溫柔ke手腳,捽忒阿榮面項ke目汁,就順帶仔lâu佢揇一下,背囊拍拍仔,mò講麼該。

先生娘這個動作,續pûn阿榮愐著幾下年前ke事情,有一擺自家攝起褲腳過河灞轉屋,mò細義腳pûn爛忒ke酒罐仔割到大嫲孔,同學走轉去通知厥姆,阿榮ke阿姆聽著走一路過來,看著賴仔血流血著ke腳,mò顧自家正150公分高ke身材,跈等就揹阿榮躅水過河灞,去街項pûn先生看,腳底攣忒十過針,注一筒破傷風ke射,又一路對街項揹轉山頂項ke屋家。幾下擺,阿榮試著阿姆強強就揹m̀贏矣,緊拜託阿姆停下來,自家oi下來慢慢仔行,阿姆就m̀肯,強強lâu阿榮揹轉山頂,阿榮扑到阿姆ke肩頭項流目汁,目汁同阿姆ke汗共下流往下。該年阿爸堵堵好出外位做事,阿姆一儕人內內外外支理屋家,本旦就十分辛苦,一個婦人家oi準男仔人來做,像磨石來磨,日日夜夜做mò停,雖然做到盡辛苦,又me賺mò幾銑錢好食,故所正會超過勞來過身忒!還記得該日,阿姆揹阿榮轉到屋,阿姆雙手箍等阿榮,當m̀盼得緊搭厥背囊,又緊摸佢燒熝熝仔ke額頭,緊講:「阿姆m̀盼得,阿姆m̀盼得。」

故所阿榮一下偎到先生娘ke圓身,就愐著頭過ke記憶,噭(kieu)到m̀會轉聲,先生娘還he輕輕仔揇等阿榮,緊拍厥背囊。等到噭有一下仔,阿榮自家續試著當失禮,仰會扑到先生娘ke圓身噭,十分敗勢,面紅到像番鴨公樣仔,跋腳就走出去。先生娘看等恁多菜尾仔,旋旋風續m̀知oi仰般正好,正遽遽喊菊妹過來,lâu這兜菜尾仔帶轉去,順續同菊妹講,下禮拜日先生打算去lâu佢兜幐手搬屋ke事情。

2008/4/24