《江嵐客家文學專欄》

| | | 轉寄

Ti台南過冬節

  頭一擺ti台南過冬節,m̀知台南人ke風俗同台中、台北人差當多,佢兜除忒挼(nò)粄圓以外,還有做菜粄ke風俗,菜包ke皮同客家人ke共樣,he用糯米磨漿、磧燥做ke粄皮。台南庄下人,還he用傳統ke「紅花米」he桃紅鹽基性色素同粄脆、粄皮染做紅色ke,在這位一抺煞ke粄仔總下就he染到紅紅紅,mò人用白色ke過節,me mò人ke粄皮有攞艾仔。鄉下人確實盡有人情味,核ti對面ke阿玉姐當會相惜,特別拿佢自家做ke菜包來請ngài兜食,阿玉姐ke菜包除忒有染紅色ke以外,佢還有攞番瓜共下亼(chhi̍p)出來ke粄皮,厥ke菜包,底肚包ke m̀ he蘿蔔絲,he ngài一生人頭一擺食著mò共樣ke材料,肚項包:香菇、割薯、豆類(在地ke黃帝豆或者he荷蘭豆)、芹菜、炒肉、蝦米等等,又香又好食。

  Ngài一生人就恅(láu)著菜包肚項一定he包蘿蔔絲,在苗栗ke家鄉、台北、台中ke傳統市場肚,總下he包蘿蔔絲或者he蘿蔔乾ke菜包,真經m̀識食著有人包án生趣ke東西在肚項。台南人好食甜,人講:南甜、北鹹、東酸、西辣,一息就mò增差,故所台南人盡多東西食起來就甜chì頦甜chì頦,連鹹粽頂項都還oi加甜甜ke番豆粉,蚵仔麵線食起來me he甜膩膩(ne-ne) 仔,輒常有別位來ke人客食m̀慣,歸碗仔好好食m̀落頦。Ngài對甜ke me食m̀合,好在,阿玉姐ke菜包he鹹ke,當香當好食。記得頭擺吾姆打菜包ke時節,he用狗薑葉做底蒸ke,一來m̀會黏皮,二來蒸起來當香,有加分ke效果,台南人用蝠婆葉做底,ngài知蝠婆果粉粉,做得食,一夾一夾仔長長,擘開來肚項he一粒烏烏ke仁,煠(sa̍p)好烏皮擘忒,底肚he黃色ke肉,像粟子樣仔,有少可仔香氣,罔食;m̀過,ngài m̀識見過這種樹仔生來仰般,看著me m̀相識,m̀怕,今晡日總算大開洋葷,見識著台南麻豆人ke冬節文化。

  尤其he今晡暗晡,ngài有同屋主幐手挼粄圓,盡多年m̀識挼粄圓仔,佢兜還he用紅色ke粄圓祭祖,歸桌頂就he紅菜包、紅粄圓,連水果就買紅色ke,當生趣,有:lin-kó、紅杮仔、草莓,歸桌頂擺到紅紅紅,當得人惜。粄仔有兜he買ke,有兜he隔壁鄰舍送ke,還有親戚朋友me會相送,庄下所在就he有醲醲(neù-neù)ke人情味,這he都市人享受m̀著ke溫情,在佢兜ke文化底肚,紅色he吉兆,對這點做得看著麻豆人,還he盡注重老古人ke傳統習慣,紅色代表做好事,食咧會kha好運kha平安順序ke意思。

  冬至陽生春來,冬節ti逐年ke新曆12月22或者hè日,照亻恩傳統曆法,五日he一候,三候為一氣,一年又分做十二節同十二氣,合起來安到二十四節氣。冬節這日,位在北半球ke亻恩兜,這時日頭堵堵好直照ti南回歸線(又安到冬至線)頂項,故所這日北半球ke日頭盡短,暗晡頭盡長;冬節過後,日頭又慢慢仔向北回歸線轉移,北半球ke日頭又慢慢仔加長,暗晡頭漸漸縮短,故所冬節就變到曆法項盡重要ke節氣之一。俗話講:「冬節後,日影添長一線。」也就he陰陽交換ke日仔。

  台南人在冬節這日有拜神佛、拜灶王爺、三界公同地基主,家家戶戶打「菜粿」,就he ngài前面講ke「菜包」,做起來he半月形ke,lâu客家人ke形仔共樣,還有挼粄圓煮粄圓敬神。 客家人單淨挼粄圓拜神明、伯公、阿公婆,還有人會同麵團貼到門板項,敬門神。總下來講,台灣人食粄圓he取大家團圓ke意思,食粄圓有「添歲」ke意味。老古人流傳「有者冬節夜,無者過一夜。」「富人食一夜,窮人凍一夜。」意思he講,有錢人過冬節做到當澎湃像樣,窮苦人食三餐就m̀飽,án寒ke天時mò東西好食,又寒又饑,凍歸暗晡寒到m̀得天光。

  講著貼門神ke傳說:he頭擺,有一對乞食公婆,帶等一個乞食妹仔共下去同人討食。

  有一日,乞食阿姆發病死忒矣,乞食阿爸滿奈就去同人討東西安葬厥夫娘。乞食阿爸料理完喪事了後,佢共樣mò才調畜厥妹仔,包尾就lâu厥妹仔賣pûn人做使女仔。oi fûn開該日堵好he冬節,厥爸單淨討著一垤粄仔定定,兩子爺本旦讓來讓去m̀肯食,包尾一儕食一半,臨暗仔,厥妹仔就pûn人帶走矣。

  乞食妹仔ti好額人屋家做事,年年都盼等厥爸來尋佢,厥爸自從m̀識來過。有一年,這隻細阿妹仔愐著佢兩子爺分開該日,一儕食半析(sat4)粄圓ke情形,想講he lâu粄圓貼到門項,厥爸就會認得著這間屋。這隻賢孝ke細阿妹仔,就lâu厥頭家講,冬節ên有拜神拜佛,門神me異辛苦,ên來拜門神好mò?頭家講做得;細阿妹仔就將粄團一片門搭一垤(te)上去,希望厥爸認得著這間屋,會來這認佢,m̀過厥爸還he mò來。第二年佢就大門細門連窗仔門總下搭揫揫,結果厥爸還he m̀識來過。隔壁隣舍看著佢lâu粄團貼到門項拜門神,大家就有樣學樣搭起啊來,這隻風俗就恁仰仔一直流傳到這下。

  客人ke細人仔會lâu燥忒ke粄仔拿下來,起火焙(phoi)來食,豐富客家細人仔生趣ke童年生活,ngài有印象食過用焙ke粄仔,略略仔鹹鹹罔食。

  Ti台南過冬節,mò共樣ke所在,mò共樣ke在地文化風俗,pûn ngài ke台灣土地經驗,加一擺新ke體驗。

2006年冬節在西拉雅柚仔樹下 (登ti台文戰線第6號2007/6)