《江嵐客家文學專欄》

| | | 轉寄

Pûn妹仔ke信仔

得人惜ke姍:當想妳

  這恁久天時明顯降溫,早暗溫差異大,出門時記得帶一領衫,甘願多帶一領衫來麻煩,總比受寒緊蹲寒著kha贏。

  知妳這禮拜考試kha mò閒,mò方便勞攪妳讀書ke時間,用最古老ke方法寫信仔pûn妳,可能kha方便兜仔,等妳有閒ke時節正看。

  聽著妳講作業多到趕m̀完,逐日熬夜寫報告,表示妳ke生活充實又安定,恁仰me好,因為這兜學問ke磨練,堵堵在這督促妳成長,妳做到越精細收穫就越大。故所呢,希望妳做得快快樂樂ke接受這兜訓練,等妳將來需要用著ke時節,正m̀會有「書到用時方恨少」ke遺憾,正會發現自家既經擁有紥實ke基礎。故所,有事做得mò閒me he一種幸福,妳試到仰般?

  這兩隻月ngài會kha mò閒,除忒《詩畫家鄉》出書ke事,lâu出版社密切往來,複雜又麻煩;另外,備課me會花忒ngài一息仔時間,還有十二月ke南瀛文學奬頒奬典禮,me需要時間準備。盡發冷ke he,ngài mò事去接著真大兩個學生ke畢業創作指導先生ke責任,這下都十一月中矣,佢兜十二月前oi完稿ke作品還吂見到下文,真經he皇帝不急急死太監。當然,除忒這兜以外,ngài還oi尋時間寫兜東西,ngài寫故ngài在,書寫正做得證明ngài面對挫折挑戰,共樣過來積極m̀認命。

  老妹ke生日,堵好he放料日,佢自家安排好生日行程,朝晨去街項買生日當日特惠價ke商品,當晝打算去楊逵文學館同水灣餐廳,暗晡夜想參加厥學校ke音樂會,過二十歲生日,還oi阿姆陪佢。逐年都希望佢交一個男朋友,或者lâu同學共下做生日,佢總he講:「這日he媽咪最辛苦ke日仔,故所oi同媽咪共下過。」老妹同妳共樣都án賢孝,真經pûn ngài感動到mò話講。想看哪,還有幾多機會做得同佢共下過生日呢?奈日佢he交著男朋友,結婚矣,這兜好空ke親密關係,ngài排列都輪m̀著。

  老妹生日ke時節,妳me考試考忒咧,ngài兜為妳保留最好ke席位,希望妳做得轉來團圓一下,這me he ngài ke殷殷期盼!天時寒了oi添衣,m̀過"心"就oi時時保持日出ke狀態。

祝心怡


媽咪 在西拉雅柚仔樹下

2007/11/14