《江嵐客家文學專欄》

| | | 轉寄

山肚來ke細阿哥è 第五集

老虎哥ke屋家人遠遠聽到狗吠聲,就煞煞出來迎接,打面盆水分大家洗手面準備食飯,婦人家出出入入teû菜teû湯,大家就像當久m̀識食過飯樣è兇kài kài è,一碗食過一碗,單淨阿成一sà人食mò半碗飯就mò停動lè。老虎哥在燈盞下看a過去,正看到阿成ke面kap青,kiak-kiak piong-thet碗筷喊kiâ夫娘過來,帶阿成去洗身腳,順續帶kì去橫屋工寮。又喊kiâ老妹煮一碗燒湯,等阿成洗身腳洗好送去工寮分kì食。阿成洗身腳出來,堵堵好堵到老虎哥ke老妹蓮花,teû等一碗燒湯來,一ke出外ke細阿哥è,頭一擺受到生份人án熱情ke照顧,續phài-se到面紅紅,蓮花看到阿成面紅紅,láu到kì發燒,kiak-kiak lâu該碗湯piong ti桌頂,煞煞行出去,過一下就拿等一包藥包è同一杯滾水入來,老虎哥聽講阿成發燒,飯就mò顧食me thèn等入來看哪,老虎哥用手摸幾下到阿成ke額頭,試到mò麼該燒li!在唇項ke蓮花正知剛下he自家看走眼,試到當生趣續企ti唇項偷笑,阿成看到蓮花笑kì,還較phài-se,面又一下紅起來,lià下老虎哥正知頭尾,笑笑è講:「阿成,該碗湯燒燒,kiak- kiak食食lè,會較鬆爽,食忒ngì先睡,m̀使等kì-teû。」老虎哥斡頭又同蓮花講:「蓮花,ngì在lià陪kì一下,kì he新來ke,頭一擺來ên屋家,較m̀慣勢。」平時嚴肅ke大哥難得今晡日án貼心,自從就m̀識看kì對麼sà人án思量,眼前lià-ke細阿哥è he麼sà,阿哥ngióng會對kì án好nó?蓮花續試到當好奇,就坐下來問長問短,阿成就老老實實講起自家ke身世,一碗燒湯食到冷忒lè,還màng講sot。該teû食飽飯想睡目ke工人緊來探頭,害阿成同蓮花兩sà當phài-se,蓮花kiak-kiak lâu碗公收收è閃到灶下去。