《江嵐客家文學專欄》

| | | 轉寄

山肚來ke細阿哥è 第二集

阿成跋過兩粒山頭,來到阿油叔婆ke屋面前,大大聲喊阿油叔婆,阿油叔婆摸等門枋khiam一路出來開嘴就問:「阿成牯,今晡日ngióng án會早就過來,前兩日若姆tap ngài買鹽,到今就mò人出外背,故所màng買轉來io!」阿成看到阿油叔婆摸一路出來,kiak-kiak行過去,插等kì坐到扶檻項,同阿油叔婆辭行,同時麻煩阿油叔婆一家人then手照顧kiâ姆,lià擺出去路頭án遠,m̀知奈日正會成功轉來,阿姆一sà人在山肚,實在盡m̀ fong心,故所來拜託阿油叔婆,阿油叔婆拉等阿成ke手,就像自家ke孫è惜命命ke講:「唉哦,ngì自從就m̀識離開lià-te土地,一下半就愛一sà人去到án遠,若姆ngióng會捨得nò?」

離開阿油叔婆屋家,阿成一sà人煞煞趕路,正經m̀知自家愛行到奈位去,me m̀知lià條路ke盡頭在麼該所在,總he為著m̀好分阿姆失望,刻耐è離開家鄉,正有出頭天ke一日。阿成想a想è,一路上kia又下kia,m̀知行過幾多隻山頭li,試到tú sṳ̀又飢嘴又渴,就坐到一頭大樹下食阿姆準備ke東西,食飽晝又煞猛行,行到斷烏就還mò看到奈位有夥房人家,看等天就烏lè,連一ke搭腳ke所在就mò,lià暗晡又堵堵mò月光,天一暗連路就看m̀著來行,阿成尋一ke背風ke石壁,打算在石壁縫項過夜。

第二日天màng光,一條蛇哥在阿成ke腳囊肚sò過去,一陣清冷lâu阿成寒醒,等到阿成看清楚he蛇哥ke時節,蛇哥既經sò入草竇肚,好得阿成m̀知蛇哥sò過來,he嚇到蛇哥,驚怕後果不堪設想。阿成用雙手lâu目珠同面sô-sô-è,食一息è阿姆準備ke食糧,lîm兩口昨暗晡用芋荷葉承ke露水,天màng大光就煞煞趕路,kì想,看今晡日做得去到夥房庄頭mò?

阿成一山過一山,一峎過一峎,行到日頭對頂ke時節,正想愛坐下來食晝thin-thin ,就看到對門山有出火煙,kì想該怕有人het ke所在,故所連當晝就mò怕食跋起腳就行,等kì行到對面山,看a轉ka下自家行過ke山頭,看起來mò幾遠,行起來愛幾下點鐘ke路頭,人yia既經汗流脈落,tú-sṳ́飫到變背囊。阿成行入庄頭,看著一隻細細ke伯公廟,唇項ke大榕樹下一陣細人è在該搞到嘻嘻哈哈,走相kiuk、tún人尋、份家拉飯è、跳索è,lià群細人è異即靈,看到庄頭出現一ke生份人,大家就停下來看等kì,又看kì手項牽等ke山羊,阿成分án多人準猴è看,續有teû-è phài-se-phài-se,面紅紅。lià-ke時節堵堵一ke老阿伯è行過來,問阿成來lià做麼該,阿成同kì講he愛來賣手項牽等lià隻山羊,還有背囊pà等ke鹹豬肉,老阿伯同阿成帶去村長屋家,村長請阿成食茶,thèn等就有當多人來到村長屋家,大家坐下來打嘴古,順續同阿成議論價數。