《江嵐客家文學專欄》

| | | 轉寄

你 he我一生人ke新娘 上集

佳灣he一ke盡得人惜ke細阿妹仔,生來幼秀幼秀,性體好又盡認真,事事項項總he要求得周全圓滿,在百貨公司上班。佢同千和共下六年零,m̀-ko,吂結婚,兩儕人ke感情yi好,m̀管he年節ya-he兩片ke家庭有麼个大細事情,兩儕人就會共下出現。雙方ke爺哀乜認定對方he自家人,雖然吂結婚乜無lâu佢兜當做外人看。
liá恁久仔,佳灣緊來緊瘦,食無麼个落,精神乜越來越差,睡目ke時間越來越長;千和講oi帶佢去醫院檢查,佳灣總he推無閒,在百貨公司上班真經當thiám,時間又長又領無麼个錢,講起來乜he盡辛苦ke頭路。佳灣總he盡笑面,當有人緣,平平he賣食品ke專櫃,佢 ke生理就比別人kha好,故所一做就做哩四、五年,m̀識換過頭路。佢嘴碼好又有責任,頭家yi放心lâu liá間專櫃ke事交分佢做。
總he liá駁仔,佳灣ke精神差當多,一半擺仔還會算差數(sṳ),千和當m̀放心,緊tûi佢去分先生看,佳灣總he盡蠻皮,一日拖過一日,一隻月拖過一隻月,千和乜有同佳灣厥姆講,厥姆乜緊喊佢去檢查,佢還he鼻ngiu-ngiu仔,無抽無間,連厥姆就拿佢無法度。
一直到有一日,千和接到百貨公司打來ke電話,講佳灣昏忒,救護車lâu佢送去醫院,喊千和遽遽趕過去。一下晝ke時間,佳灣同千和ke爺哀做盡趕到醫院來,大家fi共下,無葛無煞。檢查ke項目一項做過一項,先生講oi邸院觀察。佳灣醒過來看到恁多人sa嚇一下,正知自家在醫院,大家你一句我一句,句句就唸仰會m̀使量早兜仔來檢查,拖到昏忒,正來分大家愁!千和看著當m̀盼得,煞煞行過來擋在佳灣ke眠床頭,拜託大家m̀好再ko駡佳灣了,佢講:「he oi駡就駡我好了」,千和ke m̀盼得分兩片ke爺哀看到想笑,大家就駡m̀落去吔!吂結婚ke兩子chhiâ姆使一下目角,偷偷仔笑出來!
佳灣tai院期間,做了盡多檢查,檢查報告一項一項出來,結果在會議室公開,先生講佳灣he猛爆性肝癌,無救了!驚怕拖m̀久!佳灣ke阿姆聽到,吂kieu出聲就直接昏忒!搣到大家亂糙糙,m̀知oi仰葛煞正好!
出院後,佳灣辭忒頭路在屋家養病,千和乜辭忒頭路專門照顧佢。 佳灣當擔硬,知得自家ke病情以後,當遽就接受liá ke事實,佢兩儕計劃oi去旅行,千和排好行程訂好飯店,駛車上路,因爭佳灣睡目ke時間越來越長,故所行程當慢,m̀-ko千和了解,liá轉旅行主要m̀ he趕時間,he oi lâu時間參詳。
有一日,佢兩儕在烏山頭水庫淋咖啡ke時節,佳灣面對南台灣恁靚ke好山好水。想到自家將將一生人,除了liá場分自家疏忽以致oi佢一條命ke病痛外,自家實在當幸運,有阿公阿婆阿爸阿姆惜,有千和耐心在身邊,有朋友姐妹ke相惜,頭路也順順序序,除哩恁後生就oi面對死亡,人生應該oi滿足,怨天m̀得正著,chhûn著盡大ke遺憾he,自家身體ke疏忽,續oi分阿公阿婆老大人傷心,oi分爺哀擔liá長長久久ke愁慮,世大人從細揑m̀得大,等揑到大來,看等就oi結婚降子,續來看等佢著天吊,仰般會捨得,實在he不孝,故所有必要想一個辦法,慢慢分世大人接受事實,也期望做得lâu一路來相惜ke人,一一當面答謝ke機會,好分自家有一ke無遺憾ke一生人,也分相惜ke人一ke圓滿ke世界。故所佳灣就lâu liá個想法講分千和聽:「ên做得尋一個風景盡靚,交通又利便ke所在,舉辦吾ke〈生前告別式〉,放帖仔分ên所有ke親戚朋友,請佢兜來參加,你看仰般?」千和聽tó著(chok)一下驚,m̀-ko還he試到liá ke主意yi特別。旅行轉去以後就開始準備例名單、印帖仔,地點就選ti離大家kha近ke白河附近。一來,大家做得共下行行嫽嫽兼看花、淋咖啡,大家乜順續聯絡一下感情,還做得同佳灣見盡尾一面。
一開始,連佳灣lâu千和ke爺哀接到liá ke消息,就m̀知oi仰般接受liá兩ke後生人ke想法,好在大家就還吂yi老,四、五十歲ke人,做得了解佳灣lâu千和ke觀念。
厥公lâu厥婆就駡到會死,緊唸liá二ke細人仔變麼个齣事,做爺哀ke m̀好好教,還thèn等細人仔變鬼變怪,恁仰做會分親戚朋友nak死,奈有人吂過身就先做齋仔,真經會濟衰人,阿婆在電話肚項講到大嬤聲頦,譴到至極。佳灣ke爺哀遽遽拚轉屋家去求情,慢慢仔勸話分老人家聽,正得到佢兜無麼个情願ke同意。
收著帖仔ke親戚朋友,大家就打電話聯絡來聯絡去,七鼓八笛議論紛紛;tai中南部ke親戚、朋友、同事lâu同學,本旦就知得佳灣ke病情,無恁著驚。顛倒he歇外位kha少聯絡ke同學lâu朋友,一時間,無法度接受liá隻事實,佳灣正二十大零歲,就吂上三十歲ke人,仰會有可能講死就死,有兜人láu tó在學校肚項,盡搞怪ke千和又在該變麼个齣頭,收到帖仔ke朋友、同學就上網去問別儕,歸ke網路做盡在該談論liá件事,等北部ke朋友確定事情ke真實性以後,大家正開始愁oi仰般同佢兩儕then手,lâu liá件事情辦到圓滿來。
續下來ke問題he oi仰般包禮,oi著麼个衫褲正m̀會失禮,又oi用仰般ke心情出席,佳灣還生生,算來oi包紅包ya he白包?逐儕人就試到當稀奇,又當頭那痛,自從就m̀識參加過恁特別ke聚會。liá駁仔,所有ke朋友就恁仰聯絡到有來有去,有人講oi送佳灣金斗盎(âng),有人講oi送銀紙樂隊,乜有人講oi送樓仔屋lâu紙家童,盡把變ke he大學同學文昇牯,佢講決定oi送佳灣一副棺材對台北運到現場去,大家就lâu佢駡到臭頭;文昇牯私下正偷偷仔講:「我正m̀敢哪,he恁仰做定著會分千和ko kha傷心,佢兩儕就恁後生,今晡日不得已oi接受死神ke挑戰就盡艱苦咧,做朋友ke仰會盼得分佢兜為難。」
在白河ke民宿咖啡廳,有一隻千坪ke花園,liá位看起來淨利氣氛又好,民宿ke頭家頭一擺接到恁樣ke生理,本旦試到怪怪,包尾想想仔,結局又無人死忒,又m̀ he真經辦喪事驚麼个,故所chhiu lâu liá棚事接下來。oi在liá位辦幼席,需要桌凳、碗盤同盡多好食ke東西,liá下ke後生人奈oi食麼个桌席,kha進步ke方式chhiu he辦歐式自助餐,來幾多人就做得加一息減一息,有正餐又有點心、水果、咖啡、燒冷飲料,隨在佢oi食到幾多點就做得,恁仰ke生理大約仔算人頭就做得,可長可短。