《編輯案頭》

| | | 轉寄

轉載:2019客家貢獻獎得主出爐

  全球客家最高榮譽獎項──「客家貢獻獎」六月二十七號揭曉第八屆得獎名單,朱真一lâu林光華榮獲「終身貢獻獎」,楊政男、謝其煚先生、賴仁政先生、林生祥先生、黎萬棠先生、邱淑治女士he「傑出成就獎」得主,鍾雲輝客家八音團he頭一擺得著「傑出成就獎--藝術文化類」ke團體。客家委員會主任委員李永得表示,本屆客家貢獻獎競爭非常激烈,經過半年ke評選,正選出得獎者,他ya用liá擺機會向所有為客家付出貢獻ke人致上盡真誠ke敬意,希望大家共下為客家繼續煞猛努力。


「終身貢獻獎」得主,朱真一先生
  長期ti美國提倡lâu推動客家臺灣語言歷史文化,在報紙開客家專欄,出版客家書籍,ti北美各地客家社團抽間舉辦演講,在海外大力推廣臺灣客家文化、語言、歷史,首創臺灣文學營,成立「客家臺灣文化獎」,頒獎pûn對客家文化yû貢獻ke人lâu團體,全力支持客家研究lâu推廣客家文化,得著當多客家人士ke肯定。



「終身貢獻獎」得主,林光華先生
  開啟客家運動ke扉頁,始終如一堅持理念為客家母語傳承,發揚客家文化,tui 1988年發起「還我客家母語運動」,走遍全臺演講,呼籲客家人拈轉阿姆話,面對客語斷層危機,全力支持客家運動代表性刊物《客家雜誌》。擔任立法委員期間,抽間推動客語相關ke修法lâu立法,比將講,設立客家廣電基金、籌備行政院客委會lâu推動客家電視開播liá-teû實質作為,tui客家語言復振效果影響當大,提升客家tui國家多元文化公共事務ke發展,tui國家lâu社會yû當重要ke貢獻力lâu影響力。



「傑出成就獎-研究發展類」得主,楊政男先生
  He客家語文研究ke先行者,國學基礎深厚,在1989年加入中原周刊社團,開始客家語言ke研究、鑽研客語文字,編寫客語字辭典,kì編撰ke客語字辭典得著當多專業研究者ke喜愛,奠定客家語文ke傳承,客語he客家文化ke核心,在語言文化研究上,表現客家硬頸精神,煞猛研究、著作,抽間參加客家事務,弘揚客家文化,傳承、推展客家文化發展,提攜客家後進,卓然有成,足為各界楷模表率。


「傑出成就獎-藝術文化類」得主,鍾雲輝客家八音團
  客家八音lâu客家人ke生命禮俗lâu歲時祭儀密不可分,鍾雲輝客家八音團ti民國93年ti高雄美濃成立,he臺灣重要傳統藝術ke藝能保存團體,試著客家八音就oi失傳,then-sú學校成立八音社團,緊透過傳統ke客家音樂,指導年輕藝生,傳承客家八音lâu客家人之間ke傳統文化,保存傳統客家八音。



「傑出成就獎-藝術文化類」得主,謝其煚先生
  以hip相機記錄人生ke謝其煚先生,以鄉土人文為主軸,先後出版了臺灣早期農耕時代ke紀錄影像,記錄水牛、稻田、農耕lâu當多客家文化,用相片記錄ke時間長達一甲子,拍照底片多達11萬張,除忒臺灣博物館典藏謝其煚先生ke相片,也印證了kì當年以相機記錄歷史ke堅持,yû永續文化ke價值。



「傑出成就獎-藝術文化類」得主,賴仁政先生
  致力推動臺灣客家傳統音樂ke工作,試著客家山歌yû時代性ke意義lâu價值,oi永續傳唱,ya抽間扭轉各界tui客家傳統山歌刻板印象,pûn客家山歌增加新ke風貌,深受各界好評lâu贊同,推廣臺灣客家音樂新思維,帶pûn大家新ke想法lâu視野,透過研究瞭解客家文化之美lâu客家傳統藝術深層ke意義,傳承臺灣客家傳統音樂精髓,pûn珍貴ke客家傳統音樂,代代相傳。



「傑出成就獎-藝術文化類」得主,林生祥先生
  Ti高雄美濃出世,一路里來以家鄉為基地ke林生祥先生,關懷臺灣ke環境,以臺灣傳統音樂元素為底,lâu西方音樂調合,創作出獨樹一格ke臺灣新民謠,kiâ樂團lâu公司從事文化藝術工作,lâu在地滋養ke養分發揚to國內外,以客家語言發聲,在mò國界ke音樂世界lâu聽眾產生共鳴,深化擴大了臺灣音樂產業ke競爭力,liá幾年深耕客家、細人lâu後生人ke音樂教育,期望臺灣ke音樂文化向下扎根茁壯。



「傑出成就獎-公共推廣類」得主,黎萬棠先生
  長期在西班牙僑居地熱心僑務,創立西班牙臺灣客家會,擔任首屆創會會長,甚至聯合其他國家,組成歐洲臺灣客家聯合總會,積極促進在地客家文化ke發展lâu推廣,輒常舉辦客家聯誼活動,促進在地lâu客家文化ke連結,2018年以西班牙文翻譯客家文學巨擘李喬大師ke作品,用貼近西班牙語系民眾ke角度,pûn mò共樣文化語系ke人還啊了解lâu認識客家,黎會長在海外推展客家文化不遺餘力,貢獻卓越。



「傑出成就獎-公共推廣類」得主,邱淑治女士
  為本屆得獎ke唯一女性,邱女士積極規劃客家歌曲演出活動、振興客家語言文化,ti成立打擊樂團擔任團長期間,l âu客家音樂lâu打擊樂團結合,深入臺灣各客家鄉、鎮市進行巡迴義演活動,ya認助清寒學生長達20零年,鼓舞當多清寒學生tui未來ke希望,kì tui發揚客家文化認同感yi yû成果,當多客家鄉親ô-nó kì,她抽間參加推廣客家各項事務活動,tui客家文化ke熱愛lâu熱忱,從來tu mò改變。


  過去7屆「客家貢獻獎」累積表揚多達60位海、內外傑出客家人士,經過推薦提名、初審、複審lâu決審ke過程,本公正超然立場,嚴謹縝密ke審查,chang評選出得獎者,期許透過貢獻獎能激勵還啊多客家傑出人士lâu後生,繼續投入客家事務,以創新、求變ke觀點,開創各世代專屬ke客家新風貌,ya pûn客家典範在全球各地pûn發掘lâu流傳。