《編輯案頭》

 | | | 轉寄

轉載：2020臺北國際旅展——客庄小旅行

作者 2020.11.01

　　客家委員會副主任委員鍾孔炤，十月二十七號代表主任委員楊長鎮出席2020臺北國際旅展——展前記者會，今年客委會以「客庄小旅行」為主題，搭配浪漫臺三線、靚靚六堆、幸福臺九線，推出「社區小旅行」、「客庄工藝」、「客庄酒莊」及「客庄文旅」liá-teû行程，邀集客庄社區、酒藏、美食、職人、旅行三十三家業者，推出五十五條以上客庄深度遊程產品，邀請大家來「369浪漫客庄小旅行」。

　　鍾孔炤致詞時表示，客委會展出「客庄小旅行」，做得pûn大家知客庄yû當多小秘境，pûn大家做得體驗客庄、了解客家，在客庄定定仔行、定定仔食、定定仔享受旅行，體驗客庄yû幾靚、看著客庄ke底蘊。在旅展中做得品嘗客家酒莊ke葡萄酒、東方美人茶、lâu客家美食，歡迎大家to客庄，來認識客庄、中意客庄。

　　客委會表示，為展現2020客家館ke嶄新風貌，liá-pái以「文創選物店」為設計理念，推出四個mò共樣ke主題遊程。「社區小旅行」──嚴選全臺十一個客家社區，推出新屋海客蚵間石滬捕魚趣、關山穿越時空之旅……十七條精選深度小旅行遊程；「工藝之旅」──由客委會輔導客庄工匠職人師徒十六人現場演繹發表十八項全新開發商品，ko提供手拉拉坯、手擠坯、油紙遮仔liá-teû手作體驗。

　　另外，「客庄酒藏──微醺之旅」──由二林酒庄社區職人推出紅酒DIY lâu葡萄樹下浪漫餐桌體驗遊程；「客庄文旅」──由十家旅行社業者推出樟之細路、客家海客、古道自行車lâu客庄慢漫遊八項主題精選三十六項商品，提供多項季節限定獨家私房遊程，敬請把握一年一度難得ke機會。

　　「2020 ITF台北國際旅展」十月三十號to十一月二號在臺北南港展覽館盛大登場！Liá場COVID-19疫後全球盡盛大ke觀光旅遊盛會，主辦單位臺灣觀光協會以「為觀光人打氣」為號召攜手邀集超過三十個國家地區、三十個中央部會lâu地方政府lâu數百家觀光業者參展，共下面對疫情ke嚴峻挑戰。

　　客委會表示，展期當中，客家館天天tu yû精彩ke「客家沙龍」，yû客家傳奇吟遊詩人阿淘哥、金曲獎入圍歌手黃珮舒lâu客家傳統二胡八音現場演唱表演，還安排當多出名ke人現場開講(比將講：劉克襄)，lâu欣賞浪漫鄉村小旅行、浪漫臺三線藝術季，帶您共下探訪樟之細路ke奧秘、客家信仰伯公遍路之旅，一起品味客庄山川水圳ke靚。