《編輯案頭》

| | | 轉寄

轉載:賴世榮「山城客情──浪漫臺三線水彩個展」

  新竹縣文化局美術館,tui一月八號開始,展出賴世榮「山城客情──浪漫臺三線水彩個展」,客委會李永得主委表示,透過畫家ke筆觸色彩做得感受著該央時作畫ke情感lâu時代ke風光,連結觀眾lâu客家ke情感。

  賴世榮he新竹竹東客家人,高中時節lâu名畫家蕭如松學,ko lòi入去文化學院美術系讀書,轉讀國立藝專美術工藝科。國立藝專畢業,識先後服務美國五家報社,長年從事新聞工作,高不將放下畫筆,該央時kì輒常帶細人仔hi博物館lâu美術館,看著當多siàng人ke尖端潮流名畫創作。退休後,2016年二月,賴世榮ti台東生活美學館舉辦首展「山水塵世遊於藝」,就án-nè開始釋放炙熱燃燒ke藝術靈魂,liá三、四年來ti全國陸陸續續辦理十ko擺個展,me參加當多聯展,成果豐碩。

  新竹竹東he kiâ胞衣跡,十九歲離開,到外地遊歷,從來m̀識好好端詳這垤土地,新竹竹東就像皺皮皺皮阿姆ke面,緊老緊試著珍貴,he kì日思夜想轉ke所在,故所liá擺以臺三線沿線人文景緻為主題,打算展出六十幅ke水彩作品。作品展覽期間tui 1一月八號to二月二號,歡迎大家共下來欣賞。