《江秀鳳散文專欄》

| | | 轉寄

天公面烏烏

  這án多日,日頭心情當好,日日就帶等笑面出來pûn ngài看,m̀-ko春天後ôi面,看電視ke氣象報導,講這兩日會作寒,故所有著kha賁ke衫,氣象報告旦旦m̀準,天時還he ngie̍t-fa̍k-fa̍k-é,害ngài熱到緊出汗,因爭著忒賁,故所mò法度脫忒,熱到連頭那毛就濕忒,續來熱著,頭那昏昏盡艱苦,歸身仔虐虐削削,當m̀鬆爽,背囊項ke汗黏等衫,濕溚溚仔,黏黏浹浹,還得人惱哪!

  今晡日天時預告講,會轉寒,又著長袖出門,日時頭,日頭走出來尞,熱到佇m̀著,yu盡翕熱,晒到人懨懨,無半息精神,今晡日又有體育課,學校màng換熱天ke制服,本本著長袖,當晝11點零ke時節,yû一個同學熱到昏忒,pûn人扛到保健室,先生正喊大家入去教室,he-mò,下一個昏忒ke就怕he ngài了!

  下晝放學ke時節,sa轉寒起風,風一陣一陣咻咻滾,ngài lâu領仔拉高高,同頸根圍起來,m̀-ko仰般挷就mò效,實在還寒哪!日頭仰會講變面就變面,等巴士ke大馬膠路風脫體大,連圓身、手腳都寒到耐m̀得,天公面烏烏,烏雲在東片析一路飛等過來,mò三分鐘大風大雨啵啵滾,又mò店亭下好寄雨,一下半就旋旋風pûn大雨涿到澇澇,歸身仔像在陂塘肚撈起來ke魚仔,水溚溚跌,就在這央時,ngài oi坐ke巴士來吔,ngài遽遽擎手oi坐車,運轉手怕he看厓歸身澇澇,車牌脣淨ngài一儕人定定,欺負ngài he一個學生仔,詐mò看著直直駛過去,ngài跈等車仔緊走緊擛手,路項ke大人看著me lâu ngài then喊運轉手停車,人兩隻腳巴士八隻輪仔,腳短短ke細人仔仰會逐得著巴士,mò奈何又在大雨肚行轉車牌,下二枋車oi等二十分鐘久,企到mò遮mò抵ke車牌,風吹雨打,pûn雨打到皮肉當痛,天公伯ke面緊來緊烏,雨越落越大,頭那毛、衫褲全濕淨淨,衫尾攎起來撙水,大嫲嫲ke水比屋下ke水道水還kha大管。

  等到下一枋巴士來ke時節,ngài還he擎手緊擛,這個司機kha好心停下來pûn ngài上車,一上車pûn ngài行過ke所在全he水,大家就緊看ngài,ngài試著盡敗勢,車頂yû當多位仔,me m̀敢坐,企到kha背角ke所在,圓身ke水還緊跌,等ngài昏醒過來,正知車頂ke冷氣還冷,寒到緊顫,連等哈啾哈啾打幾下下,脣項坐等一個細阿姐仔拿一疊衛生紙pûn ngài,該央時正知自家鼻流鼻串,m̀知流幾久仔,lâu細阿姐仔頷頭承蒙一下,就遽遽捽面捽鼻,轉到屋就壞蹄了~發燒了。


  2018.4.26在台中55路公車回程