《江秀鳳散文專欄》

| | | 轉寄

做生日

  Ngà屋下yû四儕人,ngà爸、ngà姆,還有ngà姐同ngài,自ngài知人我以來,ngà屋下年年就做三擺生日,到ngà小學三年生ke時節,ngà姆走去麵包店lâu ngài注文一隻雞卵糕,一屋家人食飽夜,圍共下等ngài許願歕蠟燭火,切雞卵糕ke時節,ngài sa脈脈風愐著,問講:「奇怪呢,ên屋下yû四儕人,仰會年年淨過三擺生日定定?」ngà姆恬恬食kiâ雞卵糕mò應話,ngà姐講:「He唷!阿姆逐年都lâu阿爸、還有ngài同老妹做生日,kì自家m̀識做過生日。」這央時,大家就停下來mò再過食雞卵糕,單淨阿姆遽遽lâu雞卵糕食忒,企起來lâu盤仔拿落去灶下洗。

  講著ngà爸實在還魯夫,自從m̀識lâu ngà姆做生日,me m̀識聽kì講麼个結婚紀念日,一生人m̀識送過ngà姆禮物,連阿姆節都he ngài兩姐妹在學校,先生教ngài-teû用衛生紙做紙花仔送阿姆。過阿爸節,ngà姆會買電動刮鬚刀,mò就he領帶(ne ku tai)、恤子、皮帶仔、衫褲、皮鞋送ngà爸,ngà爸生日,ngà姆me會準備禮物pûn kì,ngà爸生日該日,桌頂定著he歸桌就he ngà爸一等好食ke菜,還yû一齣過年正會有ke「髮菜粳」,這品菜kha宕工,oi浸香菇,頭那毛菜盡多沙仔,oi洗當多擺正洗得淨,所有ke菜都oi切到幼幼絲仔,竹筍還oi先煠過,正切絲,逐擺看ngà姆煮這品菜ke時間,就做得煮一餐菜哩唷。

  到這下ngài就還記到清清楚楚,ngà姆識買pûn ngà爸ke禮物,還yû ngà姆對ngà爸ke貼心,án好ke婦人家,ngà爸仰會m̀曉得儆惜,實在還m̀公平喔。Ngà姆自從m̀識怨嘆,逐年就篤篤仔做,該年ngài生日過忒,就lâu阿姐去揙戶口簿仔,正知ngà姆ke生日,ngài兩姐妹正開始藏錢,等到吾姆生日ke時節,ngài兩姐妹me偷偷仔去雞卵糕店注文雞卵糕pûn ngà姆做生日。

  該年過年,ngài兩姐妹me看著,ngà屋下yû四儕人,me he單淨三儕人yû矺年錢定定,圍爐食飽夜,ngà姆發好矺年錢就去洗碗筷,ngài兩姐妹在讀書間,一儕抽出一百個銀來包紅包pûn ngà姆,ngài兩儕輕輕仔行落灶下,對ngà姆ke後背揇等ngà姆講:「屋下yû四儕人,ngài-teû年年做生日,就你一儕人,mò人lâu你做生日,逐年ngài-teû都yû紅包,都mò人包pûn你,阿姆新年快樂,這包紅包pûn你。」ngà姆緊洗碗目汁緊跌,翻轉頭來揇等ngài兩姐妹:「你兩姐妹大哩唷,曉得思量人了,án賢孝,ngài當歡喜。」該兩百ke銀ke紅包,ngà姆當做寶,囥到這下還在。


  2018.6.16在大墩木棉樹下