《詩畫家鄉》

| | | 轉寄

Ńg-ngie̍t thùng-fâ-hiông...五月 桐花香

listen



Ńg-ngie̍t,ngiâm yit-lûi yù-thùng-fâ
五月,拈一蕊油桐花
chhap-sông â-mê ke ki-chûng
插上阿姆ke髻鬃
chhîn-hiông ke fâ-phan
清香ke花瓣
khôi ti â-mê hàng-ko ke lu-hong
開ti阿姆行過ke路項

Yit-chhut-se chhiu lâu ngì su̍k-sṳ
一出世就lâu你熟識
khî ti khôi-tén thai-fòng-fâ ke vì-chhiòng sùn
企ti開等大紅花ke圍牆唇
khon-chhut-hi chhin-chhiong mân-thiên pha̍k-ho̍k-é
看出去 盡像滿天白鶴仔
thìn chhai yù-thùng-su táng-kô
停在油桐樹頂高

chok pha̍k-sâm vû-khiùn ke ngièn-fà
著白衫烏裙ke年華
lo̍k-siet ke thùng-fâ se-lu-é hong
落雪ke桐花細路仔項
thùng â-mê then-sú khuan-chhoi khuan -fân-sú chón-ya
同阿姆櫬手擐菜擐蕃薯轉夜
lióng-chṳ́-ôi ke kiok-chiak he yit-thiàu
兩子女哀ke腳跡he一條
hiông-hiông ke fâ-lu
香香ke花路
seu-sâng tiet-to yit-su-hâ
笑聲 跌到一樹下

Yén-yén ke mung thèn-tén kô-kô-ke
遠遠ke夢 跈等高高ke
yù-thùng-su pî song thiên-táng chhìm â-mê ke
油桐樹 飛上天頂尋阿姆ke
thí-hiông ńg-ngie̍t chak yit-phâ yù-thùng-fâ
體香 五月 摘一杷油桐花
chhap-to â-mê ke fûng-súi-táng
插到阿姆ke風水頂
yu khon-tó â-mê sṳ̂-to kîm-lang ke
又看到阿姆梳到金爧ke
ki-chûng lâu ngài ke chhiâng-chhûn siông-fi
髻鬃 lâu ngài ke青春相會

2007/5 母親節