《善雄牧園》

| | | 轉寄

基督徒ke本質(3)(修訂版)

再來就係耶穌基督對ên-teû所講一定oi有ke第二項本質,就係講:「你teû 係世界ke光」。Ên-teû知光係世間所需要ke, 係人lâu一切萬物所需要ke, ên-teû知普通世界ke光唯一ke來源係日頭,liá-ke日頭係人lâu一切動物、五穀、青菜、樹木所需要ke光,故所光係 chhin重要ke. 主耶穌將liá-ke世間一切所最需要ke光放在ên-teû身hong講:「你teû 係世間ke光」,liá係 oi ên-teû ke德行lâu人格oi做人所需要ke, liá就係主耶穌oi提撥ên-teû基督徒ke價值,也就係 oi ên-teû傳播天頂ke光輝,來照在世間罪惡烏暗ke地方。

光ke意義假使tui它ke本質來看係熱,ên-teû知,假使無熱,án-ngiòng就無光ke放射;故所假使oi射出光,就oi tui頂高來ke熱,假使無ke光係軟弱,m̀係世間所需要ke, 像liá樣,ên-teû假使oi做世間ke光,就必須結連在光ke源頭,就係主耶穌基督,ên-teû oi tui它來得到聖靈ke幫助,pûn ên-teû ke光成為chhin明亮有熱量ke光做得來利益人,liá樣ke光chang 係世間所欠缺ke.

光另外一ke意義就係能力,liá係創造性ke, 它將一ke chhin烏暗ke地方變作光明ke地方,故所光消滅全部ke烏暗,烏暗係人人所m̀中意ke, 因為在烏暗中常常pûn人做惡、做錯事情、或者係 pûn人陷落危險,總講一句,就係無光ke關係,假使有光照耀在烏暗之中,án-ngiòng無頂高所講ke liá-teû事情。像liá樣,ên-teû做基督徒ke係像一盞ke光燈照在罪惡烏暗ke地方,引導人行正直ke路來thèn主耶穌,免得他teû行入在罪惡烏暗滅亡危險ke路,來致使失魂、墮落地獄,án-nè chang 係ên-teû做光ke使命lâu目的。

你teû想看a, 你有幾多親戚朋友還行在死亡烏暗ke路,你sṳt去引導他teû 無?你sṳt為他teû祈禱,將真理活命ke光照入在他teû中間無?Ên-teû要求主賜ên-teû力量,pûn ên-teû有氣力來發出liá-ke真光,引導chhin多朋友來信主耶穌。

頭先ên-teû所吟ke詩313首也有明白教示ên-teû, 做真光ke燈,故所ên-teû oi盡本分來為主服務,將光照在烏暗地方,liá樣liá-ke光chang有價值。

主耶穌在下背講一ke比喻:「城築在山頂高做m̀得躲起來,ên-teû知,城假使建築在山頂高定著係 chhin明顯ke事,係人人做得看到。主耶穌用liá-ke比喻係oi表明ên-teû做基督徒ke生活係人人所注意,係「眾目所視,眾手所指」,liá-ke意思係講,基督徒ke生活、行為、善、惡,全部係眾人ke目珠所注意看ke.故所ên-teû做基督徒ke, 在你teû ke日常生活時節oi謹慎,免得受人批評,還ko要緊ke就係oi現出基督ke光來照在四邊ke地方。又同時liá-ke城也代表、連帶性ke, 像社會組成ke團體,liá oi告訴ên-teû,基督徒係教會團體,故所ên-teû oi有合作ke精神,像參加聖歌隊、青年團契lâu其他ke組織,ên-teû oi教會復興就必須oi ên-teû教會每一位會友團結。Ko重要ke 係,也oi教示ên-teû ke信心oi有堅固像城,ên-teû oi確信,只有信靠主耶穌,ên-teû就oi得到安慰lâu保守。

在第15章有講:「無人點燈放在斗下,就係放在燈台頂高,就oi遍照屋家底肚ke人。」主耶穌講liá句話係因為當時聽祂講道ke人,大部分係農民lâu漁民。他teû ke屋家係茅蘆,在屋家裏只有一室,室中只有一盞燈台點火來遍照整家人。假使將liá-ke獨一無二ke燈火放在斗下,全屋就oi變烏暗,也係一個m̀合情理ke事,因為點燈ke目的就係 oi遍照屋家底肚ke人。故所ên-teû做世間ke光ke人,oi將liá-ke光照在人ke面前,做m̀得將光躲起來,來失去光ke功效,因為光係 oi照在烏暗地方,pûn人做得看,故所主講:「Liá樣你teû ke光oi照在人ke面前,pûn他teû看見你teû ke好行為,來歸榮光pûn你teû在天頂ke父。」

最尾希望大家oi有像鹽lâu光ke本質,就係 oi有基督ke愛 lâu光來引導人信主,又oi熱心為教會每項工作來sat-mâng, pûn教會日日復興,達到主所吩咐ên-teû ke使命,chang m̀會辜負主ke旨意。