《客家消息》

| | | 轉寄

轉載:2019客家國際青訪團歸國成果發表

  由13位客家後生組成ke第三屆「2019客家青年國際事務訪問團」,在8月15號完成為期兩禮拜ke紐澳跨文化交流lâu志願服務後,8月28號在新莊聯合辦公大樓舉辦學員成果展演發表會。客家委員會主委李永得於頒發結業證書pûn學員時,期勉大家oi繼續為台灣客家lâu文化語言努力,扮演「客家外交小尖兵」pûn世界看著靚靚ke台灣客家。


  李主委表示,這群平均年齡正17歲ke客家後生,在113名競爭者中脫穎而出,ko經過兩禮拜密集訓練,正做得去紐西蘭、澳洲進行17日ke交流訪問,liá段時間學員ke努力lâu表現,ya pûn紐澳ke外國朋友lâu客家鄉親試著驚豔,pûn世界看著「客家ke風神lâu希望」。


  李主委指出,客家青訪團既經邁入第三屆,其中本屆入選ke學員yû當多人he上屆ke遺珠,但he學員在經過一年ke努力後本屆終於得償所願,同時ya證明學員對客家事務ke熱愛lâu堅持。李主委承諾過忒年青訪團會繼續舉辦,甚至考慮擴大辦理,目的就he oi鼓勵客家後生積極參加客家事務lâu推廣客家語言文化,進一步翻轉世代邁向世界。


  Liá擺旅程,青訪團首站先前往紐西蘭ke南島毛利文化保存中心,學習毛利文化內涵,了解紐西蘭ngióng-pân透過政策lâu教育,lâu毛利文化融入全民ke日常生活,續等,學員前往澳洲雪梨,由聯合國協會新南威爾斯分會(UNAA-NSW)作伴lâu當地非政府組織(NGO)領袖進行聯合國永續發展目標(SDGs)ke專題講座座談及文化展演,包尾在8月11號to 13號前往參加布里斯本舉辦ke「2019全球客家文化會議lâu臺灣客家懇親大會在大洋洲」,熱情協助各項行政工作,並在歡迎晚宴中展現客家歌謠、打嘴鼓、舞蹈lâu傳統樂器liá-teû精采表演,pûn海外客家鄉親感受著客家後生滿滿ke活力lâu希望。