《客家消息》

 | | | 轉寄

轉載：2026客語短劇比賽

作者 2025.11.16

　 客家委員會主辦ke「2026客語短劇比賽」，總獎金to四十萬個銀，鼓勵全國熱愛表演lâu戲劇創作ke人，以生活日常為題材，用短劇演出屬於客家ke故事，透過舞台展現客家趣味lâu溫度，歡迎報名參賽。所有ke人tu做得自由組隊報名，逐隊三儕to二十儕人，該底肚oi yû三股一ke人he二十五歲以下青年。演出內容以客語為主要語言，客語對話比例須達六成以上，逐隊演出時間八to十分鐘。假使報名隊伍超過三十隊，voi先初審劇本，選盡好ke三十隊入決賽。
　 比賽特優獎七萬個銀、優等獎各五萬個銀、佳作獎各一萬五千個銀，還有，「最佳劇本獎」三萬個銀，客委會提供排練lâu道具製作補助、交通lâu住宿補助，pûn還啊多團隊m̀ sṳ́愁準備比賽ke經費，盡情展現創意lâu實力。
　 頭一擺以「短劇」為主題舉辦比賽，希望pûn還啊多人從生活出發，家庭日常、社區故事、地方傳說、現代議題這兜生活事情，轉化為充滿創意ke戲劇橋段。鼓勵大家湊親戚朋友lâu鄰舍共下參加，用想像力，lâu生命中盡生趣、盡感動、盡離奇、盡燒暖ke部分搬上舞台，pûn觀眾在笑聲lâu感動之中，體驗客語ke活力lâu溫度，感受客家文化ke真實lâu親切。
　 短劇比賽tui liá ha to 2025年十二月二十三號（拜二）下晝五點，開放報名，想報名團隊做得to報名連結下載簡章lâu報名表，LINE諮詢管道連結加入， 歡迎好戲劇、中意客家文化朋友共下演出。2026年三月十四號（拜六）to十五號（拜日）在屏東縣佳冬國中舉辦比賽，頒獎典禮me會同場舉行。