《客家消息》

| | | 轉寄

轉載:葛瑞絲《旅。客:客語帶ngài去美國》

  客家委員會頭一擺lâu屏東左堆yû名ke圖文創作家「葛瑞絲」聯手合作,推出客、英原創故事繪本《旅。客:客語帶ngài去美國》,yû臉書十三萬粉絲高人氣ke「葛瑞絲ke小宇宙」,lau盡yû代表性ke靈魂角色人物「葛瑞絲」cho故事主角,以南四縣腔客語文字來講一位屏東左堆客家細阿妹作客他鄉ke成長故事,帶讀者遊liau美國西部壯麗風景,期待透過liá本書同六堆客家文化推廣to全世界,pûn海內外鄉親朋友都做得認識臺灣客家ke靚。

  由客委會補助出版ke《旅。客》,今年(2023)年初在臺灣、新加坡、馬來西亞正式上架,liá he一本真人真事ke小日誌,以十隻生趣生動ke主題小故事,串聯起十七歲客家細阿妹一儕人ti海外求學、生活ke心情轉折。書中分享當多美國西部特色景點,透過作者文字敘述lâu圖片相片呈現,帶大家行入故事。Liá本書me分享yi多好食ke客家料理,客家封肉、豆豉、蘿蔔乾oi ngióng è做出來,作者大方分享來自阿婆ke好味緒!另外逐章節包尾附上「來學客語」學習客語辭彙小單元,以精美插圖ke圖像語言學習法,pûn讀者讀繪本就做得輕鬆學客話!

  葛瑞絲表示,pha因為從細離開故鄉,故所在外聽著客家話、堵著客家文化、認識客家人,tu會十分痛惜liá珍貴ke緣分,在美國該幾年,kì me輒常分享自家家鄉ke客家文化,lâu客家美食分享pûn外國朋友;liá ha轉來臺灣,kì決定用自家ke阿姆話,以手繪插圖ke方式,分享客家細妹在美國生活ke勇敢故事,oi帶大家認識六堆客庄ke靚,未來me期盼yû還啊多客家相關創作、文創商品,pûn國內外ke朋友tu做得共下認識客家ke好。

  葛瑞絲除忒出版《旅。客》客、英原創故事繪本之外,me特別設計一款「葛瑞絲ke小宇宙——生活篇」客、英雙語十六種Line貼圖,以南四縣腔客語發音為主,內容以常用日常生活用語,比將講:包括多謝、做得、蓋暢」,葛瑞絲邀請大家透過Line貼圖共下輕鬆學客、英雙語!


買書管道:奇點創新有限公司官網(https://reurl.cc/4XVg4v)
買Line貼圖管道:https://reurl.cc/mZKdZ7