《李喬小說─孤燈》

 | | | 轉寄

四、雲lâu月(12)

作者 李喬 漢羅翻寫：李珊伶、劉敏貞 2012.08.12

　　白亮燒暖ke日頭，忽然間暗下來。Liá m̀像南國九月ke天氣，m̀過，下晝一下驟雨應該係m̀會少ke. 他teû最驚狂裂ke驟雨，因為liá下 他teû過ke幾乎完全係露食露宿ke日仔。

　　驟雨無來，「阿沙逋路」就行出「慰安所」掛滿偽裝樹葉仔ke大門。人一轉來，附近ke同伴就圍上去，問長問短。

　　「樣仔？講講看！」

　　「當鮮喔！幹伊娘ke, 阿沙逋路！」

　　「土番娘——比打手銃還強teû吧？」

　　「阿沙逋路」面hong, 好像無留下歡樂ke痕跡，顛倒有一團會落雨ke陰霾。Liá-ke模樣，m̀像係「阿沙逋路」ke, 除非實在過勞——太燥啦！

　　大家認為「阿沙逋路」會有精彩ke「大本營發表」——報告戰果，má人知，他竟像塞班島ke守軍，一片「玉碎」ke沉寂。Án-ngiòng大家都遽遽行開。Liá時節，永輝chang問：

　　「你面色m̀好！」

　　「哦！」「阿沙逋路」一愣，然後一哂：「全宿霧ke人，má人面色有好ke !」

　　「喲！脾氣án大？樣仔？你落荒逃走係無？」

　　「幹伊娘，mak-ke意思！」

　　「福佬屎，你莫開口閉口就幹好無？」永輝講。

　　「去慰安所還幹m̀夠？」

　　「幹伊娘，操伊娘！我到慰安所有幹無幹，oi你客屎管？」

　　「Mak-ke? 阿沙逋路！你講你無？……」

　　「……」

　　「阿沙逋路」拿兇巴巴ke目光刺過來，像oi拚命樣仔，m̀過一瞬間，ke一閃兇光消失，他投降樣仔在澎、周兩人面前，大大方方露出自家ke軟弱——敨了口氣。

　　其實，三人相處得m̀會差，永輝在敵機臨空ke時節，為到衝出掩護「阿沙逋路」，sṳ-fut sṳt pûn炸彈ke爆片削thet一塊皮肉。M̀過，他ke三句不離「幹伊娘」ke習慣，真pûn人受m̀了。

　　「好像……搞得m̀爽快？」永輝無再講笑。

　　「Liá安到觸景生井！」阿沙逋路講。

　　「觸景生情啦！」周糾正他。

　　「見到熟識人？」

　　「幹伊娘咧！」

　　「幹你老母啦！M̀靚？」

　　「還做得啦！」

　　「有台灣人無？」

　　「阿沙逋路」搖頭。到底上了無？周問。他輕輕點一下頭。Ke，你……還豬肚面樣仔，m̀夠啊？幹伊娘咧。周大大ke不滿。