《李喬小說─孤燈》

 | | | 轉寄

三、海天萬里(8)

作者 李喬 漢羅翻寫：李珊伶、劉敏貞 2012.04.15

時間，好像停頓了，在liá片，日夜ke遞換，已經失去意義；m̀過，時間還係一分一秒過去。船隊流浪了比原本ke時間多一日以後，「鳶丸」-單淨liá一隻運輸艦總算奉命登陸「宿霧島」。（*有音譯「雪普」或者「塞布」者。） 　　

宿霧島在雷伊泰島ke西面60浬，隔一條狹狹ke水道，西片係「尼格羅島」。本島係由西南朝東北方向ke細長海島。一座山脈貫穿全島；宿霧基地，在中部偏東南ke山脈東片ke細平原hong. 　　

Ke片本旦淨有一座簡陋ke補助機場；liá下，戰局勢態演變結束，它ke重要性當遽增加起來。 　　

宿霧島有屏障雷伊泰島，支援戰鬥時像翼甲ke保護作用，雷伊泰島lâu海灣，將來係敵我必爭ke 重要地。因為，新幾內亞，拉巴烏魯等已經一ke接一ke失陷，假使雷伊泰島pûn人佔去，補給前方ke通道pûn掌握，án-ngiog日本50萬大軍就會pûn截斷在菲律賓南面，陷入孤立無援助ke情形，將遭到全部滅thet ke厄運。 　　

另一方面，雷伊泰海灣係呂宋ke門戶；呂宋就係進攻日本本土ke跳板。假使做m̀得保住雷伊泰，菲律賓伸手就得到了；菲律賓失thet, 大日本ke根本就有動搖之虞！Liá種勢態，敵對雙方完全明白；ke日日軍取得菲島，故所做得在全太平洋想做mak-ke就做mak-ke, 就係另外一ke解說。 　　

故所宿霧防務加強當遽；擴建道路網，整修飛航機場成為第一優先ke任務。 　　

他teû 在凌晨時分登陸。意外ke, 寒意濃重ke西南風直直撲過來，liá-teû又肚饑又渴過度ke青壯後生人，已經係又瘦又烏，就像髑髏。 　　

他teû長期無行動，liá下忽然間置身在凜冽寒風中，有teû跳下船或者pûn súng下灘頭以後，實在hong m̀起來ke, 就án-ngiòng隨浪飄走；做得完成搶灘行動ke, 連爬帶挪來到踏實ke沙灘後，一儕儕都眠下來。 　　

「Pa-ga-ya-ro(咒罵語)！M̀-oi命啦！」 　　

Ke-teû帶隊ke大兵，向僵硬趴在地泥hong ke他teû拳打腳踢，m̀過，逐儕人連本身閃開力氣都已經消失。 　　

最尾採取權宜ke辦法：tui防戍部隊送來二十幾桶淡水，還有一teû乾糧，liá正pûn 他teû有力氣khî起來，行向目的地。 　　

他teû行到宿霧基地ke時節，四圍已經一片昏暗；聳立機場西面ke山巒巔hong, 還有一teû泛紅ke夕陽。 　　

「無死呵！」講話ke人，面hong有了笑容。 　　

「哈！總算碰到陸地啦！」講到liá片，sa蹲下來，像頑皮ke細人仔，拿起一團泥土，揉tén,撫tén,惜tén…… 　　

「你teû搞mak-ke ?」永輝內心忽然間冒火。 　　

「嘿嘿！搞泥巴嘛！我惱海水，泥土正好。」 　　

「又m̀係你ke泥。」 　　

「Liá……」liá個人愕tén. 　　

「我係講，」永輝喉頭哽tén：「又m̀係你老家ke泥！」 　　

啊！故鄉ke泥，mak-ke時節再碰得到它喏？