《李喬小說─孤燈》

| | | 轉寄

二、送行 (5)

「好啦!」明青向大家使個眼色:「我喚明基lâu福興講,oi他遽遽轉來。」   

Chhin明顯,福興嫂-靜妹ke心神有teû混亂。係思念老公變成án-ngiòng ke?還係肚饑ke煎熬pûn她án-ngiòng?   

「福興嫂!」明基輕聲細語ke安慰她:「請放心,我會想辦法去尋福興哥,oi他遽遽轉來-m̀過,妳自家oi保重,好無?」   

「好啦!好啦!嘻嘻!」笑聲,好像明森哩。   

「細人仔,oi看好,知無?」明青講。   

「Oi餵飽細人仔喲。」   

「係無好食嘛!會餓死了!」   

「蕃薯呀!弄teû蕃薯充饑。」   

「無啦!我m̀會種……嗚……」哭了起來。   

明基lâu大、二哥參詳後,lâu做當晝飯ke蕃薯乾全拿出來,交pûn福興嫂。   

福興嫂又哭又笑地,轉身轉橫坑去了。   

「福興嫂!」明青喊:「妳teû兩子ôi係無東西食,就到蕃仔林來!大家then手,m̀會pû你teû餓死ke!」   

「好啦!好啦!我家福興oi轉來leh!」   

阿貞看到liá-teû,又掩著面,躲到後背去了。   

明基心頭,塞上一團濃濃ke茫然。   

Liá下,唯一安慰ke係,自家還màng結婚;老阿姆有大哥他teû奉養;大哥四十八歲了,應該m̀使長久外出奉公吧。   

「阿華,會到庄役場前送我嗎?」他想。   

老實講,她在昨暗晡應該來蕃仔林正對;還oi顧忌mak-ke nò? Liá次ke分離,十、九就係……做mak-ke她m̀會把握liá難得ke相聚?   

無定著,在她少女ke矜持,或者怪自家m̀利用時間去看她,lâu她多聚一聚喏。   

係án-ngiòng嗎?假使係án-ngiòng,ke真係pûn人當懊惱。M̀係嗎?此時此地,她還oi mak-ke少女ke矜持-擺架子?   

故所,昨晡日lâu永輝去跋鷂婆嘴,也係一種發洩,一種報復ke自虐!阿華,樣仔做得án-ngiòng冷漠喏?阿華,妳真係無情ke細妹仔嗎?或者另有……   

「M̀係!無應該lâu她想成án-ngiòng.」內心又浮出反駁ke聲音:「做m̀得án-ngiòng想她,liá thet侮辱她了。」

阿無,她到底係樣仔ke細妹仔喏?   

她最少,應該知liá打早,趕來迎他,接他,然後在街hong, 公然地送他出征正對!他想。她,阿華,正經就在面前-大湖街入口,「社寮角」ke茶亭hong等他喏。