《李喬小說─孤燈》

 | | | 轉寄

二、送行 (3)

作者 李喬 漢羅翻寫：李珊伶、劉敏貞 2012.01.29

在伯公廟ke片，已經集合一羣出征lâu送行ke人；永輝兩公婆、他ke爺ôi，二叔、三叔lâu二、三房ke老弟老妹，大姊、姊丈也在 ke片。另外係謝添丁lâu許阿康兩家ke人。 　　

謝、許兩人，lâu永輝共樣，都係「勞務青年團」ke身份。 　　

Liá下 他teû會搞khiung-ha,講tén講tén,好像內心放寬teû. 　　

「喂！大家啊，行咧！」明清在liá羣人底背，算係發司令ke人物-四十八歲了，第二代ke蕃仔林人底背，他係最pûn大家尊重ke. 　　

永輝lâu阿貞lâu大家打過招呼後，緊遠離人群，兩公婆細細聲講話，難分難捨。 　　

阿貞chang滿月ke妹仔，分家娘背tén,thèn到liá片來；其他二、三房無在外「奉公」ke阿叔、叔伯兄弟，lâu 阿叔姆都送到liá片。 　　

Liá-teû人下了崎，來到岔路口時，堵好堵到大南勢、細南勢ke出征人羣。Án-ngiòng變成了一ke大隊伍，浩浩蕩蕩向大湖街開去。 　　

Liá片到大湖街，有六七十分鐘ke路程；係順tén細河石壁間ke彎彎斡斡陡斜細路仔。 　　

阿貞行a當慢，m̀係山路難行，ke係故意ke;希望liá段崎嶇細路仔無限延長，lâu永輝一直行落去。 　　

永輝祇好tui隊伍落下來等她，她ke右腳尖pûn橫在路sùn ke樹枝勾到,一ke踉蹌，她竟坐了下來。 　　

天màng光ke山風呼呼，強一下弱一下；寒天ke霜氣一陣一陣撲來。 　　

「Vang倒啦，細義哪！」永輝走轉來扶她。 　　

「阿輝……」她趁機會緊緊牽lún永輝ke手。 　　

永輝扶起她，oi抽囘手，她m̀肯放。兩個人就án-ngiòng擠tén,擁tén行路。 　　

永輝一句安慰ke話都講m̀出來，單淨lâu她ke手捏得麻麻辣辣。他teû m̀ chhap人家笑話他teû啦。 　　

喔，永輝，你就捏緊teû, 你m̀好放開呀！我 oi你就án-ngiòng捏tén…… 　　

她在內心呼喊著，祈求著；ke又m̀爭氣ke流目汁，又潸潸而下；燥燥ke冷風迎面一吹，kûi面又麻又僵。 　　

「妳在想mak-ke?」 　　

「……無。」 　　

「我看……chhin遽就做得轉來。妳oi寬心。」 　　

「好。你oi保重……」她伸手檢查永輝掛在肩頸hong ke靈符。 　　

永輝ke背板當寬，手臂肌肉凸起，肩頸當粗，腰幹當硬，大細腿肚毛茸茸ke,又粗又黑；lâu他阿爸一ke模樣，係一個鐵打ke農家子弟。