《李喬小說─寒夜》

| | | 轉寄

人禍天災(14)

  莊子對面,平常日時頭聽m̀到ke溪水流動聲,liá時節忽然出奇ke響亮起來。Yi像山洪注入,溪水膨脹ke結果;其實遠近山崗樹林都正山風轉強擺動定定。

  天項ke雲層,mò窮mò盡,綿綿密密,滾滾ke去又滾滾ke來,ko越滾越多,越尖越低。做門板岩高插雲天ke頂巔完全pûn吞噬,續等再掩蓋大半隻胸膛時,該稀薄淺淡ke棉絮,忽然間yi像pûn mak-ke mò形ke巨掌一托,竟然紛紛往上翻捲;巨掌ke力量當大,連墨黑厚實雲層經liá衝擊,也划一ke弧形往上彈跳起來,朝還啊高ke上空捲滾上去……

  雲層提高以後,天頂再度明亮起來;見m̀到日頭,但he雲層ke邊緣,群山ke頂巔顯得特別鮮亮清楚,盡像正雨霽天晴ke景象。Yi像變天m̀成,又he朗朗乾坤。

  M̀過正當時,ti門板岩外側,盲仔潭上空,該盡麗亮晴朗地方,忽然間掀起一條上下縱列,桂竹竿án-ngiòng大細ke淡淡雨柱…… 雨柱一開始正一丈零長,豎立等由北向南急速移動;移動一段距離後,雨柱tui鬆散ko消失,然後又形成還kha濃還kha長ke雨柱,ko移動速度越來越遽,越遽以後雨柱越密越巨大。

  Liá就he「竹篙浪」。天頂出現「竹篙浪」,就做得確定he颱風開始登場了。

  Tui溪口該片,貼地捲來陣陣狂風;狂風化開後m̀單只勢力m̀減,顛倒就地滋生,形成還kha大還kha烈ke風暴,向草木房屋衝撲過來。

  該央時,「竹篙浪」ke長度既經伸長數倍;上段接到漸漸仔轉淡ke高空雲層,下段掃及草木枝葉。Ti暴風ke摧擊下,「竹篙浪」ke下段分散了,又歸身斜斜。

  Ti「竹篙浪」ke傾斜度越來越大,到達四十五度角以後,它忽然間pûn沖散失忒雨柱形狀了。Liá時節雨柱化成漫天斜斜拋灑ke「鹽粒」,就像道士作法時,向四方虛空拋灑鹽粒,講he清除污穢用迎接神仙靈駕án-ngiòng。

  漫天拋灑鹽粒ke儀式,幾分鐘就結束。Liá時節風勢用每一陣一ke倍數以上ke勢態一直增強;liá-ha m̀ he一陣陣、一股股ke暴風,he mò帶雨滴ke立體ke一垤垤ke,無窮巨大ke「壓力」,不斷湧到、不斷壓迫過來。

  「休唔……休唔……」竹尾樹尾一截一截pûn扯斷吹走。

  「忽呼……忽呼……」屋壁屋頂不斷發出掙扎ke喘息。

  真正ke颱風,差m̀多ti當晝頭,正用堂堂ke陣容襲擊蕃仔林庄ke房屋同田園。

   Liá日he光緒十八年農曆七月廿六日。He中臺灣三十年來盡大ke一場風搓風災。

  蕃仔林庄ke每一儕人,mò ko試著肚飢,mò ko試著炙熱,也「m̀知」風勢ke襲擊,單淨專心一念ke,注視風勢,注視茅屋ti風雨襲擊下,可能he盡脆弱ke部位,用適當行動ke姿勢企ti屋肚,準備隨時搶救該盡脆弱ke部位。

  黃阿陵lâu劉阿漢liá一棟茅屋,面積盡小地勢盡低,又he最新ke,故所歸下晝,看來都還抗得過去。阿陵命順妹同兩個孩子做伴——阿哥阿江ke一男一女——守ti眠床項。順妹ke肚屎既經凸凸ke看得出來啦,m̀好讓她動粗重ke;阿陵提醒她:萬一茅屋倒了就帶等孩子囥入眠床底;lâu孩子揇入胸懷,自家圓身縮作一團,雙手護好頭那……

Kì-teû ke屋仔坐東朝西;因為左右兩邊有彭蘇二家ke屋仔護等,屋仔正面迎向正西——tui盲仔潭該片順等河床滾入竄上ke暴風直sùng過來,故所正面受風最重,阿漢公婆lâu阿陵就緊緊守等屋仔ke正面部分。

「該片……m̀知樣仔?」燈妹憂心忡忡。

「嗯,該片kha舊……」阿陵續等講。

阿漢mò講話。其實他ti天人交戰。他知liá間新茅屋kha安全,至少目前m̀會有危險,自家應該過去看看該片,特別he oi去向老人家表示一下關切之意。嗯,老人家。想到老人家,心肝肚就辛辣苦澀ke滋味齊來。他,實在mò辦法完全抑制自家。

「過去吧。」燈妹向他細聲講,還投過來憂悒ke一眼。

「嗯。」他知。他完全做得體會燈妹ke心意。

天色一片晦冥。M̀知幾點鐘了。阿漢吸一口氣,講一聲「你兜小心」,轉身就tui灶下後門衝出來。

堵好一股暴烈ke風團sùng過來。他修長細瘦ke圓身,一下pûn拖動幾尺,然後硬pûn súng倒地泥項。他腰肢一挺跋hong起來。M̀過暴風像當多隻木棍橫面不斷毆擊過來。他mò辦法企好;只好認清方向朝彭家手腳並用爬行前進。

Mò辦法,mò辦法透氣。該近兩丈ke石階,仰仔也過m̀去,正khie̍t上去,又pûn súng下來。M̀過他知暴露在外越久,斷枝碎木抑he飛起ke石塊打中ke機會就越多。四肢並用還m̀-la,只好雙肘雙膝也用上;爬行mò辦法前進,他總就壓低姿勢胸膛貼地,用蛇行爬挪來行。