《李喬小說─寒夜》

| | | 轉寄

出草,著天釣(12)

  人傑yi遽就lâu燈盞點著。彼此一照面。看大家pûn嚇著該樣子,就還kha心寒膽惇。

  人華稍一定下神來,衝出門外,揮起伐刀就猛撞掛ti屋簷下ke山鋤。

  鏘!鏘!鏘!鏘!鏘……

  「停手!你發癲咧係無!」阿強伯跳出門外,猛一抓人華ke手髀,lâu他拖入屋肚。

  「敲!敲打!喊kì-teû來,來救啊!」人華嚇得語mò倫次。

  「救mak-ke?亂來!大家安靜——你兜兄弟,提起伐刀,守等前後門,lâu火烏忒!」阿強伯沉著ke指揮守備。

  「Ên m̀、m̀ he,he oi去石輝伯該片躲?」人秀問。

   阿強伯m̀吭氣。屋背——莊仔上端。繼續傳來鑼聲;m̀過m̀ he緊迫情況ke信號。

  差m̀多食一碗冷粥工夫後,屋背傳來重重ke腳步聲。大家憋住呼吸。準備拚命ke時節,外背傳來呼喊聲。

  「阿強伯!Mò事吧?」he蘇家兄弟。

  來人到了門外正點著火把。原來he一羣提等伐刀鞘刀ke後生人。

  大家看liá片mò事,都笑了。剛下ke鑼聲,he「上蕃仔林」該片,yi像有動靜,故所歇在最上段ke詹阿古家發出警號。

  「Ngài看,還he到吾屋家吧!」許石輝也趕來了:「或者到阿錦哥該片也做得。」

  就án-ngiòng。彭家大細決定攬等被舖,到許家過夜。

  也就ti大夥行到許家ke時節,「上蕃仔林」ke細路仔,同斜坡地下段,來往大南勢ke條路,有大隊人員行動ke聲響。

  「打啊!緊打銅鑼!」許石輝ti大門,雙手作喇叭狀,湊在嘴唇大聲呼喊。

   Án-ngiòng,全莊幾下隻銅鑼同時響了。

   Mò奈家點燈火,也mò麼人講話。

  逐家緊ti打鑼,lâu外背ke腳步聲全掩忒了,鑼聲成了連綿m̀斷ke鏈仔,緊響等響等,ti蕃仔林ke草叢林梢,谷底溪畔,糾纏等迴響等……。

  Liá-he警告ke鑼聲。也he pûn自家壯膽ke鑼聲。

  鑼聲ke來源挪動等。He往許家集中哩。半個時辰以後。本地六戶五十多人都會集ti許家;許家頓時尖滿了男女老少。

  「好啦!每班十人,兩枝銃,八把刀,夠了,大家安心睡吧!Oi『跌三烏』也做得,m̀過莫大吵大鬧,害別人做m̀得睡。」許石輝宣佈講。   彭家ke人。Pûn安排到許家大賴仔間房底背;十幾儕人,就sùi-chhai oi坐ya-he oi睡在地泥項,安頓下來。

  阿強伯斡頭看老伴一眼。然後ngiap目養神。阿強婆看兩個細孫仔睡地泥,就lâu披在身項ke棉襖拿下pûn蓋上。

人傑緊緊lâu墊等ke麻袋遞pûn阿媽,自家lâu良妹蓋一件兩個合併ke大麻袋。

  人華lâu芹妹早就睡到死死ke了。芹妹熟睡中。鼻翼還一抽一抽地,顯然剛下he吞聲暗泣過。

  人秀靠ti老阿媽背後,蓋ke he一件破舊ke隘勇外套。人興去看「跌三烏」。pha也順續看做得做m̀得lâu阿枝仔講一兩句話吧。

  燈妹孤伶伶一儕人,攬膝坐在臥室盡底背離尿桶不遠ke地方。她mò披蓋mak-ke,單淨用一塊黑手帕護等頸根;瘦瘦ke圓身,彎彎ke縮作一團。顯得格外單薄。她,目珠擘大大,mò想睡ke跡象。

  鑼聲,m̀知mak-ke時節停歇ke。

  外背也mò ko傳來mak-ke可疑ke行動聲響。

  Liá-he彭家來到蕃仔林,第一ke大年夜。

  夜深了。實在thióng寒。燈妹猛咬牙,憋住呼吸,全身用力一掙又一掙ke,手腳十指死命ke彎曲收緊,看啊做得做m̀得驅寒。M̀過,她還he忍m̀核連打幾下隻哈啾。