《李喬小說─寒夜》

 | | | 轉寄

隘勇个日仔(5)

作者 李喬 漢羅翻寫：Suingi 2009.05.31

看起來，Liá擺，「加里合彎社」，m̀像出草。Kha像he表明oi相chhṳ̀，然後he「洗庄」吧？他緊行緊想。他往河唇義民廟行去；他知阿陵定著ti ke該片。

阿陵果然ti焚化爐唇。四五儕人都著等隘勇專用ke草黃色「外套」，打共堆聊「跌三烏」——用三個銀角。逐擺人輪等仔跌；三陽面全勝，三陰面全輸，兩陽一陰小勝。一陽兩陰小輸。

「阿漢，kiak來跌！」阿陵有兜phài勢，搶等先講。

「你又玩liá。」他一直反對阿陵賭繳。雖然自家下擺仔乜會搞。

「唉！無聊嘛，ngài又m̀ he……」

「阿陵哥……」他搖搖頭，他講m̀出mak-ke，他m̀忍講。

「劉阿漢，你別假會好mò！」一ke隘勇就瞪他。

「哼！人家he oi帶錢入坑仔。」

「哈！劉阿漢就he看m̀開ke憨鳥！」

「姓劉ke，mò án憨，有好啉，啉落去正he自家ke；有好搞，就搞pûn它爽快！麼人知天光日，頭那，還ti自家頸筋頂高mò？哈哈！」

大家你一言ngài一句，冷冷生生緊嘲謔他。阿陵心焦焦ke定定仔企起來。拍厥肩頭；兩人轉身離開。

其實義民廟內外，一堆堆ke隘勇，都ti搞「跌三烏」，連供桌下也尖等幾儕人。大大聲緊喊，鬧熱滾滾。八十多人。Yi像都集中ti liá片。

「三烏一斗來呀！」

「哈厥姆ke——三烏嘛！」

「呵呵！三烏三烏！嘿！拿來，統統拿來呀！」

Liá-he mak-ke地方？豪情萬丈。熱烈歡暢。Yi像mò憂愁ke太平歲月；爺娘ke愁慮ke面容，哺娘子ke盼望神色，ke he夢中ke事；出草tok頭那。白雪雪ke蕃刀，紅吱吱ke血花，ke也he以後ke事，天光日ke事。或者入夜以後ke事。把扼liá悠閒ke一刻歡樂再ko講。

Liá就he隘勇ke生活。

他lâu阿陵行到宿舍側角榕樹下；附近mò人。他想一下正講： 「阿陵哥。Ngài想……你還he轉去好咧。」

「Ngài？又喊ngài轉去？」阿陵顯然當意外。

「Liá擺yi像不妙。你做m̀得冒liá個險。」

「哈!你就做得？」

「Ngài lâu你講過，ngài he單丁子。」

「Ngài，ngài有契約呀！想走走仔得mò?」

「Ngài sṳ̀講……ngài來……頂替你。」

「……亂講！」阿陵目珠轉啊幾轉正想通。