《李喬小說─寒夜》

| | | 轉寄

東洋蕃來了(7)

  幾下日,他緊囥ti間房m̀走。狠心ke燈妹卻輒常看m̀著人;yi像走上走下煮飯洗衫去啦。He,燈妹當積惡。燈妹m̀惜小阿銀。燈妹又ti過日仔了。

  「阿漢,mò ko ti該片pot-tok-ngok了。」燈妹yi像恁仰講。

  「阿漢ti pot-tok-ngok?」他想。

  「人家,人家罵到當難聽了。」

  「麼人罵?罵mak-ke?小阿銀mò罵阿爸就好。」他ti心肝肚應。

  「有聽著mò?阿漢!」

  燈妹伸手搖撼他ke手臂。他用力一揮。燈妹圓身一偏,伏倒ti眠牀項。燈妹掙扎而起,然後跍ti牆角嘔將起來。燈妹仰會緊嘔喏?

  又過了一日。打早,阿強伯,彭阿強,該燈妹ke養父,丈人老好恬恬仔行入間房來,mò頭mò腦ke大聲講話。喔,he ti罵人,he ti罵他劉阿漢。他,劉阿漢,呆呆,mò應嘴頂撞,也mò表示mak-ke。

  阿強伯氣沖沖走開後,阿漢發覺燈妹thak等衫帕企ti脣項。燈妹ke面色當蒼白,歸隻目珠卻紅紅。

  燈妹一擺又一擺鼓足勇氣,oi lâu老人家交代ke話講清楚。M̀過阿漢ke目光一掃過來,她就講m̀出話來。Liá兜年來,對於阿漢ke脾性,她既經相當清楚;阿漢he一個看來溫和實際上he十分激烈ke人,外表隨和,內心卻極端固執;yi像mak-ke都逆來順受,m̀過一旦事實lâu原則相違背時,他會m̀遲疑ke決裂而去。

  該,阿爸ke話,原原本本轉告pûn他,極可能他就正經對峙下去,甚至於雙方拚起來。M̀過,m̀講,又仰仔同老人家交代喏?老人家講:

  「Lâu若老公講:今晡日m̀上山,晚飯就mò愛食了。」

  燈妹mò辦法ko講mak-ke。老人家也mò pûn她ko申說ke機會。她單淨有lâu語氣改柔和兜仔,lâu阿漢講看啊:

  「阿漢:阿爸講,今晡日定著oi去做……」

  「……」阿漢ke眼神還he空空茫茫ke。

  「阿漢:ên m̀去做,就難了,就m̀ pûn ên飯食了……」

  「唔……」阿漢yi像吞了一口口涎水。

  「單淨oi ên……阿漢;ngài,ngài又……」她講m̀下去。

  阿漢ke目珠總算轉動了一下。目ngiap-ngiap仔,燈妹看著一絲森森凜冽ke寒光。她,m̀多知仔背板寒寒。

  她到屋外牆脣拿一把钁頭,塞到阿漢手項。阿漢看她一眼,yi像清醒當多,khâi起钁頭就向外行去。M̀過行到小山澗ke竹橋項,對等屋背ke崎,人又木然企ti該片。

  「去呀!阿漢!」她哽ti喉嗹頭該句話,總算脫口而出:「老人家家講,mò上山,晚飯就別食了

  「哦?」阿漢yi像著驚ㄧ下。

  「去吧!阿漢,為ngài,還有……」她頭那磬下來,看自家ke肚屎一眼。

  阿漢liá回聽話了,正經khâi等钁頭向崎行去。她總算鬆了一口氣,她趕緊到菜園淋菜。