《李喬小說─荒村》

 | | | 轉寄

三、無限江山 (2)

作者 李喬 漢羅翻寫：劉敏貞 2010.07.04

—日本領台後，除thet沒收義民田地為官有，或者台奸趁機侵奪民產外，正經有計劃奪取台灣人土地係在1910年，明治四十三開始。

Liá年，總督府下令五年內完成所謂「林野調查」，確定官有lâu民有ke林野。結果，民有地單淨有569大一甲，官有地sa有918775甲。

Liá-teû官有地，實際上全係農人向當年墾戶買斷màng辦過戶手續，或者聯名土地時，日仔太久地卷m̀全，或者所有權權狀màng經政府認定等等ke民有土地。Liá-teû土地現在「依法」算「官有」。

因為liá-teû土地從頭至尾都在原來ke耕作人實際使用中，當局用「善意佔有」，名為「緣故林」或者「保管林」，單淨oi完稅，相同准他繼續使用，單淨係m̀承認他teû ke所有權。

實際上，liá-teû山林土地在民間相同不斷買賣交易；m̀-ku都係口頭立約，或者私人ke雙方契約。農民m̀知，自明治三十二年(1899)起已經規定，「官有地」ke開墾lâu讓渡，必須經過「官許」正有效。結果二十年後，農民liá-teû土地大都變成「無斷墾地」lè.

1915年，大正四年起，又推行「官有林野整理」，直到大正十四年(1925)正完結。整理工作係 lâu官有林野區分為「要存置林野」lâu「不要存置林野」；ke-teû列為「不要存置林野」ke保管林，無斷墾地，當局勒令佔有人備款承購；不能承購ke, 就實質上ke沒收。

就像明治四十一年(1908)以來，在竹山、斗六、嘉義三部ke竹林lâu造林地一萬五千甲就「依法」歸在三菱製紙會社。其他像：新式製糖會社所支配ke土地有七八六0一甲，日本拓殖會社在新竹州下擁有水田三千甲，台東拓殖會社約佔二萬甲，三井合名會社佔茶園一萬七千甲，又，國家資本經營ke樟樹造林地三萬五千甲，阿里山、八仙山lâu宜蘭官營地八萬三千甲，大學實驗林十三萬甲……

其他像大湖郡下南湖，大細南勢ke細細無斷墾地，面積太細lè,從頭至尾màng pûn日人ke財閥會社看上；直到大正一四年(1925)正厄運臨頭。

原來，大正一三年(1924)九月，伊澤多喜男繼內田嘉吉新任台灣總督。Liá人上任前在東京對記者發表治台抱負時，內容有sit-pá犯到當局忌諱；同年十二月廿九日，伊澤在提到「統治方針」時講了án-ngiòng ke話；「統治無用一五萬ke日本人為對象，應該用三百六十萬台灣人為對象；還有台人從來恬恬無講話，故當政者必須在無聲處聽取，在無形中審視……

Liá段話，竟使在台日人悲憤異常，引為奇恥大辱；責難之聲四起，紛紛向日本政界告密……

大正十三年(1924)十二月，總督府改制，裁減官員一百三十餘人，加上地方官廳總數達數百人。

Liá時節，伊澤因上任ke發言pûn人曲解，誣用袒護台灣人，排斥日本人，故所無奈何委曲求全；掠奪台人ke權利，甚至生活根基來討好日本人。Ke就係大正十四年(1925)起至一五年一二月止，用象徵性ke價款，將三千八百八十六甲餘工地，「拂下」pûn三百七十個退職官員惡行ke由來。

大湖郡下，大細南勢lâu南湖地區，林華木、古阿龍、彭金城等二十九家自前清時代就有ke土地三百零二甲；劉俊梅、劉阿漢等三十零家二百四十餘甲山野lâu沙埔地，就係 pûn列為「拂下」田地內ke犧牲品。

「一再重複，就係一再重複……」老妻燈妹liá句話，liá幾日來，不時在耳公邊、腦海深處襲擊他。

M̀-ku,歷史折磨lâu人生諸多劫難ke阿漢，面臨liá歷史性ke時節，相同鎮定，冷靜面對liá-teû內心chang想食他 ke肉、拔他 ke皮千百次ke仇敵。

今晡日，溫度無高，在四圍山巒林野環繞ke片，就係日近當晝，還係涼涼爽爽。

「唉……」阿漢俯仰天地，再一眺望四圍ke景物，心坎深處忽然刺痛起來。

「來lè !」明青發現來人。

山路ke一段有兩個人向liá片行來；一高一矮；高ke佩掛「油抽仔」(巡查ke佩劍，外形好像tui煤油桶抽吸煤油引進罐仔ke油抽仔，故所án-ngiòng講；有調侃，羞辱ke味蓄，乙種巡查不得佩劍)；另外一ke也係一身烏烏ke巡查服，m̀-ku無佩掛「油抽仔」。

「係鍾益紅lâu李勝丁。」Ke 係永遠糾纏在後背ke鬼影仔。阿漢一眼就認出來。

「呸！走狗！揉死他！」有人吼起來。

「莫出聲。你m̀記得ên ke計畫？」阿漢迎上去。

「高大ke鍾益紅，通紅ke面hong掛tén chhin多汗珠。阿漢昂然迎上來ke氣勢使鍾一愣；鍾煞住腳步，一片掏手巾拭汗，一片向liá片張望。

「啊！你teû ?……」

「大細南勢，二十五家，差m̀多有七八十人。」阿漢講。

「你teû oi做mak-ke ?」鍾ke面色一沈。

「喂！劉阿漢， 他eû蔗園上ke牌仔，mak-ke意思？」李勝丁也插上一句。

「Liá,都係你弄 ke？」鍾冷笑一聲。

「我屋家ke蔗園上ke,係我插ke,其他ke, m̀知。」

「你領導ke !」

「M̀ 係。」

「Ke你ngióng般在liá片？」李問。

「我來看鬧熱阿！你teû又做mak-ke oi來？」阿漢不慌不忙講。

「講！má人領導ke ?」李兇起來lè.

「無時間問liá-ke lè.」鍾kín往後看：「劉阿漢，你喊大家遽遽 lâu蔗園上ke標語拔掉，人，遽遽去躲起來！」

「我憑mak-ke喊大家？你自家命令好了。」

「你係領導者！m̀好記m̀得你係累犯，一ke『oi監視人』」！

「我 m̀ 係領導者。」

「Ke 係 má人？」李問。

「土地。」阿漢笑tén講：「土地自家，它teû m̀肯落入強權之手，係土地在領導大家阿。」

「？……」鍾lâu李都一時愣住lè.

阿漢講thet,慢慢轉身，退到人群底背。Liá時節鍾chang大喝一聲chhin譴講：

「大家聽tén，無拔掉標語ke,今晡日就全部關起來—遽！」

無má人再應。自阿漢、林華木以下，所有ke人都雙手攬胸前，兩腳分開企在ke片，冷冷a看tén鍾lâu李。

「Án-ngiòng做m̀得……」李慌lè.

「我自家動……」話màng講thet, 鍾sa冷凍在ke片，因為ke-teû主人到lè.

行在最頭前ke係庄長謝長清。謝庄長四十零歲，修長有圓身，著熱天白色西服，白色草帽，白皮鞋，看起來優雅又高尚；他一面拭汗，一面頻頻回頭招呼主人。

Liá-teû官界退職下來ke「主人」，果然氣宇風度不凡；他teû全部著短袖白襯衫，白色短運動褲；白皮鞋配上白長襪，頭hong戴ke 係雪白ke「烏魯昧道」(鋼盔形，寬邊，硬質夏帽；習慣上，只有高級紳士正戴用)。

Liá一帶ke老少居民，從màng見過án多頭戴「烏魯昧道」ke人物。

特別係他teû人手一枚拐杖；ke杖頭ke細丁字鎬，在當晝ke日頭照射下閃a精亮ke白光，pûn人目眩神搖，無論如何，不能逼視……

「Mi-na-san(各位)：目的地ta！」謝庄長透一口氣，用流利ke日語向主人講。

「哇！奇醉！」Ke-teû主人紛紛喊累。

「鍾桑！ke-teû標語……」謝庄長恭恭敬敬ke問鍾。庄長在甲種巡查面前，並無mak-ke地位ke.

「他teû m̀理……」

「喔？遽，遽喊人拿出長凳pûn大人坐呀！」

鍾lâu李kín尋人拿凳仔，m̀-ku無má人理他teû. 他teû指名尋林華木，林華木sa m̀知躲到nai底背去lè ;屋底背空無一人，連細妹人細人仔都m̀知去nai位，屋外六七個山中野漢相同橫眉豎眼企tén m̀動。

「劉阿漢！劉阿漢你出來！」

奇怪？劉阿漢也躲起來lè嗎？鍾面色都譴白lè, 單淨自家動手拿凳仔。

其實，阿漢一ke人企在林屋對面路sùn ke雞油樹下；巨大ke樹幹抵到他大部份ke圓身，他chang密切注視場中ke情形。

Liá-teû「烏魯昧道」人物，M̀，單淨有九個定定。他teû都紅紅白白ke,結實健壯，看來lâu謝庄長m̀相上下ke年紀；總係比庄長大khô teû ; ngióng-般會係退職年齡ke官員nò ?

再看：又來一批。Ke批sa係道地ke台灣人：戴笠mà,著草鞋，每ke人khâi一擔新籮筐；他teû膚色黃褐，神情呆板，m̀-ku動作sa chhin伶俐。他teû一放下籮筐，有人tui籮筐底背拿出雪白ke面帕仔，捧tén送到ke-teû「烏魯昧道」ke面前；另外幾個chhin無閒在操刀切西瓜。原來他teû khâi來解嘴燥ke寶貝。

呵呵！Liá批人係來侍候「烏魯昧道」ke, liá批戴笠mà, 著草鞋ke……

「阿！ko-re，宜na !」幾個傢伙解開扣仔pûn南風吹吹。

「哇哈！」有teû人在點頭微笑，chhin欣賞ke樣仔。

M̀-ku,有五六個人好像對ke-teû標語在討論mak-ke, 然後又指指點點阿漢liá群人。

「A-re，反對ta，反對na意味！」一個講。

「反對？『吾人……』土地？誓死？」

「誓死wa,決心ta，衙護su-ru-ta !」完全識漢字ke在解釋。

「土地喔，愛著su-ru，宜wa！」

「I-e，i-e !」(m̀係)懂漢字ke傢伙kín搖頭：「反對su-ru-ta，必死ke !」

「So-ga.....」(原來係)

又有兩個「烏魯昧道」過去問謝庄長。謝m̀知oi ngióng般，朝鍾益江kín使眼色。鍾一下陪笑面，一下咬牙切齒。

「A-re,na-ni su-ru?」一ke指著人群問。(Ke片係 mak-ke情形)

「山民，歡迎，歡迎ta！課長桑。」庄長果然機智過人。

「歡迎我？」Liá-ke傢伙直搖頭：「Ta-me-ta！」(m̀係)

「Ta-me ?」庄長果然聽m̀ sṳt.

Liá-ke課長看庄長還係m̀知，竟然改用本地話講lè :「示威，示威行動！」

「示威？m̀ 係，m̀ 係啦！」庄長ke面色chhin m̀好。

「 Liá也正常，嗯？台灣人講ke,人之常情，m̀ 係嗎？哈哈！」 阿漢kín注意liá一幕。無想到來了一ke會講本地話ke日本仔。「人之常情」，無m̀對，liá係人之常情。他激盪ke胸懷鼓滿了火焰，不覺離開雞油樹行了出來。

Ke課長也向他teû liá片行來。幾個戴「烏魯昧道」ke已經蹲在路sùn青草hong食「壽司」便當；他teû無一ke坐長凳ke, 他teû願意坐在草地泥hong.

「狗沆，狗沆啅金川桑！」有人招呼ke課長食飯。 金川課長m̀理會同伴ke招呼，就自家行過來了。鍾益紅手按佩劍lâu李勝丁遽遽kiuk上，還行在頭前。應該係保護主人吧？謝庄長也放下手hong ke食物跈上來。

「你teû，nai位係帶頭ke ?出來答話。」金川還係用本地話問。

「…………」無má人應他。

「Án-nè? M̀敢出來嗎？」金川陰陰一笑。

「M̀係m̀敢。」阿漢講話lè :「我teû無帶頭ke. 單淨係鄰舍。」

「喔………」金川閉上眼珠，沉吟一下講：「你teû, 應該就係 liá-teû土地ke耕作人了？」

「Liá-teû土地ke所有人！」搶tén講話ke 係劉俊梅。

「做m̀得講係你teû ke.」

「係我teû ke. 幾百年來都係。」

「係大日本帝國ke !」金川像鷹銳眼瞪視過來。

「……m̀過，我，係 我血汗開墾，或者金錢買下ke.」阿漢講。他ke喉嗹燥a像焚燒過，硬a發m̀出聲音。

「嘿嘿！依法，liá-teû土地，m̀ 係你teû ke lè.」

「我teû 不服！」

「不服ka ?」金川面色一變，用日語講：「不服大日本ke法律？ko-re死！」

「法律，也oi合天理人情。法律m̀ 係保護強盜惡霸ke……」阿漢講。歐！Liá句話m̀知在nai位聽過lè. 他有sit-pá失神。

「你，罵人？」金川好像聽yit識又好像聽m̀識，忽然間變了面色：

「Lâu你teu講，反抗，就係土匪，oi 弒頭ke !」

「我teû m̀ 係土匪！」林華木也行出來講話lè !

「哈哈！Ke，má人係土匪？」金川竟笑起來：「鍾桑：你teû認真聽：聽他teû講má人係土匪？」

「就係………」劉俊梅脫口講，阿漢sa阻止他講落去。

「你teû看má人係土匪，大人應該最清楚！」

「你teû, 就係你teû！」

人群想oi騷動起來。阿漢lâu華木對大家拼命搖頭，強力暗示大家m̀好衝動；阿漢要求大家m̀ sṳt 再講話。

「土匪！你teû就係土匪？」鍾益紅神氣起來。

「等一下，大人走後，全部關起來。」李勝丁講。

阿漢用力呼吸，眼觀鼻，鼻觀心，lâu外界ke喧囂當作犬吠梟喊。

「哈哈！Lâu你teû講，台灣人：認命吧！嗯？認命ta！」金川慢步行開。

「哼！有一日，狗仔，你teû也oi認命！」阿漢好像自語著。

「你，講mak-ke ?」金川又轉身來。

「我講，大家都oi認命……」

「對，台灣人，永遠oi認命！」金川忽然尖銳ke講：「Ke，liá下，lâu ke-teû標語，全部拔掉！」

無人應，也無thìn動。金川暴跳像雷，還係共樣。金川下台m̀得，竟命令鍾lâu李打人。

「Ko-re-wa……」鍾lâu李有teû驚。

「Nan-da?抗命，或者m̀敢？」

鍾lâu李總算硬ke頭皮向人群行過來。

阿漢再三提醒大家做m̀得回手；講話間，鍾已對面揮過來一巴掌，正落在他面頰上。他猛咬牙，無還手，第二掌又劈下來。

李勝丁也出手lè, án-ngiòng響起一片劈拍聲……

「劉阿漢」鍾又當胸擂來一拳。講：「你係罪魁！」

「我，哼！」

「你係文化協會ke,對-m̀對？」

「對！我 係『文化ke』，你係『御用ke』.」

鍾ke巴掌、拳頭，他係領教過ke ;liá下又像在「體刑室」底背共樣拳腳交加。他緊提醒自家m̀好還手，m̀-ku疼痛ke加深，胸膛ke團火m̀知ngióng仔噴出來lè……
　　
「屌你阿姆！」
　　
忽然間阿漢後背衝出一條人影。阿漢來m̀及做適當ke反應，ke人影已經撲向鍾益紅……


「阿明青你……」係華木ke聲音。


阿漢探手一抓，隨時揪住明青ke褲腰帶，往後一拉，硬生生lâu明青ke圓身提離地面。明青差yit-sit碰到鍾。
　　
「哇！叛亂！叛亂ta !」鍾狂吼。
　　
「遽！遽走！走到山hong ;高熊峠！」
　　
「遽！走thet chang講！」劉俊梅也講。
　　
「做m̀得走！謀刺巡查官……」鍾oi抓人。
　　
「遽！阿爸ke話，敢m̀聽！」阿漢推明青一下。


Liá時節，明青差m̀多也tui狂怒中清醒lè, 翻身鑽進人群，tui後背往山徑上坡走去。

阿漢企在鍾面前，雙腳分開，兩手握拳，擺出攻擊ke架勢。Lâu狂怒ke鍾擋住，李也奔走過來。Liá時節，阿漢ke嘴唇已掛等一片血漬。

「你……」鍾直喘氣，發青ke面扭曲。

「我無法度再忍lè, 我 oi動手了。」 阿漢講：「Lâu 我帶走吧，你莫再liá-teû人面前再打我，激譴大家，結果我 m̀負責。」

「你威脅我？你teû已經係叛亂罪，知無？」

「M̀ 係威脅。M̀聽，你就動手。我忍m̀ thet, 我 oi還手了，正經。」

「……你，你teû先將標語拔下！」

「M̀.」 鍾lâu李正經m̀敢再打人了。他teû一sit水都無飲。他teû單淨只好動手去拔下，並收集ke-teû大細、內容不一ke標語。

Liá段折騰時間底背，戴「烏魯昧道」ke大人，已經飲夠，三三兩兩躲在樹蔭下講笑或者休息。他teû ke修養chhin高，對liá-teû紛擾，好像都無看到， 他teû欣賞山地風光，散步運動ke情趣。