《戀戀台灣客家文學》

 | | | 轉寄

桐花新娘(3)

作者 Suingi 2011.02.13

　　「喂！到了！好下車咧！」

　　公車司機ke大聲胲比喇叭還啊吵！

　　曾有嫻mò奈何ke擘開目珠，頭那暈暈，還想睡目，一下就分武頓車槌ke司機逐（kiuk）下車。

　　「請問這片he？」有嫻吂講煞（so̍t），公車走到mò見影。佢這下正清醒，詳細觀察附近。佢下車ke所在根本mò公車站牌，這片m̀-he樹就he草，佢非常肯定佢這下到某山項。佢忽然試著這公車司機ti開佢愚人節玩笑。

　　打開手機仔，呵！連手機仔都mò電咧！？

　　Oi出門前，佢記得有好好檢查一擺，手機仰一下就mò電咧？

　　連手機仔都oi過愚人節，世界末日到咧！

　　有嫻心肝mò結mò截緊行緊看，冷汗緊流，有一種「衰鳥遇著狂銃」ke心情，ko kha靚ke山景佢都mò心情欣賞。

　　行啊行，mò堵著半儕人，佢開始妄想自家會講鳥仔話幾好，滿山ke鳥仔一定做得同佢講oi仰仔行出去。行啊行，佢試著自家人生就像這下佢行山路樣仔——撞走咧！本旦懷抱理想，去讀台文系，出來續尋mò頭路，誤打誤撞做了飲料調製師，雖然頭家講，會錄取佢，乜有一部分原因he佢有台文背景，但he佢感覺m̀出這兩件事ke相關性。

　　佢試著當悿、當悿，行到目澀澀仔，m̀多知仔流下目汁……

　　忽然，佢聽著當遙遠ke聲，當像緊走過來緊對佢喊：「秋妹！」

　　「秋妹！」一ke看起來同佢平多大ke細阿哥出現ti厥面前。

　　咦……m̀-he幻聽？

　　有嫻睡意一下走淨淨，眼精精lâu面前ke人對看，佢試著面前這隻細阿哥仔he救世主，煞煞拿出地圖：「請問一下，神龍村仰般去？聽講這片有桐花季活動，ngài想……」

　　有嫻唸唸唸唸一大蘿，該細阿哥仔續痴痴看佢，m̀知oi講麼个。有嫻看佢呆呆緊看佢，恅著佢聽m̀識客話，又講起華語：「先生你好，請問一下你知道怎麼去神龍村嗎？聽說這邊要舉辦桐花季的活動，我是從台北來的，對這不熟，你可以……」

　　「這裡就是神龍村……我是志風啊！」吂等有嫻講煞，佢打斷佢ke話，改用客話緊問：「秋妹，妳he秋妹mò？」

　　這擺換有嫻呆呆，佢想：「今日實在he『好日』，堵著癲仔咧！」

　　正恁呢想，眼前看著遠遠白雪雪ke一片——he桐花林！

　　有嫻心情飛揚起來。