《戀戀台灣客家文學》

 | | | 轉寄

短劇：藍衫ke秘密(下)

作者 Suingi 2026.06.21

音樂社社長：敢去就一擔樵，m̀敢去就屋下愁。Ngài當然敢！
(客家社社長lâu副社長兩人對看)
客家社副社長：好，第一題，臺灣客家話yû五大腔調，請講出來！
音樂社社長：(行to臺前，對等觀眾，得意)好得ngài早就yû準備，等ngài成功加入客家社，oi得著藍衫，三下钁頭兩畚箕，簡單啊！
音樂社社長(對等客家社社長lâu副社長)：該就he四縣腔、海陸腔、大埔腔、饒平腔、詔安腔。
(客家社社長、副社長兩人yu對看)
客家社社長：還慶喔~
客家社副社長：四縣腔yu yû分北四縣腔、南四縣腔。北四縣腔講「靚」，南四縣腔oi ngióng è講？
音樂社社長：鬧。(立刻秒答，得意)
客家社社長：北四縣腔講「轉來」，南四縣腔oi ngióng è講？
音樂社社長：歸來。(黏時回答，還啊得意)
(客家社副社長拉社長to脣項，細聲講)
客家社副社長：he ngài問个忒簡單，ya he佢正經án慶？
客家社社長(問音樂社社長)：你聽看啊，ngài講ke he麼个腔？
音樂社社長：北四縣腔。
客家社副社長：該ngài呢？
音樂社社長：四海腔。四縣腔攞海陸腔。
客家社社長(跟客家社副社長說)：mò想著，佢客話mò麼正，對客話án知知。看 來he正經yû心加入客家社。
客家社副社長：(點頭)看起來，oi出較難ke題正做得。
客家社副社長：南四縣腔，又安到六堆腔。Ên lí輒常講ke「阿姆哀」，在屏東佳冬 這片oi變做ngióng è講。
音樂社社長：(行to臺前，對等觀眾，心茫茫)阿姆哀~ngài ngióng voi知~yû人知mò？救ngài啊！
音樂社社長：喔喔！恁仔細！Ngài知咧！
音樂社社長：(轉向客家社社長lâu副社長)阿咪油~
客家社社長及副社長：正經還慶喔~
客家社社長及副社長：請受ên lí一拜。(拜~)
客家社社長：客家社直接交pûn你咧！(扼手)
客家社副社長：客家yû你，yû希望啊！
音樂社社長：噯？
客家社社長：(拿出藍衫)這he ên lí客家社ke精神代表——藍衫。
音樂社社長：liá就he藍衫？哈哈哈！Án nè就得著哩？M̀過，ngióng看起來當普通？
客家社副社長：莫看輕佢唷~人家講，ên lí客家社做得年年打頭名，就he因為這領衫。
音樂社社長：喔喔喔~仰仔講呢？
客家社社長：你yû看過電影《一八九五》mò？該裡肚ke客家婦人家就yû著等藍衫。你看啊~藍衫he藍色，mò就he烏色。著等做事，屙糟kha看m̀出來。
客家社社長：著ke時節，前短後長，án nè做事kha方便。
客家社副社長：衫袖還做得抝折起來，放東西。
音樂社社長：還趣妙喔！
音樂社社長：故所，ngài得著藍衫，音樂社就yû救咧！啊！(揞嘴)
客家社社長：m̀ sṳ́緊張！
客家社副社長：ên lí早就看出你he音樂社社長。
客家社社長：me知你斯為著藍衫來个。
客家社副社長：因為人講ên lí he因為藍衫正打頭名个。
音樂社社長：該ngióng還oi分ngài呢？
客家社社長：其實藍衫盡大ke秘密he客家硬頸艱耐ke精神。
客家社副社長：mò論生活幾艱苦，煞猛打拼就yû希望！
音樂社社長：故所，就算ngài得著藍衫me mò用？
客家社社長：he啊！Oi得著藍衫ke客家精神正yû用！
客家社副社長：同你講藍衫ke秘密，斯因為看著你對音樂社án用心。
客家社社長：你vi tó音樂社，研究咧當多客家ke事情，實在mò簡單！
客家社副社長：當然啊！假使你正經oi加入客家社，ên lí me當歡喜！ (音樂社社長緊搖頭那)
客家社社長：你假使學著客家精神，音樂社定著救得起來！
音樂社社長：實在恁仔細！你兜願意同ngài講藍衫ke秘密。(感動)
客家社副社長：mò，ên lí來合作！客家社lâu音樂社共下招生，用客家音樂社餳 大家來報名參加！
音樂社社長：好呀！
(音樂：桃花開)
(三人手牽手共下行to臺前)