《客語漢羅聖經試讀版》

| | | 轉寄

馬太福音 第二章_1 對東方來訪問ke人

2:1 在希律做王ke時,耶穌已經出世在猶太ke伯利恆城。有幾個天文家從東方來到耶路撒冷,
2:2 問講:「Ke出世做猶太人ke王ke在nai位?因為我teû在東方看到祂ke星仔,就特別來拜祂。」
2:3 希律王一聽到這個話,就著驚,全耶路撒冷城ke人也lâu他一樣。
2:4 希律就召急ke-teû祭司長lâu民間ke經學教師,問他teû:「基督應當在nai位降生?」
2:5 他teû就對他講:「在猶太ke伯利恆,因為先知有án-ngiòng寫著, 講:
2:6 猶太地區ke伯利恆城啊!你在猶太這teû城中,你m̀係最細ke; 因為有一個領袖oi從你該位出來,祂oi牧養我ke子民以色列。
2:7 所以,希律就暗中召見這幾個天文家,將星仔出現ke日期,向他teû問確實。
2:8 然後就吩咐他teû去伯利恆,講:「你teû去,詳細尋ke細人仔;尋到以後,就來報我知,án-ngiòng我也好來去拜祂。」
2:9 Ke-teû人聽了王ke話,就離開;他teû在東方所看到ke星仔又出現,引帶他teû在頭前行,到細人仔住ke所在,就在頂高停下來。
2:10 他teû看到ke星仔,就歡喜到講m̀得。
2:11 他teû入屋肚,就看到細人仔 lâu Kiâ 阿姆馬利亞,就仆落去拜細人仔,然後他teû從寶盒拿出禮物獻pûn細人仔,即係黃金,乳香,沒藥。
2:12 在夢中得到上主ke指示,m̀好轉去見希律,就從別條路轉他teû ke家鄉。