《李喬小說─荒村》

 | | | 轉寄

三、無限江山 (3)

作者 李喬 漢羅翻寫：劉敏貞 2010.07.11

謝庄長係大湖郡世家望族；他ke前三代靠賣樟腦起家，後來又領到「御用商人」ke榮譽，店前掛等ke榮譽，店前掛tén「大湖郡御用達」金字木牌；liá係本郡唯一ke招牌。故所財富不斷增加，他本人又係飽讀漢書又眼光遠大ke人物，在大正五年(1916)，春秋正富ke三十歲，擔任大湖區區長。大正九年(1920)十月改制為大湖庄庄役場，轉任為首任大湖庄長。

謝庄長有語言天份。他ke日本語，chhin遽就講ke chhin「烏」；除thet日本仔，無人能聽出係出自本島人ke日本語。他聲譽日隆，地位穩固，兄弟兩sà都受到本地紳士lâu日本人社會ke看重lâu喜愛。他ke人生，應該算係十全十美；四十零歲還màng kiung一男半女，係他唯一遺憾。M̀過他另有打算：老弟謝天送有兩個lai仔，兄弟倆已經參詳好，老二時祥將來做得過繼pûn他。他chhin恰意時祥；他決定oi pûn時祥接受完整ke日本教育；教育係最重要ke, 唯有教育chang能pûn時祥變成十足ke日本人。他liá一代係做m̀得啦。他時常謙虛又自卑ke嘆息。

謝庄長ke內心，還有一ke隱密方案：將來時祥定著oi送去日本內地接受教育；最重要ke, 在內地討一位「內地mà」過來。Ke時節，講ke係日本語，著ke,住ke係日本式ke,「睡」ke又係日本細妹人；將來kiung十個日本仔，ke時節，謝庄長他就有十個日本孫仔啦。哈哈……

Liá下他周旋在九位大人之間，談笑風生，非常快樂。他一再向九位大人致歉：他màng做到化民成俗ke境界，liá-teû山農野漢居然蔑視法令，冒犯大人，他堅決表示，定著oi pûn他liá-teû頑民嚴厲ke處置。

「嘛，ko-re-wa，急m̀得呦！」金川課長安慰他。

「Hai-i (係阿)！教育ka重要。」謝庄長講。

「意見，宜。宜ta！」另一位大人講。

「教育第一，我，贊成！」金川課長欣然同意。

「今日，」謝庄長不忘治事ke程序：「今日訥冒犯者，何ga宜得shi-ga?」

謝庄長ke話，引起九位大人ke一番斟酌。最尾一致表示：深體政府寬大德意，對在山農ke幼稚舉動，暫時m̀懲罰。

「今日，我teû ke遊興ga大事ta. Nò ?遊興m̀損得宜！」金川將意思表達得十分明白。
　　
故所謝庄長向鍾益紅巡查傳達這teû大人意旨。鍾聽後直咬牙，朝阿漢狠狠講： 　　

「便宜你lè.」鍾陰陰一笑：「M̀過，明日九時，你到大湖警察課來。」 　　

「我又犯mak-ke.」阿漢講。 　　

「你係限制住所人。本官oi尋你問話定定。樣仔？來m̀來？」 　　

九位大人lâu ke群護衛，導遊，侍候ke人丁，在日頭略略西斜時分離開lè;在他teû動身時，從劉俊梅ke老阿姆向他teû遞上一份陳情書。Liá也係計畫中ke一項。 　　

「有效嗎？阿漢哥！」山農kín問阿漢。 　　

有效果嗎？Liá-ke問題oi他樣仔應nò ? 　　

一場有驚無險ke風暴，總算「平安」過去；剩下來ke係大家ke一份希望，lâu天光日做得想到ke, 阿漢必然又有一場皮肉之災……。 　　

事情了結。Chang感到chhin累lâu肚饑。阿漢sa無胃口；飲幾口山泉以後，就藉故離開。 　　

他，心頭又陷入茫然落寞之中；m̀ 係為天光日災難ke來臨，係一份無奈何，無能為力ke覺悟在折磨他。 　　

明青還係留在茄苳樹下ke蔗園底背。他轉到蕃仔林口伯公廟前時，又有一樁更大ke困擾等著他。


「阿爸：在橫坑口我堵到一群狗仔。係 m̀ 係……？」係明鼎liá-teû在ke底背。 　　

「嗯。還順利。」阿漢ke目光在lai仔面hong搜索：「你樣仔轉來了？」 　　

「天光日係星期天嘛。」明鼎看他一下，chang又講：「南湖方面，liá幾日也鬧a chhin兇……」 　　

「哦？你樣仔知？」他目光一懍。 　　

「大湖、苗栗一帶都傳tén嘛。哈！就係有組織！」明鼎緊講。 　　

「郭，去了？」 　　

「係啊。阿無，樣仔搞起來，他帶一批人……」 　　

「你又常去尋他！」 　　

明鼎對他ke逼問嚇一下，或者忽然轉到現實，神情一黯，有teû唐唐突突ke樣仔。 　　

「有mak-ke心事嗎？」一照面，他就感到liá-ke細人仔有sit-pá異樣。 　　

「我……阿爸，」明鼎金金ke目珠逼視過來。 　　

他用目光鼓勵lai仔講下去。M̀過，內心sa暗暗一嘆：唉！Liá-ke細人仔，liá-ke桀傲不馴ke細人仔；他也m̀問問阿爸係 m̀係受了苦？所想到ke單淨係組織，單淨係力量；自家可無án熾烈ke神情。 　　

「阿爸：你m̀好煩惱。我……三日無上班了lè.」 　　

「做mak-ke無去上班？你！」他確實十分震驚。 　　

「M̀係，我 m̀, 係 pûn人解職lè.」 　　

「郭先生知無？」職務係透過郭安排ke. 　　

「知。他也無辦法。」明鼎ke目珠又熾烈起來：「係六月十七ke日……m̀知nai-ke狗腿仔記上我一筆。」 　　

「記上？你單淨m̀係過去聽演講嘛！」 　　

「我還then手貼標語……」 　　

他恬恬，內心有teû亂。一下chang講：「轉去吧！你就好好捏泥卵，耕山園啦。」 　　

「Oi樣仔lâu阿姆講？嗯，liá係大問題。」 　　

「千萬無好pûn你阿姆知你pûn人免職。」 　　

「郭先生講：暫時在他布店底背幫忙。」 　　

「……正經，單淨係幫忙布店ke工作嗎？」 　　

「郭先生係 án-ngiòng講。」 　　

「明鼎！你oi照實講！」他忽然間嚴厲起來：「你係m̀係lâu通霄ke群青年有來往？」 　　

「阿爸講ke 係湯建漳ke批人？」 　　

「哦？果然你……」他心裏壓力還較沈重lè. 　　

明鼎kín解釋原來通霄籍ke湯建漳，係一位對文化運動極為熱心ke青年；做人慷慨又有資產，故所深受當地青年ke擁戴。湯某lâu他爺ôi都設籍大陸；因為兩年來liá-ke人南北奔波參加文化協會活動，惹起警察方面ke注意，故所近日可能pûn「諭旨退去」(驅逐出境)。為到liá件事，湯某常到郭秋揚家求援，彼此án-ngiòng認識ke. 　　

「都係文化協會ke人嘛，也無mak-ke.」明鼎講。 　　

「聽講通霄ke批人，m̀ 係一般ke文協份子。有人聽過他teû ke演講lâu我講ke.明鼎：我感覺án-ngiòng m̀對，不許你參加。」 　　

「M̀會。我 m̀會去搞。」 　　

「Ke……你先在苗栗停幾日吧。等我警察課ke事了，自家lâu郭先生談談chang決定。」 　　

「警察課ke事？阿爸又？……」 　　

「例行公事。等一下，m̀好在你阿姆面前露mak-ke風聲；包括你ke職業。」 　　

明鼎講還早，oi在伯公廟前坐一下chang轉去。 　　

做阿爸ke還想講mak-ke,幾pái嘴都拔開lè,還係無講出聲音。最尾定定ke凝視他一下，chang行上kia. 　　

從後背看去，阿爸ke背彎ke chhin厲害。阿爸還màng衰老。他知ke係無數次酷刑造成ke ;他心目中ke阿爸係一座山，像伯公廟後邊ke座門板岩；阿爸永遠係勇氣十足，生氣蓬勃ke。 　　

有時他會想：阿爸定著m̀知自家係如何不凡。一ke山農，一ke在饑寒邊緣掙扎ke鄉下人，憑mak-ke一生不停在án偉大又渺茫ke理想？ 　　

阿爸sṳt虛心向他查問過有teû文化協會ke理論問題，還有所謂「革命問題」。阿爸m̀知，其實阿爸ke行動本身，就係 ke-teû理論最好詮釋，又何必計較mak-ke「理論」？ 　　

在根本上他行上liá條路，做得講係阿爸無形影響ke結果，包括童年ke模糊影像。自家tui chhin細chhin細下定決心：Oi學阿爸去鬥統治者。Liá-ke心眼做m̀得pûn阿姆知，兩個阿哥ke片也不能泄漏太多。因為tui阿姆ke目汁底背，他明白事理。 　　

他chhin早就有奇怪ke想法：他兄弟眾多，係講他一ke人為到lâu老爸相同ke理想sa有虧人子ke責任，ke也好像做得原諒。 　　

Liá下，阿爸驚他lâu通霄ke批青年來往；近來逐pái兩子爺談話，阿爸都一再叮嚀他m̀好太過偏激。 　　

無m̀對，ke-teû人ke理論怪怪仔，好像偏激yit-sit. M̀過，真實係感到爽快，好像十分有效；就係郭先生內心好像也贊成。奇怪ke 係，郭先生在表面上，總係無講mak-ke. 郭ke真意係他苦心探出來ke. 　　

他sṳt虛心深思過：Ke-teû人ke想法，也實在無法全盤接受；ke 係chhin得人驚，太違常情常理ke想法做法啊。實際上，先下阿爸講ke話，他有teû保留；他除thet lâu湯建漳認識，在郭家討論過問題，還去列席過在通霄舉行ke一pái座談會。他試tén雙方ke見解有距離，直覺意味出liá-teû人危險性太大。故所他無更進一步lâu 他teû來往。 　　

「我 m̀算欺騙阿爸吧？」他問自家。 　　

M̀。單淨係 m̀ pûn老人家操煩定定。