《編輯案頭》

 | | | 轉寄

轉載：客家紀錄片：《孤毛頭》

作者 2024.11.17

　　「孤毛頭」ti客語he細鬼仔ke意思。2024客家影音展演計畫以「漂」為主題，拍攝兩部紀錄短片《孤毛頭》lâu《麼人ti該片跳舞？》，十一月二十二號（拜五）to十一月二十八號（拜四）ti臺北市客家文化主題公園客家音樂戲劇中心、客家文化中心lâu臺灣當代文化實驗場先後舉行。《孤毛頭》記錄臺灣出名ke客家音樂人羅思容ke歌唱創作生活，深探kì tui土地、語言lâu圓身得著養分，勇敢突破傳統客家女性框架ke創作歷程。

　　《麼人ti該片跳舞？》以鏡頭追蹤pûn多倫多藝評人ô nó cho藝術界「文藝復興者」ke當代著名編舞家Peter Chin，探究liá位yû客家、愛爾蘭lâu加勒比海非裔血統ke藝術家，ngióng pân ti多重豐富ke文化根源lâu生命遷徙歷程中，發展出充滿創意lâu力量ke藝術生命。 　　2024客家影音展演計畫打算ti 十一月二十二號（拜五）舉辦「首映前夕特別場」，由《誰在那邊跳舞？》紀錄片主角Peter Chin帶來舞蹈創作lâu分享工作坊《編織旅程》；十一月二十三號（拜六）「紀錄片首映會」，由兩位紀錄片主角共下演出，ko搭配兩部紀錄片首映同映後影人對話。

　　十一月二十四號（拜日）lâu十一月二十八號（拜四）分別舉辦「特別放映」，搭配延伸主題座談，以深度對話內容引導觀眾認識當代「客家」，期待做得進一步認識客家文化。還啊多活動做得to「2024客家影音展演計畫臉書粉專」查詢。

　　2024客家影音展演計畫由臺北市政府客家事務委員會指導、臺北市客家文化基金會主辦。北市客委會主委lâu客基會執行長周羿希表示，客基會tui 2021年起勢推出客家影音展演計畫，透過影像紀錄發掘客家議題、人物lâu故事，to今產出五部當代客家表演藝術紀錄片，ko來會繼續累積當代客家影像，拓展客家敘事ke新視野。