《戀戀台灣客家文學》

| | | 轉寄

發表會

  下晝三點邊仔,遠遠傳來音樂聲,恬靜ke巷仔像正轉醒,開始yû腳步聲、講話聲、車仔聲,人行出來,一儕、兩儕、三儕……,大家興嘟嘟仔,yû-teû帶等細人仔,yû-teû帶等孫仔,yû-teû he兩公婆共下行出來,yû-teû he騎腳踏車來ke,全聚總在廟坪,參加產品發表會。

  既經yû兩年mò產品發表會,大家tu試著yi生趣,像準liau樣仔,時間一到,音樂一響,老嫩大細就走出來。「你màng參加過hó?該央時你màng來……」經驗豐富ke鄰舍lâu正搬來mò兩年ke新鄰舍紹介識時行多年yu當久mò出現ke產品發表會。

  熟識產品發表會ke人tu知,一開始he細阿姐先唱兩條好聽ke歌仔,過來正he重頭戲——產品發表。主持人當會講,tui兩千銀元ke銀纖維底褲,講to好用yu便宜ke洗衫粉。還當會講笑,講假使產品發表會ke紀念品——盆仔thióng多,做得拿to拜三夜市仔賣,一隻十銀元,買一還送一。大家聽到緊笑。歡歡喜喜一點鐘過去,產品發表會結束,yû人買,yû人mò買,拿等戰利品——盆仔轉去,一路遛麵線。大人轉屋,換細人仔湊伴仔出來liau。巷仔定定仔yu恬靜下來,臨暗ke日頭特別靚。