《江秀鳳散文專欄》

| | | 轉寄

讀幼稚園ke ngài(上)

  讀幼稚園ke時節,發生盡多事情,頭一擺ke在屋下附近,一間正常ke幼稚園,阿姆日日oi上班進前,先渡ngài去幼稚園lâu ngài交pûn先生,怕he ngài還忒細m̀慣án多人共下,驚生驚生,逐擺就揇等阿姆ke大腳髀m̀肯放,盡命牯放勢大噭,先生來揇,園長來牽,還he m̀肯入去,後生ke阿姆日日就當m̀盼得,目汁濫泔離開幼稚園,去赴kiâ早枋車,還oi盤車去上班。

  阿姊讀小學下課會來ngà幼稚園寫作業,yû一日下課ke時節,放學時牽等ngài共下轉屋,ngài兩姐妹ke性體同阿姆共樣,盡好「拈揚尾打草蜢」,在路項看著麼該新奇ke東西,就會行過去看鬧熱,該日在市場過,早市賣一晝邊,ngài-teû下課he臨暗邊仔,兩姐妹行到雞籠仔頭前,雞仔髻紅紅,雞毛紅羅花色,有紅、有烏、有柑仔色、咖啡色,試著又靚又得人惜,兩姐妹四粒目珠看到捩捩轉,玄玄風有一隻雞仔對等ngài啄一下,啄著ngà鼻公lâu目珠適中央ke所在,鼻旺仔一下就流到歸身仔,ngài pûn雞仔ke攻擊嚇到噭到唩皇殺天,ngà姐嚇到面呷青,驚到會死,市場肚yu mò半儕人,兩儕牽等一路轉,行到米粉伯姆ke攤仔過,pûn kì看著,正遽遽拿面帕lâu ngài捽,面項ke血捽忒了,衫項ke就mò法度捽淨,等ngà姆下班到屋,已經暗晡頭7點零仔,知ngài著傷盡m̀盼得,揇等ngài緊噭,對該央時起勢就輒輒流鼻旺仔,一流就係歸管仔,有一擺流忒多,阿姆就拿食飯ke碗來裝,還裝到淰出來,渡去pûn先生看me mò效,到轉骨過正無三不二時流鼻旺仔。對該擺過,看著雞仔就驚,閃到遠遠。

  正讀幼稚園又pûn雞仔啄著,盡m̀想去讀書,爺哀oi上班賺錢,高不將還he oi送ngài去幼稚園,旦旦就m̀肯睡當晝,灶下煮飯ke阿姨就偷偷仔帶ngài出去尞,買糖仔、餅仔拐ngài,盡記得yû一日,kì帶ngài去一台「扭卵機」頭前,喊ngài撙機器頂ke開關,撙一擺就會跌下烏色ke巧克力,緊撙就緊跌,矮矮ke細人仔全m̀知阿姨在頂高煞猛揤錢,ngài還搞到當暢,該擺抔(put)盡多巧克力轉去,轉到幼稚園大家me睡醒仔,ngài就lâu巧克力分歸班同學食,大家都歡喜壢天,阿姨在教室外背笑瞇瞇仔緊頷頭,想著灶下阿姨逐當晝同ngài做伴,án會相惜,還承蒙喔!

    2018.5.3在台中55號公車頂