《江秀鳳散文專欄》

 | | | 轉寄

花缽仔種菜

作者 江秀鳳（四縣腔） 2018.06.24

　　都市人盡衰過，行來行去滿哪仔就he屋仔，屋前屋後做盡he馬膠路，行過大路脣看著一盆吊菜仔，開等吊菜色ke花，過兩禮拜sa看著纜纜吊吊幾下條吊菜仔生到萋萋，隔壁該盆辣椒仔me共樣，兩禮拜前正看kì開白花，這下me打到一樹ke辣椒仔，有青ke、有紅ke phô-mà-chi-cha，對面巷仔肚ke伯姆me當煞猛，用花缽仔種歸排仔紅菜、番薯藤，連牛角菜kì me種到yû好食，實在還服kì哪。

　　後背巷仔yû一個老伯姆種幾下盆拐絲、七層插、還有芙蓉生到榮榮榮，種到還靚哪！側角這片m̀知麼人種幾下頭檸檬開吊菜色ke花，一盆打有四、五粒就當慶仔，行啊過就會鼻著檸檬ke味緒，聽鄰舍講該幾頭he香水檸檬，故所脫體香。共位還yû兩頭洛神花，這頭洛神花打到盡結，葉仔跌淨淨，歸頭紅啾啾當餳人ke目珠，tui該行過去ke人就會看一下，ngài輒輒會頓恬企到該欣賞洛神花有藝術感ke線條、色目，看到過癮正甘願走，桔仔就m̀使講，過年過節大家就會去花市買桔仔放到屋面前，打到歸樹仔金黃金黃，像手指公án大粒圓圓結結，滿哪就he，這he台灣人盡合意ke金黃色像黃金財寶樣仔，會帶來利市發財ke好運勢，尤其he做生理ke人，一擺定著oi買兩盆，放到門口兩片析，出出入入看著金那那ke晟光心肝肚就歡喜，桔仔ke名就he好吉兆，過年時節賣花、賣桔仔、黃梨花、大酸柑、水仙花、蘭花這兜ke生理人，賺錢賺到睡目就會笑。

　　學校脣yû一細垤水溝地，有人在該種弓蕉、吊菜仔、辣椒仔、搭棚仔種竻瓜仔、明豆、還有白鳳豆、百香果（thò-khie̍t-só），合種幾下頭這án久當時行ke「蝶豆花」，開出青吊菜色ke花又靚又鬧，揚蝶仔、揚尾仔輒輒走來翕相，佢兜種ke牛角菜比對面巷仔肚ke伯姆種ke還kha會打，當yû額，因爭學校脣ke水溝地直接種到泥肉肚，故所營養較有罅，生到飆飆嫩嫩當會大。講著台灣人yi守規矩，打到路脣ke豆仔、竻瓜仔、百香果（thò-khie̍t-só）纜纜吊吊，大家行過來行過去，m̀識pûn人偷摘走，品德實在好。

　　講著轉角有一間自行車店，頭家娘me盡好種東西，店面前種當多七層插、蔥仔、韭菜、番薯藤、桃仔、木瓜、枇杷，舊年桃仔打兩粒，kì me盡好種花，日日春、九芎仔、海棠花，麼个就種，種到mò哪好種，拿自行車頭前壞忒用m̀得ke車籃仔，吊到鐵窗門項種五、六頭喇叭花，年年就開到phô-mà-chi-cha，ngài me會走去翕相傳pûn朋友看，這就he都市人「花缽仔種菜——無園」ke心情，看起來種花種菜，m̀單淨庄下人hau種，連mò圃園ke都市人me會想辦法用花缽仔種兜有ke無ke來過癮，pûn自家歡喜me pûn別人看靚。

　　2018.5.4半夜在大墩木棉樹下