《江秀鳳散文專欄》

 | | | 轉寄

M̀識見怪愛學精

作者 江秀鳳(四縣腔) 2018.09.02

　　麥當勞在ngài小學時節打入台灣市場，大家就chio-chio-kún歸屋下人共下去食看哪，麼个安到麥當勞，ngài兩姐妹me要求ngà姆渡ngài-teû去食看哪，莫pûn同學笑ngài山精m̀識見怪，m̀過ngà姆錢銀總he算等來使，m̀會儘採就渡ngài-teû去，該央時學校he月考制，kì講月考考忒正做得去。等考試考忒，mò議論oi考幾多分、幾多名，ngà姆講yû盡力就好。

　　M̀過ngà姆食齋，麥當勞yû規定做m̀得帶東西入去食，又還oi算人頭，yû盡少消費正做得ke規定，ngà姆擐一隻飯包仔，lâu櫃枱細阿妹仔講kì食齋，麥當勞mò賣齋ke，故所自家帶飯包來做得mò？該細阿妺仔還走去問店長，正pûn ngài-teû過關點餐，頭擺麥當勞賣歸組仔ke餐當貴，ngà姆試著yû義務pûn ngài-teû出去社會多看、多行、多見世面，yû奇巧ke東西定著會渡屋下人去遶尞，m̀識食過ke東西，特別好食，到今，一生人就還記得麥當勞ke味緒。

　　Ngà好朋友阿雅ke阿姆，頭一擺渡ngài共下去牛排店嚐牛排，ngà屋下m̀識食過，等服務生lâu牛排送來ke時節，盤仔頂項yû一隻蓋仔，蓋仔打啊開來煙沖沖仔，醬料淬淬滾緊噴，阿姨教ngài同一條白色ke布仔拿起來擋等衫，m̀好pûn緊噴醬料ke牛排lâu衫噴屙糟，yu教ngài右手擎刀仔，左手擎槧(chhiám)仔，切一垤食一垤，定定仔食，ngài學yi遽，一口一口仔食，牛肉ke味緒yû牛奶羴，正經當香當好食，咬落嘴還會承牙，食án大人自從m̀識食過án好食ke肉，實在還享受哪！切著一垤yû嫩骨ke所在，硬切就切m̀開，鋸當久，下後就大大力切落去，刀仔切著盤仔ke聲當大聲，歸間餐廳ke人都yû聽著，ngài試著還敗勢哪！Mò想著該垤牛肉續噴出去，噴到隔壁ke桌頂，該桌ke人做盡翻轉頭來看ngài，害ngài面紅濟炸像恩主公ke面án紅，還失禮唷！阿姨遽遽企起來去同人會失禮，好得mò噴著人，倒轉來就同ngài then手切一垤，當溫柔ke喊ngài食，kì yu講，伸ke mò骨頭了，你頭下切到當好，mò相干好好享受若牛排，m̀使掛意，阿姨同ngà姆共樣性體一等好。

　　轉到屋下，同屋下人講這件事情，分kì-teû笑到這下，ngà姆講ên客人旦旦he耕種人，盡惜牛仔，牛仔對耕田人恩情當大，喊ngài下二擺點豬肉ya-he鷄肉，莫食牛肉kha好。

　　這兩擺去食m̀識見怪ke料理，pûn ngài印象當深，me學著當多去餐廳食飯ke禮節，雖然yû見笑ke過程，下二擺就m̀會出差世pûn人笑了。

2018.5.31台中55路公車頂