《江秀鳳散文專欄》

| | | 轉寄

三年生ke ngài

  讀小學三年生堵著偎耶誕節ke時節,學校先生問大家:「相信yû耶誕老阿公仔ke人請擎手。」歸班淨ngài一儕人擎手,大家翻轉頭看ngài,逐儕就笑到hê天hê地,ngài續大大聲拗講:「正經yû耶誕老阿公仔啦,ngài逐年都yû收著等路。」講忒同學笑到還kha大聲,連隔壁班ke先生就勾頭出來看。同學講:「該he若爺哀送ke啦,戇嫲!」

  該下晝轉到屋,ngài譴眵眵仔問ngà姆,世界項mò耶誕老阿公仔,仰m̀早兜仔pûn ngài知,害ngài今晡日pûn同學笑。吾姆好聲好氣lâu ngài講:「Ngài希望你兜過一個快樂ke童年,你知ngài逐年就oi想空想缺,oi送你兜麼个等路,幾辛苦你知mò?」tui該年過後,ngài同阿姐就m̀識收著耶誕節等路哩!Ngài問阿姐哪久就知mò耶誕老阿公仔這件事?Kì講大概me he三年生ke時節,ngài譴嘟嘟仔問kì:「你知仰m̀講呢,害ngài pûn歸班仔笑。」ngà姐應ngài:「大戇巴,講出來就mò等路仔啦,過忒年定著mò哩,都he你害ke。」

  該年,ngài有一個細倈仔同學,堵堵坐ngà隔壁,佢lâu ngài同年,共月共日生日,ngài朝晨頭8點出世,kì he暗晡頭8點降ke,戴ngà隔壁巷仔,排路隊ke時節,兩儕兩儕一列,ngài yu lâu kì排共下,日日就共下行,kì he一個細紳士,逐日就先送ngài轉到屋正翻頭轉去厥屋下,行久仔就變到kha熟事,m̀過兩儕還細,m̀曉得約會。Yû一日,食飽夜聽著有人撳電鈴,ngà姆走去開門,就大嫲聲在門口喊ngài,講yû人尋ngài,ngài遽遽走等出去,話著he阿雅尋ngài,kì戴另外一片析,mò共路隊,走出來正看著he逐日lâu ngài共下轉ke細倈同學,kì lâu一包包裝包到當靚ke等路拿到頭那頂恁高pûn ngài,lâu ngài講:「生日快樂」,ngài吂轉魂過來,kì就瀉走了,連oi喊kì入來坐、食杯茶就mò,實在還失禮哪。

  入去屋肚,歸屋家人七鼓八笛,緊問送麼个?Ngài驚包裝紙扯爛忒,頭擺人mò用百貨公司ke袋仔裝禮物,淨會買包裝紙自家包,看這等路包到恁靚,定著m̀-he ngà同學包ke,可能he厥姆lâu kì包ke,等到包裝紙拆好,打啊開來,大家就「哇!」一聲,目盯盯仔緊看,還高級ke音樂盒仔,蓋仔打開來就看著兩隻著等芭蕾舞白紗裙ke細阿妹仔在該跳舞,音樂叮叮噹噹緊響,歸屋家人就暢到耐m̀得,該he ngài這生人,頭一擺yû細倈朋友送ke等路,到這下就還記得該音樂聲,該跳舞ke細妹仔,該靚靚ke盒仔,該m̀識牽過手、約過會單純ke朋友情。

  2018.5.7在大墩木棉樹下