《善雄牧園》

 | | | 轉寄

敬拜上帝Ṳ(修訂版)

作者 邱善雄 2012.08.12

現在繼續來講起ên-teû敬拜上帝所應有ke態度lâu ên-teû親近上帝應有ke心意：

1. 須要有恭敬ke心lâu態度
Ên-teû所敬ke上帝係至聖、至尊ke上帝，ku-só ên-teû敬拜上帝祂ke人，oi用十分敬虔ke心lâu恭敬ke態度來敬拜祂，ên-teû都知，ên-teû假使oi見一位較偉大ke人，ên-teû oi服裝整齊，結領帶，用恭敬ke態度去見他，ên-teû對世上ke一位偉人就án-ngiòng恭敬有禮貌，m̀-sṳt講ên-teû到禮拜堂係oi朝見世界ke創造者，萬物ke主宰，ku-só ên-teû ngiòng做得無用恭敬來敬拜就近父上帝？ Ên-teû看當時ke以色列民對上帝ke態度係án-ngiòng? 應該效法他teû嗎？M̀-ku在ke反面，就係講，你假使無用恭敬ke心來敬拜父上帝，你就oi得到上帝所賜下ke災禍。Liá就係亞倫ke子—拿答，亞比戶因為無恭敬，亂入去至聖所，他teû所用獻祭ke香m̀係按照上帝所規定ke, ku-só他對於上帝ke命定係一個無禮貌ke舉動，就係對上帝無恭敬ke心，ku-só他teû就逢到一ke嚴厲ke刑罰，各位親愛ke兄姐，ên-teû千萬做m̀得像拿答lâu亞比戶ke對上帝無恭敬又無禮貌ke心lâu態度，使到ên-teû將來受主ke棄捨、審判私刑罰。

2. 須有謙卑ke心lâu態度
Ên-teû假使oi敬拜上帝ke人，定著oi有謙卑ke態度lâu心情來就近祂，ku-só為了liá樣，ên-teû ke內心就做m̀得驕傲lâu自高，ên-teû oi除去liá一切，用謙卑、痛悔ke心來就近敬拜父，liá樣ên-teû ke敬拜就oi得到上帝ke接納，因為上帝所看顧ke就係liá種心。主耶穌在世時，祂也親身教示ên-teû在兄弟中oi謙卑，做m̀得自高，ku-só祂有屈下自家來代眾學生洗足，liá更係謙卑，ku-só ên-teû oi學主，thèn祂ke足步，用liá種謙卑ke心來敬拜上帝，ên-teû謙卑ke人在將來oi得到上帝大ke恩惠。

3. 篤信不懼、不疑ke心
有幾多人自感係重罪人，堪m̀得去教會禮拜，朝見上帝，因為上帝係至尊、至聖ke父，ku-só自家chhin驚，m̀敢見到上帝ke面；另一種人，在他teû ke內心無自信，懷疑上帝ke救恩lâu愛心，ku-só m̀來敬拜父上帝，m̀-ku我lâu你teû講，m̀使驚，m̀使疑，因為在聖經內有講，ên-teû對耶穌做得lâu上帝復合，耶穌係父上帝ke獨生子。祂來世間擔當ên-teû ke罪，使ên-teû信祂ke人得罪赦，做得lâu上帝復合，現下ên-teû大家已經都信主耶穌基督，ku-só ên-teû就m̀使驚，做得好膽進前來到上帝ke面前敬拜祂。

4. 須有清潔、專一ke心
Ên-teû敬拜上帝m̀係像世俗人，著新衣、清潔衫褲去廟拜拜共樣，ên-teû ke敬拜必須oi ên-teû ke心清潔，ku-só在敬拜上帝以前，你定著oi祈禱，求聖靈來掃除ên-teû一切內心ke世事，私慾罪惡，pûn ên-teû做得用一ke chhin清潔ke心來敬拜父上帝，假使ên-teû ke心無清潔，你看m̀到上帝，就係講你ke心假使無清潔，你所讀ke聖經、所吟ke詩、所聽ke道理，都做m̀得入你ke心。Ên-teû必須用清潔ke心朝見上帝，lâu用全一ke心來聽上帝ke話，liá樣ên-teû就oi得到上帝ke賜福。

最尾ên-teû來聽主耶穌án-ngiòng教示ên-teû敬拜上帝ke方法，主所教示ên-teû敬拜上帝ke方法就係，ên-teû oi用靈、用真實敬拜父，因為父上帝係喜愛liá種心ke人敬拜祂。ên-teû在上帝ke面前也做m̀得隱藏，因為上帝係看透你ke內心。Ku-só ên-teû oi用真實ke心來敬拜上帝，因為ên-teû做耶穌ke福氣，因為ên-teû耶穌有二個大福氣：1. 得主ke寶血受贖罪。2. 做得敬拜上帝。Ku-só ên-teû既然有得到án大ke福氣，你敢m̀敬拜上帝嗎？Ên-teû oi抓住liá好機會，做m̀得棄捨看為無要緊，因為時要到，現今就係，假使真實用靈敬拜父者，oi得上帝ke祝福，因為上帝係歡喜liá種實心敬拜祂ke人。