《善雄牧園》

 | | | 轉寄

主留平安pûn你teû(2) (修訂版)

作者 邱善雄 2012.01.08

Ên-teû來看主所留ke平安係má人ke平安，又oi án-ngiòng留下。主耶穌講：「我將我ke平安賞賜你teû.」Án-ngiòng做得知liá真平安就係唯獨ke位做和平人君ke主耶穌chang做得賞賜pûn ên-teû,現下ên-teû來看主所賞賜ên-teû ke平安有mak-ke特點：

1. 係至高無上
無人做得lâu祂所賜ke平安相比，祂所賜ke平安超過一切，係 lâu人在廟底背所求ke平安無相同。

2. 係獨出於主
真實平安只有主耶穌基督有，其他人所去追求ke平安係虛偽，係不平 安，係自家苦楚，因為真實ke平安只有主耶穌做得賜人，天下無別人。

3. 係m̀限境遇
主ke平安m̀係受境遇限制，m̀係講你ke境遇好，主ke平安就在你ke內心；你ke境遇惡，主ke平安就離開你ke心，主所賜ke平安m̀係án-ngiòng,祂ke平安m̀係限制你ke境遇好或壞，係時常住在你內心，因為主多受痛苦常經憂患，係忍受人頂撞ke.

4. 係長久m̀變
主所賜ke平安係永久m̀變換，從古至今，祂所賜ke平安都係m̀變，ku-só ên-teû做得安心來領受主所賜ke平安在ên-teû內心。

5. 係完全m̀缺
主ke平安m̀限境遇lâu永久無改變，就係完全m̀缺；m̀係講主只有賜你一部分ke平安，使你ke別部份得到不平安ke事，像人對佛求平安，所求ke 係只有一小部份定定，m̀-ku主耶穌所oi賜ên-teû ke平安，m̀係只有一部分係完全m̀缺ke平安，因為liá平安係內心平安，ku-só係完全ke平安，liá平安係仇敵做m̀得攪擾，世人做m̀得奪去，liá平安對祂ke平安發出ke, ku-só ên-teû所得到ke平安lâu主ke平安共樣。

主接續講：「我所賜ke, 無像世人所賜ke.」主ngióng會án-ngiòng講liá話喏？係因為世人無真平安，ku-só自然也做m̀得將真平安賜pûn人。又世人所賜人ke平安係ngióng般：

1. 係暫時
無像主所賜ke án長久，只有暫時，可能你今年或本月有平安，m̀-kulia2平安有苦難thèn在後背，就係講你ke平安係暫時，在明年或下月你ke平安就化為烏有。

2. 係無法度倚靠
靠人來得ke平安係絕對無法度倚靠，不但如此，就係你所靠一切ke錢財、學問、地位都無法度倚靠，雖然你真實有學問、又富裕ke生活，m̀使煩mak-ke事？M̀-ku你ke錢銀、學問有法度倚靠嗎？我敢斷定講係絕對無法度倚靠，因為人ke錢財、學問勢力ke變遷，ke時你ke平安在nai位？

3. 係隨境遇來變
人所pûn人ke平安係隨著境遇來變換；好境遇時就感覺平安，m̀-ku假使逢到逆境就完全失去平安，ku-só人所賜ke平安係順著你ke好壞境遇來變來變去。Liá係因為mak-ke原因？因為世人所祝福人：「願你平安」liá話有時係誠心ke希望，m̀-ku有時係客氣話，m̀-ku m̀論án-ngiòng, 世人總無法度做得賜人得平安ke權利，ko無法度將平安賜pûn別人，因為世人都係罪人，ên-teû知，假使內心有罪，他就不安，ku-só罪人做m̀得將平安賜人，m̀-ku假使有，係暫時、無法度倚靠，係人做m̀得承受ke, 人所oi承受ke就係主所賜ke平安，因為主所賜ke平安係 lâu世人所賜ke無相同，祂做得將平安賜pûn別人，就做得賜人得平安ke權利，祂所賜人ke平安，m̀限於定量，係像自來水、電、繼續不斷ke供人應用，m̀-ku liá平安ke經驗，係主照個人所做得接受ke賜pûn他。