《善雄牧園》

| | | 轉寄

亞伯拉罕ke信心(試煉)—信仰ke試煉(2)(修訂版)

Tui-liá開始ên-teû來互相研究亞伯拉罕所逢到信仰ke試鍊經過。

亞伯拉罕受上帝命令獻獨生子以撒1-8節。

Liá-ke試煉係yit艱苦,因為上帝應允亞伯拉罕所生ke獨生子以撒係經過25年久chang來實現,ku-só 爺ôi都chhin愛他,因為以撒chhin有信仰lâu順從爺ôi。在以撒20歲,就係亞伯拉罕120歲時,有一暗晡,亞伯拉罕受上帝ke啟示講:「你oi帶你ke賴仔,就係獨生子,你所愛ke以撒去摩利亞ke地方;我所oi指示你ke地方,在ke位將他獻做燔祭。」Ên-teû想亞伯拉罕ke時ke心情係án-ngiòng, 我想他絕對chhin痛苦,內心定著生起互相矛盾ke心,因為亞伯拉罕定著會聯想到上帝所應允他ke話,上帝sṳt應允亞伯拉罕ke子孫像天上ke星辰lâu海邊ke沙;m̀-ku在liá時節上帝tiên-tó命令他oi將liá位上帝所應允獨一無二ke 賴仔以撒帶到摩利亞,上帝所備妥ke地方來獻做燔祭pûn上帝,liá 敢m̀係上帝ke欺騙嗎?

在ke時亞伯拉罕已經年老,假使將以撒照上帝ke命令去獻pûn上帝,亞伯拉罕敢m̀係變成斷種嗎?亞伯拉罕liá-pái所逢到ke試煉實在chhin艱苦,假使ke時亞伯拉罕將liá事去lâu他ke pû娘撒拉商議,liá事定著會失敗,因為撒拉絕對m̀肯放棄在年老所kiung ke老子以撒,m̀-ku好加在亞伯拉罕有下最大ke決心堅持信仰,信上帝係無所不能,就完全順從上帝ke命令,即時去實行lái工作。

聖經記載講:「亞伯拉罕打早起來,準備驢、帶他二個後生人lâu他ke 賴仔以撒,也帶燔祭ke柴,起身去上帝所指示他ke地方。」Ên-teû看他得到上帝ke命令後,無延遲一刻久,在打早就積極實行,驚三思反省,就難遵從上帝ke命令。Ku-só ên-teû信徒假使逢到上帝ke啟示或良心ke指點,就係佈道或lâu人和好時,oi隨時實行做m̀得延遲,做m̀得想講,我來去lâu má人商議,他假使oi去佈道,我chang去,liá係大錯誤。

Ên-teû來看保羅先生在加拉太1:16所講:「上帝既然中意將祂ke獨生子顯明於我,oi pûn我宣傳祂在外邦,我就m̀使 lâu人商議。」主耶穌也sṳt對oi thèn祂ke人表示講:「假使堅決oi thèn祂ke, m̀使再轉去商議。」(請看Luke 9:57~62)Ên-teû oi學亞伯拉罕堅決ke信仰lâu無懷疑,tiên-tó oi深信,m̀驚斷種,ku-só ên-teû信徒oi做有信仰ke生活,做m̀得只有看眼前,oi深信永生lâu死再復活ke道理。雖然ên-teû受試煉也做m̀得失志,上帝命令亞伯拉罕獻所愛ke獨生子,也oi命令ên-teû獻ên-teû所愛ke自家。各位兄姐,ên-teû做m̀得再固執,oi順服上帝ke命令奉獻ên-teû自家ke身體,為主或教會來做工,chang m̀會辜負到主ke愛。