《善雄牧園》

| | | 轉寄

祈禱ke模範(2)(修訂版)

5、亞伯拉罕m̀係強求ke祈禱,m̀敢固執,講有婉轉,m̀敢對上帝強求,liá教示ên-teû信徒祈禱時做m̀得有固執、強迫,因為ên-teû人ke智識有限,ên-teû所求ke無一定係利益ên-teû ke, ên-teû做m̀得強求,oi學主耶穌在客西馬尼團ke祈禱,án-ngiòng ên-teû ke祈禱chang有上帝ke旨意,m̀係講ên-teû所chhin愛ke就oi來強求,因為ên-teû所愛ke, 無一定tú好係合上帝ke旨意,有時節時màng到,ên-teû做m̀得強求,故所ên-teû祈禱時oi聽上帝ke意思,chang m̀會使ên-teû生起發譴恨上帝講無照ên-teû ke所求來報應ên-teû.

6、亞伯拉罕祈禱時,有尊重上帝ke威嚴。因為亞伯拉罕求上帝講,做m̀得譴。我oi再講,tui liá句pûn ên-teû知亞伯拉罕有明白上帝ke威嚴,m̀敢失落對上帝尊敬ke心。現今有幾多人,看上帝係大慈大悲,顛倒生出無禮貌、無尊敬上帝為聖,糊塗亂言,失禮萬千,故所ên-teû oi學亞伯拉罕ke模樣,尊敬上帝ke威嚴,做m̀得亂言,祈禱ke話做m̀得糊塗,用真心、恭敬ke態度在上帝面前來祈禱,因為上帝係萬軍ke耶和華,做m̀得侮慢。

7、亞伯拉罕有恆心ke祈禱。Ên-teû看亞伯拉罕代替所多瑪lâu俄摩拉二城祈禱,繼續有祈禱六次,liá做得講係有忍耐、m̀厭倦ke祈禱,係亞伯拉罕chang有án-ngiòng ke精神,liá就係出在愛心、憐憫,liá種ke心就係上帝ke聖心。M̀-ku tui另一方面來講,oi人失敗、沉淪,liá就係魔鬼ke心,主耶穌在約翰10:10有講:「賊來就係oi偷,oi滅、oi殺,我來係oi pûn你teû有活,又有豐盛。」故所ên-teû信徒oi為人或教會,祈禱時oi存有愛心lâu憐憫ke心,就係oi存有上帝ke心為心,歡喜別人ke得救,時常為他teû來祈禱。保羅先生講:「祈禱oi時常。」(Roma 12:12尾)主耶穌基督也有教示ên-teû oi時常祈禱,做m̀得厭倦,liá-ke比喻就係記在路加18:1~8。Liá就係主耶穌在教示ên-teû oi時常祈禱,做m̀得厭倦ke實例,故所 ên-teû做m̀得失志,oi時常祈禱,到尾來上帝定著賜福氣pûn ên-teû.

8、亞伯拉罕係有信德ke祈禱。大家都知亞伯拉罕ke信心係大ke, 他ke信心pûn上帝稱做義,他係ên-teû信仰ke阿爸。故所在祂ke祈禱中也係 chhin有信心ke祈禱,ên-teû在liá位做得看出亞伯拉罕一、二點ke信德。

I、Ên-teû看亞伯拉罕信上帝係萬權能,做得使全城ke罪人得悔改,故所他chang勇敢祈求上帝。

Ṳ、亞伯拉罕深信人有悔改ke可能,m̀-ku為了後人去見證傳道理ke原因,使到全城ke人都墮落犯罪來忤逆上帝。故所亞伯拉罕有信罪人無悔改係因為無人去傳,故所做信徒ke, 外邊有幾多人行在罪惡中,你有去問,向他teû傳道理無?主講:「你teû 係世間ke光,地泥hong ke鹽,有實在負起liá-ke責任無?有時常為到ke-teû màng信者來祈禱無?假使無請來看主耶穌所講ke話」,祂講:「我實實在在lâu你teû講,凡若pûn liá-ke山,移去丟在海底背,心中無懷疑,獨獨信他所講ke話定著成,就oi pûn他成」,故所我lâu你teû講,凡若你teû所禱告來ke, oi信已經得到,就oi pûn你teû成。」故所ên-teû祈禱時oi只有信,做m̀得做m̀信ke人,因為假使有信ke祈禱,上帝定著成全ên-teû ke祈禱,m̀-ku ên-teû做m̀得妄求,像子女向爺ôi要刀或chhung-é, 爺ôi絕對m̀ pûn他teû , 因為pûn他teû 係對他teû無利益,故所 ên-teû做m̀得妄求。

最尾希望ên-teû大家祈禱oi慎重,做m̀得忽略;又祈禱時,oi學亞伯拉罕有勇氣,專一ke心,謙卑ke 內心,m̀厭倦ke精神lâu信心來時常祈禱上帝,到尾就oi得到上帝大ke報償。A-men